ນະຄອນຫຼວງວຽງຈັນ, 18 ກຸມພາ 2026. ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ນຳໂດຍ ທ່ານ ບຸນເລີດ ຫຼວງປະເສີດ, ຮອງປະທານ ສຄອຊ ໄດ້ເຂົ້າພົບປະ ແລະ ອວຍພອນປີໃໝ່ ບໍລິສັດ

ລ້ານຊ້າງ ມີເນໂຣນສ໌ ຈຳກັດ ໃນນາມສະມາຊິກ ຜູ້ຊົງຄຸນວຸດທິ ສຄອຊ.

ການພົບປະຄັ້ງນີ້ ທ່ານ ຮອງປະທານ ສຄອຊ ໄດ້ຖືໂອກາດລາຍງານຄວາມຄືບໜ້າໃນການກະກຽມກອງປະຊຸມໃຫຍ່ຂອງ ສຄອຊ. ພ້ອມກັນນັ້ນ, ຍັງໄດ້ມີການປຶກສາຫາລື ແລະ ທາບທາມເຊີນເອົາບຸກຄະລາກອນທີ່ມີຄວາມຮູ້, ຄວາມສາມາດ ແລະ ວິໄສທັດ ເຂົ້າມາເປັນສ່ວນໜຶ່ງຂອງ ຄະນະບໍລິຫານງານຊຸດໃໝ່ ເພື່ອຮ່ວມກັນຂັບເຄື່ອນວຽກງານຂອງສະພາການຄ້າໃຫ້ມີປະສິດທິພາບຍິ່ງຂຶ້ນ.

ໃນໂອກາດດຽວກັນ, ທາງບໍລິສັດ ລ້ານຊ້າງ ມີເນໂຣນສ໌ ຈຳກັດ ຍັງໄດ້ລາຍງານເຖິງຜົນສຳເລັດຂອງການດຳເນີນທຸລະກິດ ແລະ ຍຸດທະສາດຂອງບໍລິສັດ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນການສ້າງສາ ແລະ ພັດທະນາເສດຖະກິດ-ສັງຄົມ ຂອງ ສປປ ລາວ ໃຫ້ມີການຂະຫຍາຍຕົວຢ່າງຕໍ່ເນື່ອງ.

ນັບຕັ້ງແຕ່ເລີ່ມດຳເນີນງານໃນປີ 2003 ເປັນຕົ້ນມາ, ບໍລິສັດ ລ້ານຊ້າງ ມີເນໂຣນສ໌ (LXML) ເຊໂປນ ສາມາດຜະລິດທອງແຜ່ນໄດ້ຫຼາຍກວ່າ 1.1 ລ້ານໂຕນ ແລະ ຄຳໄດ້ຫຼາຍກວ່າ 1.7 ລ້ານອອນຊ໌. ໃນປີ 2024, ບໍ່ຄຳ-ທອງ ເຊໂປນ ຜະລິດທອງໄດ້ 6,014 ໂຕນ ແລະ ຄຳ 5,427 ກິໂລກຣາມ. ສໍາລັບແຜນການຜະລິດໃນປີ 2025 ແມ່ນຄາດຄະເນໄວ້ວ່າຈະໃຫ້ໄດ້ຫຼາຍກວ່າ 5,703 ກິໂລກຣາມ ແລະ ທອງ 10,010 ໂຕນ. ຜ່ານມາ LXML ໄດ້ປະກອບສ່ວນໂດຍກົງເຂົ້າໃນງົບປະມານຂອງລັດຖະບານລາວ ເປັນມູນຄ່າຫຼາຍກວ່າ 1.7 ຕື້ໂດລາສະຫະລັດ ໃນຮູບແບບຂອງພາສີ-ອາກອນ, ຄ່າຊັບພະຍາກອນ (Royalties) ແລະ ເງິນປັນຜົນ. ນອກຈາກນັ້ນ, ຍັງມີຜົນປະໂຫຍດທາງອ້ອມຜ່ານການຈ້າງງານ, ການຝຶກອົບຮົມ, ການພັດທະນາຊຸມຊົນ ແລະ ທຸລະກິດທ້ອງຖິ່ນ ເຊິ່ງໄດ້ປະກອບສ່ວນຢ່າງຫຼວງຫຼາຍເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ.