ຊຸດຝຶກອົບຮົມຄັ້ງນີ້ໄດ້ດຳເນີນພາຍໃຕ້ການເປັນປະທານຮ່ວມຂອງ ທ່ານ ຂັນທອງ ດວງປະເສີດ ປະທານສະພາການຄ້າ ແລະ ອຸດສາຫະກໍາແຂວງວຽງຈັນ ແລະ ທ່ານ ໂພໄຊ ອິນທະບົວລີ ຮອງຫົວໜ້າພະແນກຄຸ້ມຄອງແຫຼ່ງກໍາເນີດສິນຄ້າ, ກົມການຄ້າຕ່າງປະເທດ, ກະຊວງອຸດສາຫະກຳ ແລະ ການຄ້າ ໂດຍມີຜູ້ເຂົ້າຮ່ວມທັງໝົດ ຈຳນວນ 08 ທ່ານ.

ຈຸດປະສົງຂອງການຝຶກອົບຮົມໃນຄັ້ງນີ້ແມ່ນ ເນັ້ນໜັກໃຫ້ເຈົ້າໜ້າທີ່ຫ້ອງການ ພະນັກງານປະຈໍາຫ້ອງການ ສະພາການຄ້າ ແລະ ອຸດສາຫະກຳ ແຂວງວຽງຈັນ ໄດ້ຮັບຮູ້ ແລະ ເຂົ້າໃຈ ກ່ຽວກັບ ລະບຽບແຫຼ່ງກຳເນີດສິນຄ້າພາຍໃຕ້ຂອບສັນຍາຕ່າງໆ, ໂດຍໄດ້ມີການເນັ້ນໃສ່ຈໍານວນ 06 ຊະນິດຟອມ ຄື: E, AANZ, AJ, AK, SPT ແລະ Co-Korea; ຂັ້ນຕອນການອອກ ແລະ ຄຸ້ມຄອງໃບຢັ້ງຢືນ ແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ ເພື່ອຮັບປະກັນວຽກງານດັ່ງກ່າວຈະຖືກນຳໄປປະຕິບັດໃຫ້ສອດຄ່ອງກັບລະບຽບການທີ່ມີຢູ່ຂອງ ສປປ ລາວ ແລະ ສອດຄ່ອງກັບລະບຽບການຂອງບັນດາປະເທດທີ່ໃຫ້ສິດທິພິເສດທາງການຄ້າແກ່ ສປປ ລາວ. ຊຶ່ງ ສະພາການຄ້າ ແລະ ອຸດສາຫະກຳ ແຂວງວຽງຈັນ ກໍ່ເປັນຫ້ອງການທີ່ໄດ້ຮັບມອບສິດເປັນຜູ້ອອກ ແລະ ຄຸ້ມຄອງໃບຢັ້ງຢືນແຫຼ່ງກຳເນີດສິນຄ້າທີ່ີໄດ້ຮັບສິດທິພິເສດ ເພື່ອອຳນວຍຄວາມສະດວກໃຫ້ແກ່ການສົ່ງອອກ ຂອງຜູ້ປະກອບການທີ່ດຳເນີນທຸລະກິດຢູ່ພາຍໃນ ແຂວງວຽງ ຈັນ ໂດຍສອດຄ່ອງກັບນະໂຍບາຍວຽກງານການອໍານວຍຄວາມສະດວກທາງດ້ານການຄ້າ ຂອງລັດຖະບານ ເປັນຕົ້ນແມ່ນຄໍາສັ່ງເລກທີ 12/ນຍ ແລະ ວາລະແຫ່ງຊາດວ່າດ້ວຍການແກ້ໄຂຄວາມທຸກຍາກທາງດ້ານເສດຖະກິດ – ການເງິນ ທັງເປັນການຊຸກຍູ້, ສົ່ງເສີມ ແລະ ປະຕິບັດຕາມບັນດານິຕິກຳຂອງ ສປປ ລາວ ບົນພື້ນຖານຄວາມເຂົ້າໃຈ ແລະ ການຮ່ວມມືຢ່າງມີປະສິດທິພາບ ແລະ ປະສິດທິຜົນສູງ ໃນດ້ານການຈັດຕັ້ງປະຕິບັດວຽກງານຕົວຈິງ ແລະ ເພື່ອດຶງດູດການລົງທຶນພາກເອກະຊົນພາຍໃນ ແລະ ຕ່າງປະເທດໃຫ້ນັບມື້ນັບຫຼາຍຂຶ້ນ.

ພາຍຫຼັງໄດ້ຮັບຟັງ ແລະ ຄົ້ນຄວ້ານິຕິກໍາທີ່ກ່ຽວຂ້ອງແລ້ວ ກໍ່ໄດ້ມີການແນະນຳວິທີການປະກອບເອກະສານໃນການອອກໃບຮັບຮອງສິນຄ້າໄດ້ແຫຼ່ງກໍາເນີດ ໂດຍໄດ້ລົງເລິກການຈັດຕັ້ງປະຕິບັດຕົວຈິງ ກ່ຽວກັບການປະກອບເອກະສານ, ການກວດກາເອກະສານ ແລະ ລົງເບິ່ງຂະບວນການຜະລິດຕົວຈິງຂອງບໍລິສັດ ກ່ອນການອອກໃບຮັບຮອງສິນຄ້າໄດ້ແຫຼ່ງກໍາເນີດສິນຄ້າ (Confirmation Product of Eligibility: CPE), ການຕື່ມຂໍ້ມູນລົງໃບແບບຟອມຊະນິດຕ່າງໆ, ການກວດໃບຢັ້ງຢືນແຫຼ່ງກໍາເນີດສິນຄ້າ, ການສະຫຼຸບສະຖິິຕິການອອກໃບຢັ້ງຢືນແຫຼ່ງກໍາເນີດສິນຄ້າທີ່ໄດ້ຮັບສິດທິພິເສດ ແລະ ການເກັບຮັກສາສໍາເນົາເອກະສານ ພ້ອມທັງພາກປະຕິບັດຕົວຈິງໄປຄຽງຄູ່ກັນ.