ໃນວັນທີ 26 ສິງຫາ 2019, ສຄອ ແຫ່ງຊາດລາວ, ໃນນາມອົງການຈັດຕັ້ງ ຂອງພາກທຸລະກິດລາວ, ພ້ອມດ້ວຍ ສະມາຄົມ ສົ່ງເສີມການຮ່ວມມືດ້ານວິຊາການແບບຢືນຍົງແຫ່ງປະເທດຍີ່ປຸ່ນ (AOTS), ແລະ ສະມາຄົມສົ່ງເສີມດ້ານເຕັກໂນໂລຊີ (TPA) ແຫ່ງປະເທດໄທ

ໄດ້ຮ່ວມກັນຈັດການຝຶກອົບຮົມໃນຫົວຂໍ້: “ການພັດທະນາບຸກຄະລາກອນ ຢ່າງມືອາຊີບ Professional Employee Development Program “ ຂື້ນ ໂດຍການເປັນປະທານຂອງ ທ່ານ ນາງ ຈັນທະຈອນ ວົງໄຊ, ຮອງປະທານ ສະພາການຄ້າ ແລະ ອຸດສະຫະກຳ ແຫ່ງຊາດລາວ, ທ່ານ ນາງ Tomoe WATANABE (ໂທໂມະ ວາຕານາເບະ), ຜູ້ປະສານງານ ສະມາຄົມ ສົ່ງເສີມການຮ່ວມມືດ້ານວິຊາການແບບຢືນຍົງ ແຫ່ງ ປະເທດຍີ່ປຸ່ນ (AOTS) ປະຈຳພາກພື້ນ ແລະ ທ່ານ  ອາຈານ ຍຸດນະຣົງ ເອື້ອເຟື້ອ , ວິທະຍາກອນ ແລະ ຄູຝຶກ  ແຫ່ງສະມາຄົມສົ່ງເສີມດ້ານເຕັກໂນໂລຊີ (TPA) ແຫ່ງປະເທດໄທ.  ເຊີ່ງການຝຶກອົບຮົມຈະໄດ້ດຳເນີນເປັນເວລາທັງໝົດ 05 ວັນ, ໃນລະຫວ່າງວັນທີ 26 – 30 ສິງງຫາ 2019 ທີ່ ສຄອ ແຫ່ງຊາດລາວ.  ປີນີ້ ແມ່ນເປັນປີທີ 3 ແລ້ວ ທີ່ ສຄອ ແຫ່ງຊາດລາວ ໄດ້ຮັບການສະໜັບສະໜູນ ທາງດ້ານງົບປະມານ ໃນການຈັດຝຶກອົບຮົມ ຈາກ  ສະມາຄົມ ສົ່ງເສີມການຮ່ວມມືດ້ານວິຊາການແບບຢືນຍົງ ແຫ່ງປະເທດຍີ່ປຸ່ນ (AOTS)  ເຊີ່ງໃນຫົວຂໍ້ດັ່ງກ່າວນີ້ ໄດ້ຮ່ວມກັນຈັດທັງໝົດ 13 ຄັ້ງ ເຊີ່ງ  ມີຜູ້ເຂົ້າຮ່ວມທັງໝົດປະມານ 500 ຄົນ ເຊີ່ງໃນນີ້ ລວມທັງ ການຈັດຝຶກອົບຮົມ ຢູ່ຕ່າງແຂວງ 5 ຄັ້ງ.

ຈຸດປະສົງ ແລະ ເປົ້້າໝາຍ ອັນດຽວກັນ ກໍ່ເພື່ອເປັນການພັດທະນາ ບຸກຄະລາກອນ ຂອງລາວ ກໍ່ຄື ບັນດາຫົວໜ່ວຍທຸລະກິດ ຂອງ ລາວໃຫ້ມີຄວາມເຂັ້ມແຂງ ແລະ ສາມາດບັນລຸຕາມເປົ້າໝາຍ ຂອງ ການດຳເນີນທຸລະກິດ. ດັ່ງນັ້ນ, ຈຸດປະສົງ ຂອງ ການຈັດຝຶກອົບຮົມ ກໍ່ເພື່ອເປັນການພັດທະນາຂີດຄວາມສາມາດ ໃຫ້ແກ່ພາກທຸລະກິດຄ່ຽງຄູກັບການພັດທະນາບຸກຄະລາກອນຂອງບໍລິສັດ ເພື່ອເພີ່ມປະສິດທິພາບຂອງການເຮັດວຽກໃນອົງກອນໃຫ້ເປັນລະບົບ ເພື່ອໃຫ້ສາມາດ ຕອບສະໜອງໄດ້ກັບຄວາມຮຽກຮ້ອງຕ້ອງການໃນດ້ານພັດທະນາຢ່າງບໍ່ຢຸດຢັ້ງ. ນອກຈາກນີ້, ຍັງຈະຊ່ວຍເພີ່ມພະລິດຕະພາບຂອງ ການຜະລິດ   ແລະ ເພີ່ມຂິດຄວາມສາມາດໃຫ້ກັບບຸກຄະລາກອນໃຫ້ເຮັດວຽກຢ່າງມືອາຊີບເຊັ່ນ:  ບັນດາພະນັກງານໃນບໍລິສັດ, ຜູ້ຈັດການ ແລະ ຜູ້ບໍລິຫານໃຫ້ມີຄວາມເຂົ້າໃຈຢ່າງເລີກເຊີ່ງ ຕໍ່ກັບການຈັດລະບົບຂອງການເຮັດວຽກ (5S organization), ການກວດກາຄຸນນະພາບຂອງການເຮັດວຽກ ແລະ ການຜະລິດ (Kaizen productivity) ເຊີ່ງບົດຮຽນດັ່ງກ່າວແມ່ນ ມີຄວາມສຳຄັນ ແລະ ຈຳເປັນທີ່ສຸດສຳລັບທຸລະກິດ ຂອງ ສປປ ລາວ ເພື່ອເຮັດແນວໃດໃຫ້ ທຸລະກິດຂອງລາວ ສາມາດແຂ່ງຂັນໄດ້ກັບພາກພື້ນ ແລະ ສາກົນ.