ຈຸດປະສົງຫຼັກຂອງກອງປະຊຸມຄັ້ງນີ້ ແມ່ນເພື່ອເປີດເວທີປຶກສາຫາລື ແລະ ລະດົມຄວາມຄິດ ຕໍ່ກັບ ການປັບປຸງ ສະພາການຄ້າ ແລະ ອຸດສາຫະກຳ ແຫ່ງຊາດລາວ ໃຫ້ມີບົດບາດໂດດເດັ່ນ ແລະ ມີຄວາມເຂັ້ມແຂງ ສາມາດຕອບສະໜອງຄວາມຕ້ອງການຂອງສັງຄົມໂດຍສະເພາະພາກທຸລະກິດ ແລະ ໃຫ້ສອດຄ່ອງ ຕາມນະໂຍບາຍຂອງ ພັກ ແລະ ລັດ, ໂດຍສະເພາະ ການປັບປຸງ ດຳລັດ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງ ສຄອຊ (ສະບັບເລກທີ 237/ນຍ, ລົງວັນທີ 18 ພຶດສະພາ 2020) ເພື່ອກຳນົດ ທີ່ ຕັ້ງ, ພາລະບົດບາດ, ສິດ, ໜ້າທີ່ ໃຫ້ຊັດເຈນ ເປັນທີ່ຮັບຮູ້ ແລະ ມີຄວາມເປັນເອກະພາບທັງພາກລັດ ແລະ ພາກທຸລະກິດ ຕໍ່ກັບ ສະພາການຄ້າ ແລະ ອຸດສາຫະກຳ ແຫ່ງຊາດລາວ ເພື່ອຮັບປະກັນໃຫ້ການຈັດຕັ້ງປະຕິບັດວຽການໃຫ້ປະສົບຜົນສຳເລັດຕາມເປົ້າໝາຍ ແລະມີຄວາມສອດຄ່ອງກັບແນວທາງນະໂຍບາຍການພັດທະນາເສດຖະກິດ-ສັງຄົມ ຂອງ ປະເທດຊາດ ໃນແຕ່ລະໄລະຍະ.

ພະນະທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ໄດ້ ໃຫ້ກຽດເປັນປະທານ ກ່າວເປີດກອງປະຊຸມ ແລະ ໄດ້ຍົກໃຫ້ເຫັນ ການປ່ຽນແປງຂອງ ສະພາບພາວະວິໃສ ທີ່ຮຽກຮ້ອງ ໃຫ້ມີການທົບທວນຄືນບົດບາດ ຂອງ ສະພາການຄ້າ ແລະ ອຸດສຫາະກໍາ ແຫ່ງຊາດລາວ ແລະ ມີຄວາມຈຳເປັນໃນການປັບປຸງ ສະພາການຄ້າ ແລະ ອຸດສາຫະກຳ ແຫ່ງຊາດລາວ ໂດຍສະເພາະ ການ ກຳນົດທີ່ຕັ້ງ ແລະ ພາລະບົດບາດ ຂອງ ສະພາການຄ້າ ແລະ ອຸດສາຫະກຳ ແຫ່ງຊາດລາວ ໃຫ້ເປັນທີ່ຍອມຮັບມີຄວາມເປັນເອກະພາບກັນ ທັງພາກລັດ ແລະ ພາກທຸລະກິດ, ເພື່ອເປັນກຳລັງແຮງໜື່ງທີ່ສຳຄັນຕໍ່ການຂັບເຄື່ອນ ຍຸດທະສາດ ແລະ ແຜນພັດທະນາເສດຖະກິດ ແລະ ສັງຄົມຂອງປະເທດຊາດ ໃນແຕ່ລະໄລຍະ.