ທ່ານ ປອ. ໄຊບັນດິດ ຣາຊະພົນ, ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ສຄອຊ ໄດ້ເຂົ້າຮ່ວມເປັນປະທານເປີດກອງປະຊຸມ ວິຊາການ ລະຫ່ວາງ EU ແລະ ພາກທຸລະກິດ ຂອງ ສປປ ລາວ ກ່ຽວກັບ ລະບຽບການ ວ່າດ້ວຍ ສິນຄ້າທີ່ປາສະຈາກການທຳລາຍປ່າໄມ້ (EUDR) ຂະແໜງການທຸລະກິດລ້ຽງງົວ, ໂດຍມີ ທ່ານ ນາງ Ms. Cecile Leroy ອະນຸເລຂາ ສະຫະພາບເອີຣົບ ປະຈໍາຢູ່ ສປປ ລາວ ເປັນປະທານຮ່ວມ ແລະ ມີບັນດາ ທ່ານ ປະທານ, ຮອງປະທານ ສະພາການຄ້າ ແລະ ອຸດສາຫະກຳ ແຂວງ, ຄະນະບໍລິຫານ ສຄອ ແຂວງ, ສູນກາງກຳມະບານລາວ, ກົມກວດກາປ່າໄມ້, ພະແນກ ອຸດສາຫະກຳ ແລະ ການຄ້າ ແຂວງ, ພະແນກ ກະສິກຳ ແລະ ປ່າໄມ້, ໂຮງຮຽນເຕັກນິກວິຊາຊີບ, ພາກວິຊາການລ້ຽງສັດ, ມຊ, ສູນສືກສາການຄົ້ນຄວ້າ NAFRI, ຕາງໜ້າຈາກ ຂະແໜງການທຸລະກິດ, ສະມາຄົມຜູ້ລ້ຽງງົວ, ກຸ່ມທຸລະກິດ ຂະແໜງຟາມ ຈາກສູນກາງ ແລະ ແຂວງ ເຂົ້າຮ່ວມ

ຈຸດປະສົງຂອງກອງປະຊຸມແມ່ນເພື່ອເຜີຍແຜ່ ລະບຽບການ ວ່າດ້ວຍ ສິນຄ້າທີ່ປາສະຈາກການທຳລາຍປ່າໄມ້ EUDR ຂອງສະຫະພາບເອີຣົບ ໄດ້ວາງຂໍ້ກຳນົດ ຕໍ່ບັນດາບໍລິສັດ. ລະບຽບການ ນີ້ໄດ້ຮຽກຮ້ອງໃຫ້ ບັນດາບໍລິສັດ ທີ່ຈຳໜ່າຍ ຜະລິດຕະພັນໃນຕະຫຼາດ EU, ຄ້າຂາຍສິນຄ້າ ຢູ່ໃນ EU ຫຼື ສົ່ງອອກ ສິນຄ້າຈາກ EU ແມ່ນຕ້ອງໄດ້ດໍາເນີນການປະເມີນ ຄວາມຖືກຕ້ອງຂອງສິນຄ້າ ເຊິ່ງຈະບໍ່ມີຂໍ້ບັງຄັບ ສຳລັບລັດຖະບານ ຫຼື ຜູ້ຜະລິດສິນຄ້າ ໃນການປະເມີນຄວາມຖືກຕ້ອງຂອງສິນຄ້າເຫຼົ່ານີ້ ພາຍໃຕ້ລະບຽບການນີ້ຜູ້ຜະລິດສິນຄ້າ ທີ່ຢູ່ນອກອານາເຂດຂອງ EU ແມ່ນບໍ່ມີພັນທະໃນການດໍາເນີນການປະເມີນ ຄວາມຖືກຕ້ອງຂອງສິນຄ້າ.

ການສ້າງຈິດສຳນຶກ ແລະ ການສ້າງຄວາມເຂົ້າໃຈ ກ່ຽວກັບ “EUDR ”ຈະກໍ່ໃຫ້ເກີດ ຜົນປະໂຫຍດ ແລະ ທ່າແຮງໃຫ້ຂະແໜງການທຸລະກິດລ້ຽງງົວ ຂອງ ສປປ ລາວ ໂຄງການ “ເຜີຍແຜ່ EUDR ”ໃນ ສປປ ລາວ ມີສາມອົງປະກອບຄື:

1. ການດໍາເນີນ ການສຶກສາ ຜົນສະທ້ອນ ຂອງ EUDR ຕໍ່ ສປປ ລາວ ແລະ ຄວາມກຽມພ້ອມ ຂອງ ສປປ ລາວ ໃນການຈັດຕັ້ງປະຕິບັດ ລະບຽບການໃໝ່ ຂອງ EU.

2.ການຈັດກອງປະຊຸມ ລະດັບສູງກັບລັດຖະບານ ແລະ ກອງປະຊຸມວິຊາການກັບພາກທຸລະກິດ ເພື່ອເຜີຍແຜ່ ແລະ ປຶກສາຫາລື ກ່ຽວກັບ EUDR.

3.ການເຜີຍແຜ່ ຂໍ້ມູນ ຂອງ EUDR ໃຫ້ພາກສ່ວນກ່ຽວຂ້ອງໂດຍສະເພາະແມ່ນຂະແໜງທຸລະກິດ ເປັນສ່ວນໜຶ່ງຂອງສະໜັບສະໜູນ ຂອງ EU ເພື່ອປູກຈິດສໍານຶກ ແລະ ສ້າງຄວາມເຂົ້າໃຈກ່ຽວກັບ EUDR ແລະ ເພື່ອສົ່ງເສີມ ສິນຄ້າທີ່ປາສະຈາກການທຳລາຍປ່າໄມ້ ທີ່ມີຄຸນຄ່າໃຫ້ພາກສ່ວນທີ່ກ່ຽວຂ້ອງກັບທຸລະກິດຂະແໜງການລ້ຽງງົວ.