ທ່ານ ອຸເດດ ສຸວັນນະວົງ ປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ພ້ອມດ້ວຍຄະນະ ເຂົ້າຮ່ວມກອງປະຊຸມພົບປະລະຫວ່າງ ຄະນະຊ່ວຍວຽກນາຍົກລັດຖະມົນຕີ

ນໍາໂດຍ ທ່ານ ຈັນທະບູນ ລັດຕະນະວົງ ຫົວຫນ້າຄະນະຜູ້ຊ່ວຍວຽກ ນາຍົກລັດຖະມົນຕີ ແລະ ຄະນະຊ່ຽວຊານຍີ່ບຸ່ນ ນໍາໂດຍ ທ່ານ Kobayashi Kenichi ເອກອັກຄະລັດຖະທູດ ຍີ່ປຸ່ນ ປະຈໍາ ສປປ ລາວ ພາຍໃຕ້ຫົວຂໍ້ “ ການພັດທະນາກະສິກໍາສະອາດ ໃນ ສປປ ລາວ ”  ໃນວັນທີ 24 ມິຖຸນາ 2022 ທີ່ ຫ້ອງການ ສໍານັກງານນາຍົກລັດຖະມົນຕີ

ພາຍໃນກອງປະຊຸມໄດ້ມີການລາຍງານສະພາບ ໂຄງການ ພັດທະນາກະສິກຳສະອາດ ໂດຍສັງເຂບ ແລະ ໄດ້ປືກສາຫາລືກັນຢ່າງກົງໄປກົງມາໂດຍສະເພາະແມ່ນເນັ້ນໃສ່ບັນຫາການພັດທະນາດັ່ງລຸ່ມນີ້:

• ການພັດທະນາຄວາມອາດສາມາດຜູ້ຜະລິດ
• ການພັດທະນາການຕະຫລາດ
• ການພັດທະນາພື້ນຖານໂຄງລ່າງ ແລະ ເຕັກໂນໂລຊີ
• ການເພີ່ມທະວີການຮ່ວມມືທັງພາກລັດ, ພາກເອກະຊົນ ແລະ ພາກສ່ວນຕ່າງໆທີ່ກ່ຽວຂ້ອງ

ໃນນັ້ນ ຄະນະພັດທະນາທຸລະກິດກະສິກຳ ປະຈໍາ ສຄອຊ ໄດ້ສະເຫນີໃຫ້ອົງການພັດທະນາຂອງຍີ່ປຸ່ນ ໃຫ້ການສະຫນັບສະຫນູນເພີ່ມເຕີມ ທາງດ້ານ ເຕັກໂນໂລຊີ, ການເຂົ້າຫາຕະຫລາດ ແລະ ອື່ນໆ ໂດຍອາດຮ່ວມມືກັນກັບພາກທຸລະກິດໂດຍກົງ ເພື່ອຮ່ວມກັນຊອກວິທີທາງທີ່ມີປະສິດທິຜົນສູງສຸດໃຫ້ແກ່ການພັດທະນາກະສິກໍາສະອາດ ໃນ ສປປ ລາວ.