ກອງປະຊຸມພົບປະທຸລະກິດ ລາວ-ຍີ່ປຸ່ນ, ໃນວັນທີ 27 ກັນຍາ 2022, ເວລາ 10:00 – 11:30 ໂມງ, ທີ່ ສູນອາຊຽນ-ຍີ່ປຸ່ນ, ປະເທດ ຍີ່ປຸ່ນ

ກອງປະຊຸມດັ່ງກ່າວໄດ້ເປີດໂອກາດໃຫ້ ທັງສອງຝ່າຍໄດ້ມີການສ້າງເຄືອຄ່າຍທຸລະກິດ, ມີການປຶກສາຫາລືເຊິ່ງກັນ ແລະ ກັນຢ່າງກົງໄປກົງມາ ພ້ອມກັນທີ່ຈະເເລກປ່ຽນຂໍ້ມູນປຶກສາຫາລືກັນໃນອະນາຄົດອັນໃກ້ ໃນການຮ່ວມກັນຜັກດັນມູນຄ່າການຄ້າລະຫວ່າງທຸລະກິດ ຍີ່ປຸ່ນ-ລາວ ໃຫ້ຂະຫຍາຍໂຕຍິ່ງຂຶ້ນ, ປະເທດຍີ່ປຸ່ນກໍ່ຈະໄດ້ເປີດປະເທດໄວໆນີ້ ໃນຊ່ວງເດືອນ ຕຸລາ 2022, ເພື່ອເຮັດໃຫ້ພາກທຸລະກິດທັງສອງຝ່າຍໃນອານາຄົດຂ້າງໜ້າມີການຮ່ວມມືກັນຢ່າງມີປະສິດທິຜົນ, ໂດຍຕ່າງຝ່າຍຕ່າງໄດ້ຮັບຜົນປະໂຫຍດ ແລະ ສອດຄ່ອງກັບລະບຽບຫຼັກການ ແລະ ກົດໝາຍຂອງສອງປະເທດ. ໃນກອງປະຊຸມ ຄະນະນັກທຸລະກິດ ຍີ່ປຸ່ນ ແລະ ຄະນະນັກທຸລະກິດຈາກ ສປປ ລາວ ເຂົ້າຮ່ວມທັງຫມົດປະມານ 70 ທ່ານ ເຊິ່ງໃນນັ້ນນັກທຸລະກິດລາວ 30 ທ່ານ ປະກອບມີ: ຂະແໜງການຄ້າ ຂາເຂົ້າ-ຂາອອກ, ພະລັງງານ, ຂົນສົ່ງ-ຈັດສົ່ງສິນຄ້າ, ກະສິກໍາ, ໄອທີ, ທ່າບົກ, ທະນາຄານ, ອະສັງຫາລິມະຊັບ ແລະ ການຄ້າ-ການລົງທຶນ ແລະ ອື່ນໆ.

ກອງປະຊຸມພົບ ລະຫວ່າງ ສະພາການຄ້າ ແລະ ອຸດ ສາຫະກຳແຫ່ງຊາດລາວ ແລະ ສະພາການຄ້າ ແລະ ອຸດສາຫະກຳ ປະເທດ ຍີ່ປຸ່ນ, ໃນວັນທີ 27 ກັນຍາ 2022, ເວລາ 14:00 – 15:30 ໂມງ, ທີ່ ສະຖານທູດ ລາວ ປະຈໍາ ຍີ່ປຸ່ນ, ປະເທດ ຍີ່ປຸ່ນ.

ກອງປະຊຸມດັ່ງກ່າວ ແມ່ນເປັນການພົບປະແລກປ່ຽນບົດຮຽນໃນການສົ່ງເສີມທຸລະກິດ, ສ້າງສາຍພົວພັນ, ການດຶງດູດການລົງທຶນ ແລະ ເຈລະຈາໃນການຮ່ວມມືທາງດ້ານເສດຖະກິດ ແລະ ການຄ້າ ລະຫວ່າງ ລາວ-ຍີ່ປຸ່ນ, ເພື່ອໃຫ້ເກີດຮ່ວມມືລະຫວ່າງພາກທຸລະກິດ ລາວ-ຍີ່ປຸ່ນ ໃຫ້ ປະສົບຜົນສໍາເລັດ ແລະ ມີປະສິດທິຜົນສູງສຸດ, ໃນຂະແໜງການຂົນສົ່ງ, ຈັດສົ່ງສິນຄ້າ ທ່າບົກ, ການລົງທຶນ, ເຂດເສດຖະກິດພິເສດ, ການນໍາເຂົ້າ – ສົ່ງອອກຜະລິດຕະພັນ. ກອງປະຊຸມໃນຄັ້ງນີ້ແມ່ນດໍາເນີນໄປດ້ວຍບັນຍາກາດອັນດີ ແລະ ສ້າງສັນ ເຊີ່ງບັນດາພາກທຸລະກິດ ລາວ ແລະ ພາກທຸລະກິດ ຍີ່ປຸ່ນ, ໄດ້ມີການປະກອບຄໍາເຫັນທາງດ້ານການລົງທຶນໃນແຕ່ລະດ້ານ ແລະ ຕ້ອງການລົງທຶນຢູ່ ສປປ ລາວ ໃນຂະແໜງການໃດ, ປະສົບການຕົວຈິງໃນການລົງທຶນ ແລະ ປະກອບຄໍາຄິດຄໍາເຫັນຢ່າງກົງໄປກົງມາ ແລະ ຊຸກຍູ້ການຮ່ວມມື ເຊິ່ງກັນ ແລະ ກັນ ໃຫ້ຫຼາຍຂຶ້ນ. ສະນັ້ນ ທັ້ງສອງຝ່າຍ ກໍ່ໄດ້ສະເໜີ ແລະ ຖອດຖອນບົດຮຽນໃນການແລກປ່ຽນກັນ ດັ່ງລຸ່ມນີ້:

– ສະເໜີໃຫ້ເສີມສ້າງໃນການພັດທະນາປະເທດ ລະຫວ່າງ ພາກທຸລະກິດ ຍີ່ປຸ່ນ – ລາວ ຄື: ການຄ້າ, ການລົງທຶນ, ການທ່ອງທ່ຽວ ແລະ ການແລກປ່ຽນວັດທະນາທຳ ກັນຫຼາຍຂຶ້ນ.

– ສົ່ງເສີມໃຫ້ທຸລະກິດ ຮຸ້ນໃໝ່ຂອງ ລາວ ແລະ ຍີ່ປຸ່ນ ໄດ້ມີໂອກາດ ຮ່ວມມືນໍາກັນ ຫຼາຍຂຶ້ນ.