ທ່ານ ອຸເດດ ສຸວັນນະວົງ ປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ກ່າວວ່າ: ການພົບປະຄັ້ງນີ້ແມ່ນໂອກາດສຳຄັນໃນການຂະຫຍາຍການຮ່ວມມືທາງທຸລະກິດ ລາວ – ຈີນ ໂດຍສະເພາະກັບແຂວງຢຸນນານ. ທ່ານກ່າວວ່າ ສປ ຈີນ ແມ່ນນັກລົງທຶນຕ່າງປະເທດອັນດັບ 1 ໃນລາວ ແລະ ເປັນຄູ່ຄ້າອັນດັບ 2 ທີ່ມີແນວໂນ້ມຈະຂຶ້ນອັນດັບ 1 ໃນໄວໆນີ້. ສຄອຊ ຍັງໄດ້ຂະຫຍາຍການຮ່ວມມືຢ່າງຕໍ່ເນື່ອງ ຜ່ານການເຂົ້າຮ່ວມງານວາງສະແດງ ແລະ ກອງປະຊຸມຕ່າງໆ ທັງໃນປະເທດຈີນ ແລະ ລາວ, ເພື່ອເສີມສ້າງການປະສານງານ ສຄອຊ ໄດ້ສ້າງຕັ້ງຫ້ອງການຄະນະກຳມະການຮ່ວມມືທຸລະກິດ ລາວ – ຈີນ ແລະ ຈັດຕັ້ງຫ້ອງການຜູ້ຕາງໜ້າຢູ່ ແຂວງຢຸນຫນານ, ຊົງຊິ້ງ, ກວາງໂຈວ ແລະ ນະຄອນອື່ນໆ… ເພື່ອສົ່ງເສີມການພົວພັນດ້ານທຸລະກິດ – ການຄ້າ – ການລົງທຶນ.

ທ່ານ ປອ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ກ່າວວ່າ: ການຈັດກອງປະຊຸມນີ້ ແມ່ນເວທີສຳຄັນໃນການເສີມສ້າງຄວາມຮ່ວມມືທາງເສດຖະກິດ – ການຄ້າ ລະຫວ່າງ ລາວ – ຈີນ ໂດຍສະເພາະ ລາວ – ຢຸນຫນານ. ສປປລ ລາວ ແລະ ສປ ຈີນ ເປັນປະເທດບ້ານໃກ້ເຮືອນຄຽງ ແລະ ມີຄວາມສຳພັນອັນດີມາດຕະຫຼອດ. ລັດຖະບານລາວ ແມ່ນໃຫ້ຄວາມສຳຄັນຫຼາຍຕ່ໍການຮ່ວມມືກັບ ສປ ຈີນ, ໂດຍສະເພາະແຂວງ ຢຸນໜານ, ເຊິ່ງມີຊາຍແດນຕິດກັບ ສປປ ລາວ.

ສປປ ລາວ ແລະ ແຂວງ ຢຸນໜານ ແມ່ນມີທ່າແຮງສູງໃນການຮ່ວມມື ແລະ ຊຸກຍູ້ເກື້ອກູນເຊິ່ງກັນແລະກັນ, ໃນເດືອນ 1 ຫາ ເດືອນ 8 ປີ 2025ນີ້, ມູນຄ່າການຄ້າ ລະຫວ່າງ ສປປ ລາວ ແລະ ແຂວງຢູນນານ ຫຼາຍກ່ວາ 2 ຕື້ໂດລາ, ທຽບກັບປີຜ່ານມາ ເພິ່ມຂື້ນ 20,3%, ໃນນັ້ນ ສປປ ລາວ ສົ່ງອອກຫຼາຍກ່ວາ 1,5ຕື້ໂດລາ. ເຊິ່ງລວມມີ:ໝາກກ້ວຍ,ຢາງພາລາ, ໝາກມ່ວງ, ກາເຟ, ຊາ, ສິນຄ້າໜື່ງເມືອງໜື່ງຜະລິດຕະພັນ ແລະອື່ນໆ ເຊິ່ງເປັນທີ່ນິຍົມໃນຕະຫຼາດຢູນນານ.

ໃນກອງປະຊຸມ ຍັງໄດ້ມີການລົງນາມຟື້ນຄືນບົດບັນທຶກຄວາມເຂົ້າໃຈ (MOU) 3 ປີ ລະຫວ່າງ ສຄອຊ ແລະ CCPIT ແຂວງຢຸນນານ ເພື່ອເປັນການຫັດແຫນ້ນການຮ່ວມມືຂອງທັງສອງອົງການຈັດຕັ້ງ. ທ່ານ ອຸເດດ ສຸວັນນະວົງ ກ່າວວ່າ: ແຂວງຢຸນໜານແມ່ນມີບົດບາດສຳຄັນທີ່ສຸດຕໍ່ການຮ່ວມມືກັນ ລະຫວ່າງ ລາວ-ຈີນ, ໂດຍສະເພາະການເປີດນໍາໃຊ້ ເສັ້ນທາງລົດໄຟລາວ ຈີນ ເປັນຕົ້ນຕໍ, ມູນຄ່າການຄ້າ-ການລົງທຶນນັບມື້ນັບຂະຫຍາຍຕົວ ແລະໄດ້ຮັບໝາກຜົນເກີນຄາດໝາຍ, ສະນ້ັ້ນ, ທັງສອງອົງການຈັດຕັ້ງເຮົາຕ້ອງຮ່ວມມືກັນຢ່າງເລິກເຊິ່ງ, ນໍາໃຊ້ທ່າແຮງ ຈາກ ເສັ້ນທາງລົດໄຟ ລາວ-ຈີນ ແລະ ທ່າແຮງຕ່າງໆ ໃຫ້ເກີດຜົນປະໂຫຍດສູງສຸດ, ຮ່ວມກັນຊຸກຍູ້ສົົ່ງເສີມສ້າງສິ່ງອຳນວຍຄວາມສະດວກໃຫ້ແກ່ທຸລະກິດທັງສອງຝ່າຍ ເຊັ່ນ: ການນໍາເຂົ້າແລະສົ່ງອອກສິນຄ້າ, ສະພາບການດຳເນີນທຸລະກິດ, ການແກ້ໄຂຂໍ້ຄັດແຍ່ງທຸລະກິດ ແລະ ອື່ນໆ.