ໃນລະຫວ່າງ ວັນທີ 11 ຫາ 17 ກັນຍາ 2023 ທ່ານ ປະລິນຍາເອກ ໄຊບັນດິດ ຣາຊະພົນ ຮອງປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ, ແລະ ຫົວໜ້າສູນບໍລິການ ອາຊີວະສຶກສາແບບຄວບຄູ່, ພ້ອມດ້ວຍຄະນະກົມອາຊີວະສຶກສາ ຮ່ວມຕິດຕາມ ທ່ານ ຮອງສາດສະດາຈານ ປະລິນຍາເອກ ພຸດ ສິມມາລາວົງ ລັດຖະມົນຕີ ກະຊວງສຶກສາ ທິການ ແລະ ກິລາ ໃນນາມຫົວໜ້າຄະນະ ເດີນທາງທັດສະນະສຶກສາ ແລະ ຢ້ຽມຢາມສະຖານປະກອບການ, ສະຖານອາຊີວະສຶກສາ, ກຸ່ມ ສະມາຄົມທຸລະກິດ ແລະ ສະພາການຄ້າ ຂອງ ເມືອງຮຳບວກ, ສະຫະພັນ ເຢຍລະມັນ.

ຈຸດປະສົງຂອງການເດີນທາງຄັ້ງນີ້ແມ່ນເພື່ອແລກປ່ຽນບົດຮຽນ ການຈັດຕັ້ງປະຕິບັດການຮຽນ-ການສອນ ອາຊີວະສຶກສາຮູບແບບຄວບຄູ່, ການຮ່ວມມື ແລະ ພາລະບົດບາດ ຂອງອົງກອນທີ່ມີສ່ວນຮ່ວມ.

ສຳລັບການທັກສະນະສຶກສາ ໂດຍມີກຸ່ມເປົ້າໝາຍຢ້ຽມຢາມຄື ຂະແໜງການລົດຍົນ, ການບໍລິການ ໂຮງແຮມ-ຮ້ານອາຫານ, ຂະແໜງການຄ້າ, ອຸດສາຫະກຳ ການຜະລິດ (ຜະລິດຕະພັນບຳລຸງຜິວ). ນອກຈາກາກນຢ້ຽມຢາມພາກທຸລະກິດແລ້ວ. ຄະນະດັ່ງກ່າວຍັງມີໂອກາດພົບປະ ແລກປ່ຽນຂໍ້ມູນ ນຳກະຊວງການຮ່ວມມືເສດຖະກິດແລະການພັດທະນາ (BMZ), ທະນາຄານພັດທະນາເຢຍລະມັນ (KFW), ອົງການການຮ່ວມມືສາກົນເຢຍລະມັນ (GIZ) ແລະ ອົງກອນຄູ່ຮ່ວມພັດທະນາອື່ນໆ.