ໃນຕອນບ່າຍວັນທີ 16 ກຸມພາ 2023 ,ເວລາ 14:00 ທີ່ ສູນວາງສະແດງສິນຄ້າລາວ-ໄອເຕັກ ໄດ້ຈັດງານພິທີ ເປີດໂຕ“ການໃຫ້ບໍລິການດ້ານມາດຕະຖານ-ຄຸນນະພາບ”(Quality Champion) ‘’QCs’’ ແລະ ການນຳໃຊ້ຖານຂໍ້ມູນຂ່າວສານ

ດ້ານຄຸນນະພາບສິນຄ້າ (Quality Trade Platform) Q4T

ໃຫ້ກຽດການເປັນປະທານໂດຍ: ທ່ານ ທະນູສອນ ພົນອາມາດ ຮອງປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ), ທ່ານ ເຂັມເດັດ ສີຫາວົງ, ຮອງຫົວໜ້າກົມນະໂຍບາຍການຄ້າຕ່າງປະເທດ, ກະຊວງອຸດສາຫະກຳ ແລະ ການຄ້າ, ທ່ານ ນິແອວຣ ເລໂອນາດ ທີ່ປືກສາທູດ ສຳນັກງານຜູ້ຕາງໜ້າ ສະຫະພາບເອີຣົບ ປະຈຳ ສປປ ລາວດ ທ່ານ ນາງ ມາກາລີຕາ ຟັນເດີ – ຜູ້ຈັດການ ໂຄງການ ITC – ARISE PLUS LAOS ແລະ ທ່ານ ນາງ ຂັນແກ້ວ ມູນວົງ ຜູ້ປະສານງານໂຄງການ ARISE PLUS Laos.

ທ່ານ ທະນູສອນ ພົນອາມາດ ຮອງປະທານ ສຄອຊ ໄດ້ໃຫ້ຮູ້ວ່າ: ສະພາການຄ້າ ແລະ ອຸດສາຫະກຳແຫ່ງຊາດລາວ ຈະເປີດໃຫ້ບໍລິການ ດ້ານມາດຕະຖານ-ຄຸນນະພາບ”(Quality Champion) ‘’QCs’’ ທາງ ສຄອຊ ພວກເຮົາຈະສະໜອງທີມງານຊ່ຽວຊານດ້ານຄຸນນະພາບ, ໃຫ້ຄຳປຶກສາ, ຈັດການຝຶກອົບຮົມ, ແລະ ຄຳແນະນຳຕ່າງໆ ທີ່ເໝາະສົມກັບສະພາບຕົວຈິງຂອງບໍລິສັດຂອງທ່ານ ແລະ ຍັງອຳນວຍຄວາມສະດວກໃນຊ່ວງການດຳເນີນຈັດຕັ້ງປະຕິບັດ ການພັດທະນາຄຸນນະພາບ ເຊິ່ງເປັນໄລຍະເວລາ 4 ຫາ 5 ເດືອນ.

ການຈັດຕັ້ງປະຕິບັດ ການປັບປຸງ ຫຼື ພັດທະນາຄຸນນະພາບ ໃນຂັ້ນບໍລິສັດແມ່ນຈະສຸ່ມໃສ່ການຫຼຸດຜ່ອນສິ່ງເສດເຫຼືອ, ປັບປຸງດ້ານປະສິດທິພາບ ແລະ ຜົນຜະລິດ, ຮັບປະກັນຄວາມສອດຄ່ອງດ້ານຄຸນນະພາບ, ຍົກລະດັບຄວາມເພິ່ງພໍໃຈຂອງລູກຄ້າ, ເພີ່ມຄວາມສາມາດໃນການແຂ່ງຂັນ ແລະ ຊ່ວຍກະກຽມໃຫ້ບໍລິສັດຂອງທ່ານສາມາດເຂົ້າເຖິງຕະຫຼາດໃໝ່ໆ ຫຼື ເພີ່ມສ່ວນແບ່ງການຕະຫຼາດໃຫ້ຫຼາຍຂຶ້ນ.

ແລະ ການເປີດນໍາໃຊ້ຖານຂໍ້ມູນມາດຕະຖານຄຸນນະພາບສິນຄ້າ (Quality For Trade Platform) ສຳລັບ ສປປ ລາວ. ຖານຂໍ້ມູນຂ່າວສານດ້ານຄຸນນະພາບສິນຄ້າ ສຳລັບ ສປປ ລາວ ຊ່ວຍໃຫ້ຜູ້ຊົມໃຊ້ສາມາດ:

1. ຊອກຫາ ຄໍາແນະນໍາທີ່ມີແບບແຜນ ແລະ ງ່າຍສຳລັບຜູ້ຊົມໃຊ້ ກ່ຽວກັບຂໍ້ກຳນົດ ແລະ ມາດຕະຖານດ້ານຄຸນະພາບທີ່ຈໍາເປັນໃນການເຂົ້າເຖິງຕະຫຼາດສະເພາະ

2. ໄດ້ຮັບຂໍ້ມູນທີ່ກ່ຽວຂ້ອງດ້ານຄຸນນະພາບ ແລະ ແລກປ່ຽນປະສົບການການປະຕິບັດທີ່ດີ

3. ເຊື່ອມຕໍ່ກັບສະຖາບັນທີ່ກ່ຽວຂ້ອງ ຫຼື ສ່ວນບຸກຄົນຜູ້ທີ່ສາມາດໃຫ້ຄຳແນະນຳ ແລະ ການຊ່ວຍເຫຼືອ

4. ໄດ້ຮັບຂໍ້ມູນລົງເລີກຈາກຜູ້ທີ່ມີປະສົບການ ແລະ ປະສົບຜົນສໍາເລັດ.

ໂດຍສະພາການຄ້າ ແລະ ອຸດສາຫະກຳແຫ່ງຊາດລາວ ( ສຄອຊ) ໄດ້ຮ່ວມກັບ ສູນການຄ້າສາກົນ (ITC) ພາຍໃຕ້ການຈັດຕັ້ງປະຕິບັດໂຄງການຊ່ວຍເຫຼືອວຽກງານເຊື່ອມ ໂຍງພາກພື້ນອາຊຽນ (ARISE Plus Lao PDR), ເຊິ່ງເປັນໂຄງການຮ່ວມມື ແລະ ສະໜັບສະໜູນ ລະຫວ່າງກະຊວງການຄ້າ ແລະ ອຸດສາຫະກຳ ແລະ ສະຫະພັນເອີລົບ (EU).

ທ່ານໃດທີສົນໃຈສາມາດສອບຖາມຂໍ້ມູນ ເພີ້ມຕື່ມໄດ້ທີ່ ພະແນກການຕະຫຼາດ ແລະ ວາງສະແດງ ສະພາການຄ້າ ແລະ ອຸດສາຫະກໍາ ແຫ່ງຊາດລາວ, ທີ່ ຫຼັກ 5 ບ້ານໂພນພະເນົ້າ, ເມືອງໄຊເສດຖາ, ນະຄອນຫຼວງວຽງຈັນ ໂທ: +856-21- 453312 ຫຼື ເຂົ້າເບິ່ງເວບໄຊຂອງພວກເຮົາໄດ້ ທີ WWW.LNCCI.LA