ໃນລະຫວ່າງວັນທີ 3-4 ກັນຍາ 2023 ທີ່ ເມືອງຫຼວງ ຈາກາຕ້າ, ປະເທດອິນໂດເນເຊຍ, ສະພາການຄ້າ ແລະ ອຸດສາຫະກຳ ແຫ່ງຊາດລາວ ໃນນາມ ສະພາທີ່ປຶກສາທຸລະກິດອາຊຽນລາວ (ASEAN Business Advisory Council Laos-ASEAN BAC Laos),

ນຳໂດຍ ທ່ານ ອຸເດດ ສຸວັນນະວົງ, ປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ທ່ານ ທະນົງສິນ ກັນລະຍາ, ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ພ້ອມດ້ວຍຄະນະທຸລະກິດລາວ, ກອງເລຂາສະພາທີ່ປຶກສາທຸລະກິດອາຊຽນລາວ ຈຳນວນ 9 ທ່ານ ເຂົ້າຮ່ວມກອງປະຊຸມສຸດຍອດທຸລະກິດ ແລະ ການລົງທຶນອາຊຽນ (ASEAN Business and Investment Summit-ABIS) ປະຈໍາປີ 2023 ຈັດໂດຍສະພາທີ່ປຶກສາທຸລະກິດອາຊຽນ ຫລື ASEAN-BAC Indonesia ພາຍໃຕ້ຄໍາຂວັນ “ຄວາມເປັນແກນກາງຂອງອາຊຽນ: ການສ້າງນະວັດຕະກໍາ ເພື່ອກ້າວໄປສູ່ຄວາມເຂັ້ມແຂງຮອບດ້ານ”. ທີ່ໄດ້ຈັດຂື້ນໃນລະຫວ່າງວັນທີ 3-4 ກັນຍາ 2023, ໂດຍຈັດຂື້ນຄຽງຄູ່ກັບກອງປະຊຸມສຸດຍອດຜູ້ນຳອາຊຽນ ຄັ້ງທີ 43 (The 43rd ASEAN Leader Summit) ທີ່ ຈະໄດ້ຈັດຂື້ນໃນລະຫວ່າງວັນທີ 5-7 ກັນຍາ 2023, ທີ່ ຈາກາຕ້າ, ປະເທດອິນໂດເນເຊຍ. ເຊິ່ງໄດ້ຈັດຂື້ນໃນທຸກໆປີໝູນວຽນຕາມການເປັນປະທານອາຊຽນ, ເຊິ່ງພາຍໃນງານມີບັນດາຜູ້ນຳອາຊຽນ, ບັນດາປະເທດຄູ່ຮ່ວມມືພາຍນອກ (ASEAN plus), ຕາງໜ້າພາກລັດ, ຄະນະຜູ້ບໍລິຫານທີ່ປຶກສາທຸລະກິດອາຊຽນ, ຕົວແທນພາກທຸລະກິດຂອງແຕ່ລະປະເທດສະມາຊິກ ແລະ ບັນດາຄູ່ຮ່ວມທຸລະກິດຕ່າງໆໃນພາກພື້ນເຂົ້າຮ່ວມ.

ໃນກອງປະຊຸມ ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີແຫ່ງ ສປປ ລາວ ກໍໄດ້ເຂົ້າຮ່ວມງານ ແລະ ຂື້ນກ່າວປະກອບຄຳເຫັນຕໍ່ກອງປະຊຸມໃນຫົວຂໍ້: “ສ້າງເສັ້ນທາງໃຫ້ກ້າວໄປຂ້າງໜ້າ, ສະທ້ອນຄວາມເປັນຈິງຂອງການເປັນປະທານອາຊຽນ” ເຊິ່ງທ່ານນາຍົກໄດ້ເນັ້ນເຖິງກາລະໂອກາດ ແລະ ສິ່ງທ້າທາຍ ໂດຍສະເພາະການເຊື່ອມໂຍງທາງດ້ານເສດຖະກິດໃນພາກພື້ນ ທີ່ຮຽກຮ້ອງໃຫ້ອາຊຽນ ຕ້ອງໄດ້ຮ່ວມມືກັນສ້າງຄວາມກົມກຽວ ແລະ ຍຶດໝັ້ນຄວາມເປັນແກນກາງຂອງອາຊຽນ. ທັງນີ້ກໍເພື່ອເປັນການສົ່ງເສີມບົດບາດອາຊຽນ ທີ່ ເປັນຜູ້ນຳພາໃຫ້ເຂັ້ມແຂງ ໃນການຮ່ວມມືດ້ານການເມືອງ, ເສດຖະກິດ, ສັງຄົມ, ການປົກປັກຮັກສາສິ່ງແວດລ້ອມ ແລະ ການພັດທະນາແບບຍືນຍົງກັບບັນດາຄູ່ຮ່ວມມືຕ່າງໆ.