ກອງປະຊຸມຄະນະຊີ້ນໍາກອງປະຊຸມທຸລະກິດລາວ ໄດ້ຈັດຂຶ້ນໃນວັນທີ 21 ກຸມພາ 2025 ເວລາ 08:30 ໂມງ ທີ່ຫ້ອງວ່າການສໍານັກງານນາຍົກລັດຖະມົນຕີ. ກອງປະຊຸມໄດ້ດຳເນີນພາຍໃຕ້ການເປັນປະທານຂອງທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ ແຫ່ງ ສປປ ລາວ.

ຜູ້ເຂົ້າຮ່ວມປະກອບມີຕົວແທນຈາກຄະນະຊີ້ນຳຂອງກອງປະຊຸມທຸລະກິດລາວ, ຄະນະປະສານງານພາກລັດ, ໜ່ວຍງານປຶກສາຫາລືພາກທຸລະກິດ ແລະ ກອງເລຂາຂອງກອງປະຊຸມທຸລະກິດລາວ ລວມທັງໝົດກວ່າ 40 ທ່ານ.

ຈຸດປະສົງຫຼັກຂອງກອງປະຊຸມແມ່ນເພື່ອກະກຽມສຳລັບການຈັດກອງປະຊຸມທຸລະກິດລາວ ຄັ້ງທີ 16, ໂດຍທີ່ປະຊຸມໄດ້ມີມະຕິຕົກລົງເຫັນດີໃນບັນຫາສຳຄັນຕ່າງໆ ດັ່ງນີ້:

1. ກຳນົດວັນທີ 02 ເມສາ 2025 ເປັນມື້ຈັດກອງປະຊຸມທຸລະກິດລາວຄັ້ງທີ 16.

2. ມອບໝາຍໃຫ້ກອງເລຂາ ແລະ ຈຸດປະສານງານພາກລັດ ເປັນຜູ້ກຳນົດຫົວຂໍ້ຂອງກອງປະຊຸມ.

3. ເຫັນດີຮັບເອົາພາກສ່ວນທີ່ຈະມີຄໍາເຫັນ ຕາມຮ່າງວາລະຂອງກອງປະຊຸມທຸລະກິດລາວຄັ້ງທີ 16 (ທະນາຄານພັດທະນາອາຊີ, ສະພາການຄ້າ ແລະ ອຸດສາຫະກຳ ເອີຣົບ ປະຈຳ ສປປ ລາວ, ສະພາການຄ້າຈີນ ປະຈໍາ ສປປ ລາວ ແລະ ຂະແໜງການຂອງພາກລັດ), ໂດຍມອບໃຫ້ກອງເລຂາ ແລະ ຈຸດປະສານງານພາກລັດ ກໍານົດກອບ ແລະ ທິດທາງຂອງບົດປະກອບຄໍາເຫັນ ໃຫ້ເຂົ້າກັບ ຫົວຂໍ້ ຂອງກອງປະຊຸມທຸລະກິດລາວ ຄັ້ງທີ 16.

4. ໃຫ້ຂະແໜງການກ່ຽວຂ້ອງຮ່ວມກັບກະຊວງອຸດສາຫະກຳ ແລະ ການຄ້າ ແລະ ສະພາການຄ້າ ແລະ ອຸດສາຫະກຳແຫ່ງຊາດລາວ ສືບຕໍ່ແກ້ໄຂບັນຫາທີ່ຍັງຄົງຄ້າງ.

5. ກຳນົດຈັດກອງປະຊຸມຄະນະປະສານງານພາກລັດໃນຊ່ວງກາງ ຫຼື ທ້າຍເດືອນມີນາ 2025 ເພື່ອກວດສອບຄວາມພ້ອມທຸກດ້ານກ່ອນຈັດກອງປະຊຸມທຸລະກິດລາວ ຄັ້ງທີ 16.

ກອງປະຊຸມທຸລະກິດລາວຖືເປັນເວທີສຳຄັນໃນການສົ່ງເສີມການຮ່ວມມືລະຫວ່າງພາກລັດ ແລະ ພາກທຸລະກິດ ເພື່ອປັບປຸງສະພາບແວດລ້ອມການດຳເນີນທຸລະກິດ ແລະ ຜັນຂະຫຍາຍນະໂຍບາຍທີ່ສະໜັບສະໜູນການພັດທະນາເສດຖະກິດຂອງ ສປປ ລາວ.