ທ່ານ ອຸເດດ ສຸວັນນະວົງ ປະທານ ສະພາການຄ້າ ແລະ ອຸດສາຫະກໍາ ແຫ່ງຊາດລາວ (ສຄອຊ) ໄດ້ຕ້ອນຮັບ ແລະ ພົບປະກັບຄະນະ ສະພາການຄ້າຈີນ ປະຈໍາລາວ ນໍາໂດຍ ທ່ານ Huang yan de ປະທານ ສະພາການຄ້າຈີນ ປະຈຳ ສປປ ລາວ ທີ່ ຫ້ອງການ ສຄອຊ ໃນຕອນເຊົ້າຂອງວັນທີ 22 ມິຖຸນາ 2020.

ການພົບປະໃນຄັ້ງນີ້ແມ່ນໄດ້ມີການປືກສາຫາລືກ່ຽວກັບກົນໄກການປະສານງານເພື່ອເພິ່ມທະວີການພົວພັນ ແລະ ການຮ່ວມມືກັນລະຫວ່າງ ສອງສະພາການຄ້າ ໃຫ້ນັບມື້ແໜ້ນແຟ້ນ ແລະເລິກເຊິ່ງ ແນ່ໃສ່ສົ່ງເສີມການຮ່ວມມື ທຸລະກິດລາວ-ຈີນ ໃຫ້ນັບມື້ນັບຫຼາຍຂື້ນ, ມີປະສິດທິຜົນ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ, ປະກອບສ່ວນໃນການສ້າງສາ ແລະ ພັດທະນາປະເທດຊາດໃຫ້ຈະເລີນຮຸ່ງເຮືອງ. ພ້ອມດຽວກັນນັ້ນ ເພື່ອເຮັດໃຫ້ ສປປ ລາວ ໄດ້ຮັບຜົນປະໂຫຍດສູງສຸດ ກໍ່ໄດ້ລົງເລິກການປືກສາຫາລືຄວາມເປັນໄປໄດ້ໃນການສ້າງໂຄງການທີ່ປິ່ນອ້ອມທາງລົດໄຟຮ່ວມກັນລະຫວ່າງທຸລະກິດລາວ – ຈີນ, ເຊັ່ນ: ໂຄງການການທ່ອງທ່ຽວ, ກະສິກຳ, ອຸດສາຫະກຳການຜະລິດ ແລະ ອື່ນໆ