ໃນທີ່ປະຊຸມໄດ້ມີການລາຍງານສະພາບການເຄື່ອນໄຫວວຽກງານຂອງ ສະມາຄົມ ມີການນໍາສະເໜີກ່ຽວກັບນະໂຍບາຍສົ່ງເສີມການນໍາເຂົ້າຍານພາຫະນະ ແລະ ທິດທາງກໍານົດມາດຕະຖານເຕັກນິກຍານພາຫະນະ ທີ່ຈະນໍາເຂົ້າ, ຜະລິດ, ປະກອບ ແລະ ການຄຸ້ມຄອງຍານພາຫະນະທາງບົກ ພ້ອມທັງທິດທາງ ແລະ ແຜນການໃນການເກັບພາສີການນໍາເຂົ້າຍານພາຫະນະທາງບົກ.

ທ່ານ ປອ ໄຊບັນດິດ ຣາຊະພົນ ໄດ້ສະແດງຄວາມຊົມເຊີຍຕໍ່ຄະນະບໍລິຫານງານ ຂອງ ສະມາຄົມອຸດສາຫະກໍາຍານພາຫະນະ ທີ່ໄດ້ສໍາເລັດກອງປະຊຸມປະຈໍາປີ2025 ເຊິ່ງຄັ້ງນີ້ເປັນຄັ້ງທີ່ 3 ແລະ ສາມາດຮວບຮ່ວມສະມາຊິກ ທີ່ດໍາເນີນທຸລະກິດ ທາງດ້ານຍານພາຫະນະໄດ້ຫລາຍພາກສ່ວນໃນຂອບເຂດທົ່ວປະເທດເຊິ່ງສະທ້ອນໃຫ້ເຫັນຄວາມສາມັກຄີ ແລະ ການມີສ່ວນຮ່ວມພ້ອມກັນພັດທະນາ ໂດຍສະເພາະການຮ່ວມກັນປຶກສາຫາລືແກ້ໄຂບັນຫາໃນຂະແໜງການຂອງຕົນແບບເປັນໝູ່ຄະນະ ແລະ ຍັງເນັ້ນໃຫ້ເຫັນ ກອງປະຊຸມໃນຄັ້ງນີ້ແມ່ນເວທີ ທີ່ສໍາຄັນທີ່ສຸດຂອງຂະແໜງຍານພາຫະນະລາວ ໃນການສົນທະນາ ແລະ ສັງລວມບັນຫາທີ່ກ່ຽວຂ້ອງເພື່ອຊອກຫາທາງແກ້ໄຂ ແລະ ເພື່ອສະເໜີໃຫ້ແກ່ພາກລັດຖະບານໄດ້ຮັບຮູ້ ແລະ ພິຈາລະນາແກ້ໄຂບັນຫາໃຫ້ຖືກຈຸດ ແລະ ໃຫ້ທິດຊີ້ນໍາຕ່າງໆ

ໃນວາລະສຸດທ້າຍກອງປະຊຸມໄດ້ຮັບກຽດຈາກ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະ ການຄ້າ ທີ່ໄດ້ໃຫ້ທິດຊີ້ນໍາແກ່ສະມາຄົມອຸດສາຫະກຳຍານພາຫະນະ ເຊິ່ງມີເນື້ອໃນຕົ້ນຕໍດັ່ງນີ້ :

1. ສະເໜີເບິ່ງຄືນພາລະບົດບາດກ່ຽວກັບການປົກປ້ອງຜົນປະໂຫຍດ, ການເຕົ້າໂຮມສະມາຊິກຂອງສະມາຄົມປະກອບສ່ວນສ້າງສະພາບແວດລ້ອມເພື່ອໃຫ້ມີການແຂ່ງຂັນທີ່ເປັນທຳ, ການປະຕິບັດກົດຫມາຍໃຫ້ຖືກຕ້ອງ ແລະ ໃຫ້ນະໂຍບາຍແກ່ຜູ້ປະຕິບັດກົດລະບຽບ.

2. ສະເໜີໃຫ້ຮ່ວມມືກັບພາກລັດ ກະຊວງອຸດສາຫະກຳ ແລະ ການຄ້າ, ກະຊວງການເງິນ, ກະຊວງໂຍທາທິການ ແລະ ຂົນສົ່ງ ໃນການສ້າງນະໂຍບາຍກົດໝາຍລະບຽບການ ໃຫ້ສະມາຄົມວ່າຈ້າງຊ່ຽວຊານຂຽນໃຫ້ ສະເໜີຫາພາກລັດທະບານ ກ່ຽວກັບບັນຫາ ແລະ ບົດຮຽນຂອງປະເທດອື່ນ, ຮ່າງດຳລັດ ຂໍ້ຕົກລົງນະໂຍບາຍ ການຄຸ້ມຄອງຍານພາຫະນະ ການຄຸ້ມຄອງອາໄຫຼ່.

3. ສະເໜີສ້າງມາດຕະຖານໃນການບໍລິການ ແລະ ປົກປ້ອງຜູ້ນຳໃຊ້

ເວົ້າລວມແລ້ວເພື່ອໃຫ້ບັນລຸວຽກງານດັ່ງກ່າວແມ່ນພາກລັດ ແລະ ພາກທຸລະກິດຕ້ອງຮ່ວມມືກັນ.

ກອງປະຊຸມໄດ້ປິດລົງໃນເວລາ 17:30ໂມງ ຂອງວັນດຽວກັນ