ສະພາການຄ້າ ແລະ ອຸດສາຫະກໍາແຫ່ງຊາດລາວ (ສຄອຊ) ໂດຍຮ່ວມກັບ ສະພາການຄ້າ ແລະ ອຸດສາຫະກຳ ແຂວງຫຼວງພະບາງ (ສຄອ.ຫຼບ) ໄດ້ສຳເລັດໃນການຈັດກອງປະຊຸມປຶກສາຫາລື ໜ່ວຍງານພາກທຸລະກິດທ່ອງທ່ຽວ ຂອງແຂວງຫຼວງພະບາງ ພາຍໄຕ້ກົນໄກກອງປະຊຸມທຸລະກິດລາວ (LBF), ໂດຍການເປັນປະທານຂອງ ທ່ານ ບຸນທ່ຽງ ສຸລິວັນ ປະທານສະພາການຄ້າ ແລະ ອຸດສາຫະກຳ ແຂວງຫຼວງພະບາງ. ນອກຈາກນີ້ ຍັງມີຜູ້ເຂົ້າຮ່ວມຕາງໜ້າຈາກສະມາຄົມ-ກຸ່ມທຸລະກິດແລະ ຫົວໜ່ວຍທຸລະກິດ ທີ່ຕິດພັນກັບຂະແໜງການທ່ອງທ່ຽວ ຈຳນວນ 25 ກ່ວາທ່ານ.

ຈຸດປະສົງຂອງກອງປະຊຸມຄັ້ງນີ້ແມ່ນເພື່ອ ເປັນການປຶກສາຫາລື, ແລກປ່ຽນຂໍ້ຄິດເຫັນ, ປະສົບການສິ່ງທ້າທ້າຍຕົວຈິງທີ່ຂະແໜງການພາຍໃນແຂວງພົບພໍ້ ເປັນຕົ້ນແມ່ນ ການຂໍ້ໃບອະນຸຍາດນຳເຂົ້ານັກທ່ອງທ່ຽວ, ການຄຸ້ມຄອງການບໍລິການຈັດສົ່ງ-ໂດຍສານ, ການຍົກເວັ້ນ ວີຊາ (VISA) ໃຫ້ກຸ່ມປະເທດເປົ້າໝາຍເພີ່ມຕື່ມ, ການຂາດແຄນແຮງງານທີ່ມີທັກສະ, ຍັງບໍ່ໂຮງໝໍທີ່ຮອງຮັບນັກທ້ອງທ່ຽວທີ່ໄດ້ມາດຕະຖານ, ບັນຫາປະກົດການຍໍ້ທໍ້ ຍາເສບຕິດ ແລະ ລັກຊັບ, ສ້າງຫຼັກສູດໄລຍະສັ້ນ ແລະ ການຢັ້ງຢືນໃຫ້ສີມືແຮງງານຂະແໜງຫັດຖະກຳ, ການຄວບຄຸ້ມນ້ຳໜັກລົດຂົນສົ່ງສິນຄ້າ ແລະ ອື່ນໆ

ກອງປະຊຸມດັ່ງກ່າວໄດ້ດຳເນີນໄປຢ່າງຝົດຟື້ນ, ມີລັກສະນະປຶກສາຫາລືທີ່ສ້າງສັນ ຍັງໄດ້ຍົກເອົາບັນຫາທີ່ເປັນບຸລິມະສິດຂື້ນພາຍໃນກຸ່ມດັ່ງກ່າວ, ບາດກ່າວຕໍ່ໄປ ກອງເລຂາຈະໄດ້ສັງລວມລາຍລະອຽດບັນຫາ ແລະ ຂໍ້ສະເໜີບຸລິມະສິດ ເພື່ອຄັດຈ້ອນເອົາບັນຫາສະເໜີໃຫ້ແກ່ພະແນກການທີ່ກ່ຽວຂ້ອງເພື່ອພິຈາລະນາ ແລະ ແນວທາງໃນການແກ້ໄຂບັນຫາ.

ກອງປະຊຸມຄັ້ງນີ້ໄດ້ຮັບການສະໜັບສະໜູນໂດຍ ອົງການ ແພລນສາກົນ ປະຈຳ ສປປ ລາວ ໂດຍຜ່ານໂຄງການ SUSTOUR LAOS.