ທ່ານ ປະລິນຍາເອກ ໄຊບັນດິດ ຣາຊະພົນ,

ຮອງປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ ໃຫ້ກຽດເປັນປະທານຮ່ວມ ໃນກອງປະຊຸມ ສະໄໝສາມັນຂອງສະພາທີ່ປຶກສາອາຊີວະສຶກສາ ຄັ້ງທີ X, ຮ່ວມກັບ ທ່ານ ຮອງສາດສະດາຈານ ປະລິນຍາເອກ ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະ ກິລາ, ແລະ ທ່ານ ພົງໄຊສັກ ອິນຖາລາດ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ໄດ້ຮັບກຽດຮ່ວມກອງປະຊຸມຕາງໜ້າ ຈາກກຸ່ມ, ສະມາຄົມທຸລະກິດ, ອົງການຈັດຕັ້ງສາກົນ ແລະ ຄູ່ຮ່ວມພັດທະນາອື່ນໆ ລວມທັງໝົດ 55 ທ່ານ, ເພດຍິງ 28 ທ່ານ.

ຈຸດປະສົງຂອງກອງປະຊຸມ ແມ່ນໄດ້ຜ່ານບົດສະຫຼຸບ ແລະ ແຜນການຂອງສະພາທີ່ປຶກສາອາຊີວະສຶກສາແຫ່ງຊາດ ເລີ່ມແຕ່ປີ 2019 ເຖິງປັດຈຸບັນ ໃນກອງປະຊຸມຍັງໄດ້ຮັບຟັງການນຳສະເໜີ ແລະ ປຶກສາຫາລືກ່ຽວກັບນິຕິກຳ ກອງທຶນພັດທະນາອາຊີວະສຶກສາ, ຂໍ້ຕົກລົງແຕ່ງຕັ້ງຄະນະສະພາບໍລິຫານກອງທຶນພັດທະນາອາຊີວະສຶກສາ, ຮ່າງຂໍ້ຕົກລົງວ່າດ້ວຍການຄຸ້ມຄອງການເງິນ ແລະ ການນຳໃຊ້ກອງທຶນພັດທະນາອາຊີວະສຶກສາ.

ກອງປະຊຸມດັ່ງກ່າວຍັງໄດ້ຮັບຟັງຄຳຄິດເຫັນ ແລະ ຂໍ້ສະເໜີທີ່ເປັນປະໂຫຍດຫຼາຍ ຕໍ່ກັບການສ້າງນິຕິກຳ ແລະ ຄູ່ມືການນຳໃຊ້ໃນການຈັດຕັ້ງປະຕິບັດກອງທຶນພັດທະນາອາຊີວະສຶກສາເພື່ອໃຫ້ໄດ້ຮັບໝາກຜົນທີ່ດີ ແລະ ການກຳນົດຂອບເຂດການນຳໃຊ້ກອງທຶນ ແລະ ກຸ່ມເປົ້າໝາຍຢ່າງຊັດເຈນ.