ກອງປະຊຸມສະຫຼຸບການຈັດຕັ້ງປະຕິບັດຂອງໂຄງການສົ່ງເສີມຜະລິດຕະພັນຍີ່ຫໍ້ລາວ-ເພື່ອຊິວິດການເປັນຢູ່ທີ່ດີຂຶ້ນ ໄດ້ຖືກຈັດຂຶ້ນໃນວັນທີ 31 ມັງກອນ 2022 ທີ່ ສະພາການຄ້າ ແລະ ອຸດສາຫະກຳ ແຫ່ງຊາດລາວ,

ພາຍໃຕ້ການເປັນປະທານຂອງ ທ່ານ ອຸເດດ ສຸວັນນະວົງ, ປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ແລະ ການເປັນປະທານຮ່ວມຂອງ ທ່ານ ນ ລິຄາດ້າ ລິສເກີ້ ຜູ້ຕາງໜ້າຈາກອົງການສະຫປະຊາຊາດ ເພື່ອການພັດທະນາ. ພ້ອມດຽວກັນນີ້ ຍັງໃຫ້ກຽດເຂົ້າຮ່ວມຈາກ ກະຊວງອຸດສາຫະກຳ ແລະ ການຄ້າ, ກະຊວງແຜນການ ແລະ ການລົງທຶນ ແລະ ຄະນະເລຂາທິການ ລວມທັງໝົດ 15 ທ່ານ.

ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອສະຫຼຸບການຈັດຕັ້ງປະຕິບັດຂອງໂຄງການໃນປີ 2021 ແລະ ສະຫຼຸບຜົນສໍາເລັດຂອງໂຄງການນັບແຕ່ສ້າງຕັ້ງມາຈົນເຖິງປະຈຸບັນ ມີຄວາມຫຍຸ້ງຍາກ, ມີສິ່ງທ້າທາຍ ແລະ ມີບົດຮຽນທີ່ຖອດຖອນໄດ້ຄືແນວໃດ ເພື່ອນຳໄປປັບປຸງ ແລະ ຕໍ່ຍອດໃຫ້ເກີດຜົນປະໂຫຍດສູງສຸດໂດຍສະເພາະແມ່ນການສົ່ງເສີມກຸ່ມຜະລິດຕະພັນ ຊາ, ກາເຟ ແລະ ເຂົ້າ ໃຫ້ສາມາດສົ່ງອອກສິນຄ້າທີ່ມີຄຸນນະພາບ ແລະ ໄດ້ມາດຕະຖານໃນລາຄາທີ່ສູງຂຶ້ນແບບຍືນຍົງ ແລະ ພ້ອມທັງຍົກສູງລະດັບຊິວິດການເປັນຢູ່ທີ່ດີຂຶ້ນເທື່ອລະກ້າວ.