ກອງປະຊຸມພົບປະເຈລະຈາທຸລະກິດ ການຄ້າ ແລະ ການລົງທຶນ ລາວ-ຈີນ

ໃນວັນທີ 26 ພະຈິກ 2019 ໄດ້ຈັດງານກອງປະຊຸມພົບປະເຈລະຈາທຸລະກິດ（Business Matching） ການຄ້າ ແລະ ການລົງທຶນ ລາວ-ຈີນ ທີ່ ໂຮງແຮມດອນຈັນພາແລດ ນະຄອນຫລວງວຽງຈັນ. ໂດຍການເປັນທານຂອງ ທ່ານ ນາງ ຈັນທະຈອນ ວົງໄຊ, ຮອງປະທານ ສຄອຊ ແລະ ທ່ານ ນາງ ເປົາ ເວິ້ນເທົ່າ, ຮອງປະທານ ສະພາສົ່ງເສີມການຄ້າສາກົນຈີນ ປະຈຳແຂວງ ຢຸໜານ.

ຈຸດປະສົງຂອງກອງປະຊຸມແມ່ນ ເພື່ອສ່ົງເສີ່ມການເຈລະຈາຮ່ວມທຸລະກິດຂອງສອງປະເທດລາວ-ຈີນ, ພ້ອມທັງເປີດໂອກາດໃຫ້ຜູ້ປະກອບການພາຍໃນ ແລະ ຕ່າງປະເທດທີ່ເຂົ້າຮ່ວມ ໄດ້ມີໂອກາດເຈລະຈາ ແລະ ຮ່ວມທຸລະກິດກັນຫຼາຍຂື້ນ ງານກອງປະຊຸມຄັ້ງນີ້ລວມມີຂະແໜງກະສິກຳ-ປູກຝັງ ແລະ ປ່າໄມ້(ດອກໄມ້,ຊາບູຮານ,ຢາງພາລາ), ການນຳເຂົ້າ ແລະ ສົ່ງອອກເຄື່ອງອຸປະກອນການກໍ່ສ້າງ, ອຸດສາຫະກຳຂຸດຄົ້ນແຮ່ເຫຼັກ-ເຫຼັກເສັ້ນ, ລະບົບບໍາບັດນໍ້າ, ອຸປະກອນເຄື່ອງມືເທັກໂນໂລຊີທີທັນສະໄໝ, ສະຖາບັນການສືກສາ, ຂົນສົ່ງ, ກໍ່ສ້າງ-ຂົວທາງ ແລະ ອື່ນໆ ນອກຈາກນັ້ນ, ກໍ່ເປັນໂອກາດໃນການພົບປະໂອລົມ ແລະ ແລກປຽນບົດຮຽນ ກັບນັກທຸລະກິດຂອງສອງປະເທດ ດ້ວຍກັນ ໂດຍສະເພາະ ແມ່ນຈາກ ສປ ຈີນ.

