ນະຄອນຫຼວງວຽງຈັນ, 20 ກຸມພາ 2026, ທີ່ ຫ້ອງການ ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ), ບໍລິສັດ ລາວນິວເພ ເທັກໂນໂລຢີ ຈອຍເວັນເຈີ ຈຳກັດ

ໄດ້ມອບເງິນສະໜັບສະໜູນ ໃນນາມສະມາຊິກຜູ້ຊົງຄຸນວຸດທິ VVIP ຂອງ ສຄອຊ, ເພື່ອສ້າງຄວາມເຂັ້ມແຂງໃຫ້ກັບ ສະພາການຄ້າ ແລະ ອຸດສາຫະກຳ ແຫ່ງຊາດລາວ ພ້ອມທັງຊ່ວຍສົ່ງເສີມພັດທະນາຂີດຄວາມສາມາດຂອງພາກທຸລະກິດໃນ ສປປ ລາວ.

ໃນໂອກາດນີ້, ໃຫ້ກຽດມອບເງິນສະໜັບສະໜູນໂດຍ ທ່ານ ປອ. ເມກສະຫວ່າງ ພົມມາລີ  ຜູ້ອຳນວຍການ ບໍລິສັດ ລາວນິວເພ ເທັກໂນໂລຢີ ຈອຍເວັນເຈີ ຈຳກັດ ແລະ ໃຫ້ກຽດຮັບໂດຍ ທ່ານ ດາວວອນ ພະຈັນທະວົງ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ.

ການສະໜັບສະໜູນຄັ້ງນີ້ສະແດງໃຫ້ເຫັນເຖິງຄວາມຮ່ວມມືລະຫວ່າງ ສຄອຊ ແລະ ພາກທຸລະກິດ ເພື່ອຮ່ວມກັນພັດທະນາເສດຖະກິດ ແລະ ຍົກສູງຂີດຄວາມສາມາດການແຂ່ງຂັນຂອງພາກທຸລະກິດລາວໃຫ້ກ້າວໄປສູ່ຄວາມເຂັ້ມແຂງຍິ່ງຂຶ້ນ

ບໍລິສັດ ລາວນິວເພ ເທັກໂນໂລຢີ ຈອຍເວັນເຈີ ຈຳກັດ ໄດ້ຖືກສ້າງຕັ້ງຂຶ້ນໃນປີ 2019. ເປັນວິສາຫະກິດເຕັກໂນໂລຊີນະວັດຕະກຳແຫ່ງທຳອິດ ແລະ ແຫ່ງດຽວໃນ ສປປ ລາວ ທີ່ໄດ້ຮັບໃບອະນຸຍາດດຳເນີນທຸລະກິດການຊຳລະເງິນຈາກທະນາຄານແຫ່ງ ສປປ ລາວ.

ດ້ວຍການສຸມໃສ່ການພັດທະນາເຕັກໂນໂລຊີ ແລະ ການເຂົ້າເຖິງການບໍລິການທາງດ້ານການເງິນຢ່າງທົ່ວເຖິງ, NewPay ໄດ້ຄົ້ນຄວ້າ ແລະ ສ້າງສັນນະວັດຕະກຳດ້ວຍຕົນເອງ ຈົນກາຍມາເປັນຜູ້ບຸກເບີກດ້ານການຊຳລະເງິນ ແລະ ເປັນຜູ້ນຳດ້ານແພລັດຟອມຊີວິດດິຈິຕອນໃນລາວ. ຈາກຄວາມພະຍາຍາມຢ່າງຕໍ່ເນື່ອງຕະຫຼອດຫຼາຍປີທີ່ຜ່ານມາ, NewPay ໄດ້ສ້າງ “ແພລັດຟອມຊີວິດດິຈິຕອນ” (Digital Life Platform) ທີ່ປະກອບມີທຸລະກິດຫຼັກຄື: ການຊຳລະເງິນຜ່ານມືຖື, ສູນການຄ້າອອນລາຍ, ສິນເຊື່ອລາຍຍ່ອຍ, ການສຶກສາ ແລະ ສາທາລະນະສຸກ, ການບໍລິການພາກລັດ ແລະ ການບໍລິການດ້ານຊີວິດການເປັນຢູ່ຕ່າງໆ.