ພິທີຖະແຫຼງຂ່າວງານຜະລິດຕະພັນລາວ ປີ 2020

ໃນຕອນບ່າຍຂອງ ວັນທີ 10 ທັນວາ 2020 ທີ່ ສະພາການຄ້າ ແລະ ອຸດສາຫະກຳແຫ່ງຊາດລາວ(ສຄອຊ) ໄດ້ມີພິທີຖະແຫຼງຂ່າວງານຜະລິດຕະພັນລາວ ປີ 2020,

ເຊິ່ງໃຫ້ກຽດເປັນປະທານຮ່ວມ ໂດຍ ທ່ານ ນາງ ຈັນທະຈອນ ວົງໄຊ ຮອງປະທານ ສຄອຊ, ທ່ານ ສີສັງຄົມ ໂຄດໂຍທາ ຮອງຫົວໜ້າກົມສົ່ງເສີມ ການຄ້າ, ກະຊວງ ອຸດສາຫະກຳ ແລະ ການຄ້າ, ທ່ານ ຮສ ປອ ຄຳຫຼ້າ ນາກຄະວົງ ຮອງປະທານ ສະພາການຄ້າ ແລະ ອຸດສາຫະກຳ ນະຄອນຫຼວງວຽງຈັນ, ທ່ານ ມາກ ລູວັນ ຜູ້ຈັດການທົ່ວໄປ ບໍລິສັດ ປີໂຕຣລ້ຽມເທຣດດີງລາວ ມະຫາຊົນ, ເຊິ່ງງານ ຜະລິດຕະພັນລາວ 2020 Made in Laos 2020, ເຊິ່ງຈະໄດ້ຈັດຂື້ນໃນລະຫວ່າງວັນທີ 25/12/2020-03/01/2021, ຈະດໍາເນີນໄປເປັນເວລາ 10 ວັນ, ພາຍໃນງານຈະມີການວາງສະແດງສິນຄ້າທີ່ຫຼາກຫຼາຍຈາກ100 ກ່ວາບໍລິສັດຈາກທົ່ວທຸກແຂວງ ແລະ ຫຼາຍກວ່າ 220 ຫ້ອງວາງສະແດງ, ເຊິ່ງຈະມີຜະລິດຕະພັນທີ່ເປັນເອກະລັກ ແລະ ຜະລິດຕະພັນໃໝ່ໆ ທີ່ຈະມານຳສະເໜີພາຍໃນງານ.

ພິເສດ ໃນປີນີ້ ແມ່ນ ສຄອ ນະຄອນຫຼວງວຽງຈັນ ຈະເປັນເຈົ້າພາບຮ່ວມ ແລະ ມີຫ້ອງວາງສະແດງທີ່ເປັນເອກະລັກ ແລະ ຈະໂຊຜົນງານຕ່າງໆໃຫ້ກັບບັນດາຜູ້ເຂົ້າຊົມງານໄດ້ຮັບຮູ້ເຖິງການຂະຫຍາຍຕົວທາງດ້ານເສດຖະກິດ-ສັງຄົມ ໃນໄລຍະຜ່ານມາ ພ້ອມດຽວກັນນັ້ນ ພາຍໃນງານ ຍັງຈະມີກິດຈະກຳແຈກແຖມຄັ້ງຍິ່ງໃຫຍ່ຈາກຫຼາຍຫຼາຍບໍລິສັດ ທີ່ເຂົ້າຮ່ວມຈະໄດ້ມີກິດຈະກຳຕ່າງໆເຊັ່ນ: ກອງປະຊຸມສຳມະນາໃຫ້ຄວາມຮູ້ແກ່ຜູ້ປະກອບການ ທາງດ້ານ E Commerce, ການເຂົ້າຫາແຫຼ່ງທຶນ, ການປັບຕົວໃນສະພາບ New Normal, ກອງປະຊຸມພົບປະທຸລະກິດ ແລະ ອື່ນໆ.