ອີງຕາມນະໂຍບາຍ ຂອງລັດຖະບານ 2 ປະເທດ ໃນການສ້າງທາງລົດໄຟຄວາມໄວສູງ ລາວ-ຈີນ ແລະ ໜື່ງແລວທາງ ໜື່ງເສັ້ນທາງ ໃນຊຸມປີຜ່ານມາການຂະຫຍາຍຕົວທາງດ້ານເສດຖະກິດການຄ້າ ລາວ ແລະ ຈີນ ມີການຂະຫຍາຍຕົວຢ່າງສູງສະເລ່ຍໃນແຕ່ລະປີ ສາມາດ ບັນລຸໄດ້ 6 ຕື້ ໂດລາ 800 ກ່າວໂຄງການ ແລະ ມີທ່າອ່ຽງເພີ່ມຂື້ນ. ປະຈຸບັນ ລັດຖະບານລາວ ໄດ້ເອົາໃຈໃສ່ປັບປຸງພັດທະນາໂຄງລ່າງພື້ນຖານ ແລະ ເພື່ອເຮັດໃຫ້ ສປປ ລາວ ປ່ຽນຈາກ Land lock ເປັນ Land link ນອກຈາກການສ້າງທາງລົດໄຟ ລາວ-ຈີນ ແລ້ວຍັງມີຄວາມຕ້ອງການປັບປຸງເສັ້ນທາງຕ່າງໆ ໂດຍສະເພາະເສັ້ນທາງຕາມແລວເສດຖະກິດເພື່ອອຳນວຍຄວາມສະດວກ ແລະ ເພີ່ມສະມັດຕະພາບ ໃນການຂົນສົ່ງແຕ່ພາກເໜືອເຖິງພາກໃຕ້ ແລະ ເຊື່ອມຕໍ່ກັບບັນດາປະເທດອ້ອມຂ້າງເຊັ່ນ: ຈີນ, ໄທ, ຫວຽດນາມ, ກຳປູເຈຍ ແລະ ອື່ນໆ ແຕ່ເນື່ອງຈາກວ່າລາວເອງຍັງມີທຶນຮອນທີ່ຈຳກັດໃນການລົງທຶນ ຈຶ່ງເຮັດໃຫ້ຍັງບໍ່ສາມາດພັດທະນາໄດ້ເຕັມທີ່ ສະນັ້ນການເຈລະຈາຮ່ວມທຸລະກິດຂອງສອງປະເທດລາວ-ຈີນ ຈຶ່ງເປັນບາດກ່າວໜື່ງທີ່ເຮັດໃຫ້ນັກທຸລະກິດຈາກ ສປ ຈີນ ຈະເຂົ້າມາດໍາເນີນການລົງທຶນ ແລະ ຊ່ວຍຊຸກຍູ້ການພັດທະນາຂອງ ສປປ ລາວ ໂດຍສະເພາະແມ່ນດຳເນີນ ການຮ່ວມມືກັບ ບໍລສັດ ພາຍໃນຂອງ ລາວ ເຊິ່ງອາດລົງທຶນໃນຮູບແບບ ຕ່າງໆຕາມການຕົກລົງກັນເພື່ອພ້ອມກັນພັດທະນາ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ. ນອກຈາກຂະແໜງການດັ່ງກ່າວ ສປປ ລາວ ຍັງມີທ່າແຮງໃນຂະແໜງການຕ່າງໆເຊັ່ນ: ທ່ອງທ່ຽວ, ພະລັງງານ, ກະສິກຳ, ອຸດສາຫະກຳ ແລະ ອື່ນໆ. ນອກຈາກນີ້ທ່ານຍັງສາມາດເລືອກລົງທຶນ ໃນ 12 ເຂດເສດຖະກິດພິເສດ ຂອງ ສປປ ລາວ ເຊັ່ນ: ເຂດເສດຖະກິດກວມລວມໄຊເສດຖາ, ເຂດເສດຖະກິດ ສະຫວັນປາກ ທີ່ ລົງທຶນໂດຍນັກທຸລະກິດ ຈີນ ຫລື ໃນເຂດຕ່າງໆ ເຊິ່ງການລົງທຶນໃນເຂດດັ່ງກ່າວທ່ານສາມາດໄດ້ຮັບນະໂຍບາຍພິເສດຢ່າງຫຼວງຫຼາຍ.

ທ່ານ ນາງ ຈັນທະຈອນ ວົງໄຊ ໄດ້ກ່າວຕໍ່ກອງປະຊຸມວ່າ: “ ຂ້າພະເຈົ້າຕີລາຄາສູງ ແລະ ເຊື່ອໝັ້ນວ່າບົນພື້ນຖານການຮ່ວມມື 1 ແລວທາງ 1 ເສັ້ນທາງ, ການກໍ່ສ້າງທາງລົດໄຟຄວາມໄວສູງ ລາວ-ຈີນ ແລະ ຄວາມພ້ອມພຽງກັນ ຂອງ ທຸລະກິດ ທັງສອງຝ່າຍ ກອງປະຊຸມໃນມື້ນີ້ຈະເປັນນິມິດໝາຍອັນດີໃຫ້ແກ່ການສົ່ງເສີມການຮ່ວມມືເສດຖະກິດ-ການຄ້າ ແລະ ການລົງທິນ ລະຫວ່າງ ລາວ-ຈີນ ໃຫ້ນັບມື້ນັບຂະຫຍາຍຕົວ ເລິກເຊິ່ງ ແລະ ມີປະສິດທິຜົນ ແລະ ຫວັງວ່າຜ່ານກອງປະຊຸມໃນມື້ນີ້ ຈະມີນັກລົງທຶນ ຈາກ ສປ ຈີນ ເຂົ້າມາສຶກສາຊອກຫາຊ່ອງທາງໃນການດຳເນີນທຸລະກິດ ແລະ ລົງທຶນ ໃນ ສປປ ລາວ ຫຼາຍຂື້ນ.”