ໃນວັນທີ 23 ກັນຍາ 2021 ສະພາການຄ້າ ແລະ ອຸດສາຫະກຳແຫ່ງຊາດລາວ (ສອຄຊ) ໄດ້ຈັດສຳມະນາເຜີຍແຜ່ກ່ຽວກັບການສົ່ງອອກຜະລິດຕະພັນລາວໄປສູ່ຕ່າງປະເທດ ກໍ່ຄື ປະເທດໄທ ແລະ ປະເທດຫວຽດນາມ, ພາຍໃຕ້ໂຄງການສົ່ງເສີມຜະລິດຕະພັນຍີ່ຫໍ້ລາວ – ເພື່ອຊິວິດການເປັນຢູ່ທີ່ດີຂຶ້ນ ໂດຍໄດ້ຮັບການສະໜັບສະໜູນຈາກອົງການສະຫະປະຊາຊາດເພື່ອການພັດທະນາ.

ຈຸດປະສົງຫຼັກໃນການສຳມະນາເຜີຍແຜ່ໃນຄັ້ງນີ້ ແມ່ນເພື່ອສ້າງຄວາມຮັບຮູ້ ແລະ ຄວາມເຂົ້າໃຈກ່ຽວກັບຂັ້ນຕອນທີ່ຕິດພັນກັບກົດໝາຍ ແລະ ລະບຽບຂໍ້ກຳນົດການສົ່ງອອກຜະລິດຕະພັນກະສິກຳໃຫ້ກັບຜູ້ປະກອບການ, ພະນັກງານສະພາການຄ້າທີ່ຢູ່ພະແນກຜະລິດຕະພັນລາວ ແລະ ວາງສະແດງ ເພື່ອໃຫ້ມີຄວາມຮູ້ເລິກເຊິງໃນການບໍລິການໃຫ້ຄຳປຶກສາ ແລະ ແນະນຳເພື່ອກຽມຄວາມພ້ອມໃຫ້ຜູ້ປະກອບການໃຫມ່ ຫຼື ຊາວໜຸ່ມໂດຍສະເພາະແມ່ນຜູ້ທີ່ເຂົ້າຮ່ວມແຂ່ງຂັນນະວັດຕະກຳຊາວໜຸ່ມ ທີ່ມີຄວາມຕ້ອງການຢາກສຶກສາເພີ່ມເຕີມ ແລະ ຜັນຂະຫຍາຍໄປປັບໃຊ້ໃນທຸລະກິດຂອງຕົນໄດ້. ນອກຈາກນີ້, ການສຳມະນາຍັງເປັນການເປີດເວທີການສົນທະນາໃຫ້ກັບຜູ້ເຂົ້າຮ່ວມໄດ້ປຶກສາຫາລື ແລະ ແລກປ່ຽນບົດຮຽນ, ຂໍ້ສະດວກຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆໃນການສົ່ງອອກ.

ສໍາລັບຜູ້ປະກອບການທີ່ມີປະສົບການໃນການສົ່ງອອກມາແລ້ວກໍ່ຍັງໄດ້ມາແລກປ່ຽນເຮັດແນວໃດ ເພື່ອປັບປຸງຂອດຂັ້ນການສົ່ງອອກ ແລະ ການປັບປຸງຄຸນນະພາບຂອງຜະລິດຕະພັນໃຫ້ໄດ້ມາດຕະຖານສາກົນ ເພື່ອກຽມສົ່ງອອກຜະລິດຕະພັນດັ່ງກ່າວສູ່ຕະຫຼາດພາຍໃນກໍ່ຄືຕະຫຼາດຕ່າງປະເທດ ເພາະນີ້ເປັນການຍົກລະດັບ ແລະ ປັບປຸງຊິວິດການເປັນຢູ່ຂອງປະຊາຊົນໃຫ້ດີຂຶ້ນໂດຍສະເພາະແມເພື່ອປະກອບສ່ວນເຂົ້າໃນແຜນພັດທະນາເສດຖະກິດ-ສັງຄົມອີກດ້ວຍ.