ທ່ານ ວິບູນ ສິດທິມໍລະດາ ຄະນະບໍລິຫານງານ ສຄອຊ ພ້ອມດ້ວຍຄະນະ ເຂົ້າຮ່ວມກອງປະຊຸມສຳມະນາຫົວຂໍ້: “Bridging Cultures, Building Bridges: Malaysian Diaspora and Business in Laos”

ໃນວັນທີ 12 ພະຈິກ 2024 ທີ່ ໂຮງແຮມຄຣາວພາຊາ, ສຄອຊ ໄດ້ຮ່ວມກັບສະຖານທູດ ມາເລເຊຍ ປະຈໍາ ສປປ ລາວ ຈັດກອງປະຊຸມສຳມະນາ ຫົວຂໍ້: “Bridging Cultures, Building Bridges: Malaysian Diaspora and Business in Laos” ຂຶ້ນ ເປັນກຽດເຂົ້າຮ່ວມໂດຍ ທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງ ອຸດສາຫະກຳ ແລະ ການຄ້າ, ທ່ານ Liew Chin Tong ຮອງລັດຖະມົນຕີ ກະຊວງ ການລົງທຶນ, ການຄ້າແລະ ອຸດສາຫະກໍາ ປະເທດມາເລເຊຍ (ທາງອອນໄລ), ທ່ານ Edi Irwan Mahmud ເອກອັກຄະລັດຖະທູດມາເລເຊຍ ປະຈໍາ ສປປ ລາວ ແລະ ມີບັນດາຫົວໜ່ວຍທຸລະກິດ ລາວ, ມາເລເຊຍ ເຂົ້າຮ່ວມທັງຫ້ອງປະຊຸມ ແລະ ທາງໄກ ຫຼາຍກວ່າ 60 ທ່ານ. ຈຸດປະສົງຂອງກອງປະຊຸມສໍາມະນາ ນີ້ແມ່ນເພື່ອເປັນເວທີ ໃນການເປີດໂອກາດຮ່ວມມື ລະຫວ່າງ ທຸລະກິດມາເລເຊຍ ແລະ ສປປ ລາວ, ສົ່ງເສີມການແລກປ່ຽນ ແລະ ຄວາມເຂົ້າໃຈດ້ານວັດທະນະທຳ, ເພີ່ມທະວີສາຍພົວພັນລະຫວ່າງ 2 ປະເທດ ໃຫ້ນັບມື້ນັບເຂັ້ມແຂງ.

ໃນກອງປະຊຸມໄດ້ມີ ການນໍາສະເໜີພາບ​ລວມ​ຂອງ​ອຸດ​ສາ​ຫະ​ກໍາຮາລາ ຂອງ​ມາ​ເລ​ເຊຍ, ​ການປະຕິບັດຕາມມາດຕະຖານອຸດສາຫະກໍາ ແລະ ກົດລະບຽບ ຂອງ ອຸດສາຫະກໍາ ຮາລາ, ການຄຸ້ມຄອງການຢັ້ງຢືນ ຮາລາ ໃນປະເທດມາເລເຊຍ, ນໍາສະເໜີພາບລວມຂອງການລົງທຶນ ແລະ ໂອກາດທາງທຸລະກິດຂອງມາເລເຊຍໃນລາວ, ພາບລວມຂອງໂອກາດທາງທຸລະກິດ ແລະ ການລົງທຶນໃນ ສປປ ລາວ. ນອກຈາກນັ້ນ, ຍັງໄດ້ປຶກສາຫາລືກົນໄກການຮ່ວມມືທຸລະກິດລະຫວ່າງ 2 ປະເທດ ໃນຕໍ່ໜ້າ ໂດຍໃຫ້ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ສະພານັກທຸລະກິດມາເລເຊຍປະຈຳ ສປປ ລາວ ເປັນຈຸດໃຈກາງໃນການປະສານງານຈັດຕັ້ງປະຕິບັດໃນອະນາຄົດ.