ໃນວັນທີ 1 ກໍລະກົດ 2022, ທີ່ ສະພາການຄ້າ ແລະ ອຸດສາຫະກຳແຫ່ງຊາດລາວ(ສຄອຊ), ໄດ້ມີ ກອງປະຊຸມປຶກສາຫາລືກັບ ພາກທຸລະກິດ ໃນຂະແໜງການບໍລິການທາງດ້ານການເງິນ ພາຍໃຕ້ກົນໄກກອງປະຊຸມທຸລະກິດລາວ ຫຼື Lao Business Forum ໂດຍການເປັນປະທານຂອງ ທ່ານ ນາງ ສຸພາພອນ ຄຳແສນນາມ ຮອງເລຂາທິການ ສຄອຊ, ທ່ານ Sheng Lee ຕາງໜ້າສະພາການຄ້າອົດສະຕາລີ ປະຈຳລາວ

ຈຸດປະສົງຫຼັກ ຂອງກອງປະຊຸມ ແມ່ນ ເພື່ອປຶກສາຫາລືແບບວິຊາການ ຕໍ່ກັບປັດໃຈທີ່ເປັນສິ່ງກີດຂວາງຫຼັກ ໃນການດໍາເນີນທຸລະກິດ ຂອງຂະແໜງການ ບໍລິການທາງດ້ານການເງິນ ບໍ່ວ່າຈະເປັນ ທະນາຄານທຸລະກິດ, ສະຖາບັນການເງິນຈຸນລະພາກ, ບໍລິສັດປະກັນໄພ ແລະ ບໍລິສັດເຊົ່າສິນເຊື່ອ, ເພື່ອກະກຽມຈັດກອງປະຊຸມປຶກສາຫາລືແບບວິຊາການ ກັບຂະແໜງການທີ່ກ່ຽວຂ້ອງຂອງພາກລັດ ໃນລະຫວ່າງເດືອນ ກໍລະກົດ ຫາ ເດືອນ ກັນຍາ 2022, ແລະ ຄາດວ່າຈະໄດ້ຈັດກອງປະຊຸມທຸລະກິດລາວ ໃນເດືອນ ຕຸລາ 2022 ນີ້.

ໃນໄລຍະຜ່ານມາ ພາກລັດຖະບານ ກໍ່ໄດ້ມີຄວາມພະຍາຍາມ ໃນການປັບປຸງນິຕິກຳ, ກົນໄກ, ລະບຽບ ແລະ ແບບແຜນວິທີເຮັດວຽກ ເພື່ອເອື້ອອຳນວຍຄວາມສະດວກໃຫ້ແກ່ພາກທຸລະກິດ, ເຊິ່ງທັງນີ້ທັງນັ້ນ ການແກ້ໄຂບັນຫາ ກໍ່ອາດມີຄວາມຊັບຊ້ອນ ແລະ ໃຊ້ເວລາດົນ, ບາງບັນຫາ ກໍ່ສາມາດແກ້ໄຂໄດ້ ແລະ ບາງບັນຫາ ກໍ່ອາດມີຄວາມທ້າທາຍພໍສົມຄວນ.