ກອງປະຊຸມປຶກສາຫາລືພາກທຸລະກິດ ຂອງຂະແໜງການຜະລິດ

ກອງປະຊຸມປຶກສາຫາລືພາກທຸລະກິດ ຂອງຂະແໜງການຜະລິດ ໄດ້ຖືກຈັດຂຶ້ນໃນວັນທີ 4 ກຸມພາ 2020 ເວລາ 13:00 ຫາ 16:00 ໂມງ ທີ່ ສະພາການຄ້າ ແລະ ອຸດສາຫະກໍາ ແຫ່ງຊາດລາວ, ນະຄອນຫຼວງວຽງຈັນ ໂດຍການເປັນປະທານ ຂອງ ທ່ານ ວັນທອງ ສິດທິກຸນ, ຮອງປະທານສະພາການຄ້າ ແລະ ອຸດສາຫະກໍາ ແຫ່ງຊາດລາວ.

ຈຸດປະສົງຫຼັກຂອງກອງປະຊຸມຄັ້ງນີ້ ແມ່ນ ເພື່ອເປັນການລາຍງານຜົນຂອງກອງປະຊຸມທຸລະກິດລາວ ຄັ້ງທີ 12 ໃຫ້ແກ່ພາກທຸລະກິດ ແລະ ເປີດໂອກາດໃຫ້ບັັນດາຜູ້ປະກອບການຈາກຂະແໜງການຜະລິດ ລະດົມຄວາມຄິດ, ປຶກສາຫາລື ແລະ ສະເໜີບັນຫາທີ່ເປັນອຸປະສັກຕໍ່ການດໍາເນີນທຸລະກິດໃນຂະແໜງການຂອງຕົນ ແລະ ກຳນົດບັນຫາບູລິມະສິດຂອງຂະແໜງການ ເພື່ອໃຫ້ກອງເລຂາກອງປະຊຸມທຸລະກິດລາວອຳນວຍຄວາມສະດວກໃນການຄົ້ນຄວ້າກະກຽມບົດສະເໜີບັນຫາ ເພື່ອໃຫ້ພາກທຸລະກິດນຳໄປລາຍງານພາກລັດຖະບານ ພິຈາລະນາແກ້ໄຂ, ກະກຽມໃສ່ກອງປະຊຸມທຸລະກິດລາວ ຄັ້ງທີ 13.

ໃນນີ້ໄດ້ມີຜູ້ປະກອບການຈາກຂະແໜງການຜະລິດ ເຊັ່ນ: ໂຮງພິມ, ບໍລິສັດຕັດຍິບ, ບໍລິສັດຜະລິດຊີມັງ, ບໍລິສັດປຸງແຕ່ງໄມ້ ແລະ ບໍລິສັດປຸງແຕ່ງກະສິກຳ ລວມທັງກອງເລຂາຂອງກອງປະຊຸມທຸລະກິດລາວ ເຂົ້າຮ່ວມ ທັງໝົດເປັນຈໍານວນ 22 ທ່ານ. ໃນກອງປະຊຸມ ບັນຫາສ່ວນໃຫຍ່ທີ່ຜູ້ປະກອບການຈາກຂະແໜງການຜະລິດ ໄດ້ມີການປຶກສາຫາລື ແລະ ສະເໜີທີ່ກອງປະຊຸມປຶກສາຫາລື ພາກທຸລະກິດຂອງຂະແໜງການຜະລິດ ແມ່ນບັນຫາທີ່ຕິດພັນກັບຂັ້ນຕອນການແຈ້ງພາສີ-ອາກອນ ແລະ ນະໂຍບາຍພາສີ-ອາກອນເອງ, ລວມເຖິງ ການສ້າງຕັ້ງທຸລະກິດ ໂດຍສະເພາະແມ່ນການຂໍຈົດທະບຽນວິສາຫະກິດ, ການຂໍອະນຸຍາດສ້າງຕັ້ງໂຮງງານ ແລະ ການຂໍໃບອະນຸຍາດອື່ນໆ.

ຕາມຂະບວນການກົນໄກກອງປະຊຸມທຸລະກິດລາວ ກ່ອນທີ່ບັນຫາຈະຖືກຍົກສະເໜີໃຫ້ພາກລັດຖະບານພິຈາລະນາແກ້ໄຂ ແມ່ນ:

ບັນດາຜູ້ປະກອບການຈະ ປຶກສາຫາລື ແລະ ແລກປ່ຽນຄຳຄິດເຫັນ ທີ່ກອງປະຊຸມປຶກສາຫາລືພາກທຸລະກິດ ຕາມຂະແໜງການຂອງຕົນ ເພື່ອຄັດຈ້ອນເອົາບັນຫາບູລິມະສິດທີ່ເປັນອຸປະສັກຕໍ່ການດໍາເນີນທຸລະກິດໃນຂະແໜງການຂອງຕົນ ເພື່ອໃຫ້ກອງເລຂາກອງປະຊຸມທຸລະກິດລາວ ຄົ້ນຄວ້າ.
ພາຍຫຼັງການຄົ້ນຄວ້າດັ່ງກ່າວ, ພາກທຸລະກິດຈະ ນຳສະເໜີເອົາບັນຫາບູລິມະສິດ ທີ່ໄດ້ຜ່ານການຄົ້ນຄວ້າ ໃຫ້ພາກລັດພິຈາລະນາແກ້ໄຂ ທີ່ກອງປະຊຸມປຶກສາຫາລືລະຫວ່າງພາກລັດ ແລະ ພາກທຸລະກິດ ໂດຍການເປັນປະທານ ຂອງ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ແລະ ຮອງລັດຖະມົນຕີ/ຄະນະກົມ ຂັ້ນກະຊວງຂອງພາກສ່ວນທີ່ກ່ຽວຂ້ອງກັບບັນຫາ ກ່ອນຈະນຳຂຶ້ນສະເໜີຕໍ່ກອງປະຊຸມທຸລະກິດລາວ ໂດຍການເປັນປະທານຂອງທ່ານນາຍົກລັດຖະມົນຕີແຫ່ງ ສປປ ລາວ ເພື່ອຮັບຊາບ, ພິຈາລະນາແກ້ໄຂ ຫຼື ມີທິດຊີ້ນຳ.