ກອງປະຊຸມລະດັບສູງ ເພື່ອທົບທວນ ຄືນຜົນການຈັດຕັ້ງປະຕິບັດວຽກສິດທິເດັກ ແລະ ປະກອບຄຳຄິດເຫັນ ຕໍ່ຮ່າງບົດລາຍງານ ປະຈຳໄລຍະທີ 7 ການຈັດຕັ້ງປະຕິບັດສົນທິສັນຍາ ວ່າດ້ວຍສິດທິເດັກ ໃນວັນທີ 18 ພະຈິກ 2022, ທີ່ຫໍປະຊຸມ ແຫ່ງຊາດຫຼັກ 6.

ທ່ານ ປອ. ໄຊບັນດິດ ຣາຊະພົນ, ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ໄດ້ເຂົ້າຮ່ວມກອງປະຊຸມລະດັບສູງ ເພື່ອທົບທວນ ຄືນຜັນການຈັດຕັ້ງປະຕິບັດວຽກສິດທິເດັກ ແລະ ປະກອບຄຳຄິດເຫັນ ຕໍ່ຮ່າງບົດລາຍງານ ປະຈຳໄລຍະທີ 7 ການຈັດຕັ້ງປະຕິບັດສົນທິສັນຍາ ວ່າດ້ວຍສິດທິເດັກ ພາຍໃຕ້ການເປັນປະທານ ຂອງ ທ່ານ ນາງ ອິນລາວັນ ແກ້ວບຸນພັນ, ປະທານສູນກາງສະຫະພັນແມ່ຍິງລາວ, ຮອງປະທານ ຜູ້ປະຈຳການ ຄຊກມດ, ທ່ານ ນາງ ປອ. ເພຍ ເຣເບນໂລ ບຣິໂຕ, ຜູ້ຕາງໜ້າອົງການຢູນິເຊັບ ປະຈຳ ສປປ ລາວ ພ້ອມດ້ວຍແຂກທີ່ກ່ຽວຂ້ອງ ຈາກແຕ່ລະແຂວງ, ນັກຮຽນຕົວແທນເດັກຂອງ ສປປ ລາວ ເຂົ້າຮ່ວມ

ຈຸດປະສົງຂອງກອງປະຊຸມແມ່ນເພື່ອ ນຳສະເໜີຜົນການຈັດຕັ້ງປະຕິບັດຄວາມໝາຍໝັ້ນຂອງແຕ່ລະພາກສ່ວນ ທີ່ໄດ້ໃຫ້ຄວາມໝາຍໝັ້ນ ເພື່ອຫຼຸດຜ່ອນຄວາມທຸກຍາກຂອງເດັກ ປະຈຳປີ 2021-2022 ແລະ ນໍາສະເໜີແຜນການຂອງປີ 2023 ຂອງ ບັນດາແຂວງຕ່າງໆໃນ ສປປ ລາວ, ຈາກພາກສ່ວນເອກະຊົນ ແລະ ຈາກອົງການຈັດຕັ້ງທີ່ບໍ່ສັງກັດລົດຖະບານ ເພື່ອຫຼຸດຜ່ອນຄວາມທຸກຍາກຂອງເດັກ ແລະ ພາຍໃນກອງປະຊຸມດັ່ງກ່າວຍັງໄດ້ ມີການນຳສະເໜີ ຈາກຕົວແທນຂອງເດັກໃນການປະຕິບັດ ຊ່ວງໄລຍະການແຜ່ລະບາດຂອງພະຍາດໂຄວິດ19.