​ວັນທີ 18 ແລະ 19 ມັງກອນ 2018 ທີ່ ສະພາການຄ້າ ແລະ ອຸດສາຫະກໍາ ແຫ່ງຊາດລາວ ໄດ້ຈັດກອງປະຊຸມຝຶກອົບຮົມ ແລະ ເຜີຍແຜ່ຄວາມຮູ້ ກ່ຽວກັບອາກອນມູນຄ່າເພີ່ມ (ອມພ) ຂຶ້ນ ໂດຍ ການເປັນປະທານຂອງທ່ານນາງ ດາວວະດິງ ພິລະໄຊພິທັກ ຮອງເລຂາທິການ ສຄອ ແຫ່ງຊາດລາວ,  ໃນນີ້ ມີບັນດາຜູ້ເຂົ້າຮ່ວມກໍ່ຄືພາກທຸລະກິດຂະແໜງຕ່າງໆ ເປັນຕົ້ນແມ່ນ ຂະແໜງ ຕັດຫຍິບ, ຂົນສົ່ງ, ການຜະລິດ, ບໍລິການ,ການຄ້າ,ໄອຊີທີ, ທະນາຄານ ແລະ ທຸລະກິດຂະໜາດນ້ອຍ ແລະ ກາງ ເຂົ້າຮ່ວມຢ່າງຟົດຟື້ນ. ຈຸດປະສົງຂອງກອງປະຊຸມແມ່ນເພື່ອ ຝຶກອົບຮົມ ແລະ ເຜີຍແຜ່ຄວາມຮູ້ ກ່ຽວກັບວຽກງານອາກອນມູນຄ່າເພີ່ມ ຈາກຜູ້ຊ່ຽວຊານຕ່າງປະເທດ ທ່ານ ອັງເດຣ ວິ້ງ ໃຫ້ແກ່ພາກສ່ວນທີ່ກ່ຽວຂ້ອງ  ໂດຍສະເພາະບັນດາສະມາຊິກຂອງສະພາການຄ້າ ແລະ ອຸດສາຫະກໍາແຫ່ງຊາດລາວ ແລະ ໜ່ວຍງານປຶກສາຫາລືພາກທຸລະກິດຂະແໜງການຕ່າງໆ. ເພື່ອໃຫ້ເຂົ້າໃຈວິທີການຈັດຕັ້ງປະຕິບັດ ກົດໝາຍ ອາກອນມູນຄ່າເພີ່ມ ຢ່າງເລິກເຊິ່ງ ແລະ ເປັນເອກະພາບກັນ. ພ້ອມກັນນັ້ນ ກໍ່ເປັນການເປີດໂອກາດໃຫ້ແກ່ພາກທຸລະກິດ ປະກອບຄໍາເຫັນ, ສອບຖາມ, ປຶກ​ສາ​ຫາ​ລື​ຂໍ້ຂອງໃຈ ແລະ ບັນ​ຫາ​ທີ່​ຄ້າງ​ຄາ ດ້ານອາກອນມູນຄ່າເພີ່ມ ທີ່ຕິດພັນກັບການດໍາເນີນທຸລະກິດ .ທ່ານ ຮອງເລຂາທິການ ສ​ຄອຊ ແຫ່ງຊາດລາວ ​ຍັງໄດ້ກ່າວວ່າ: ກອງປະຊຸມໃນຄັ້ງນີ້ ແມ່ນຂັ້ນຕອນໜຶ່ງໃນກົນໄກກອງປະຊຸມທຸລະກິດລາວ ເຊິ່ງ ກອງປະຊຸມທຸລະກິດລາວ ແມ່ນເປັນເວທີທີ່ສຳຄັນ ສໍາລັບການປຶກສາຫາລືຂອງ ພາກທຸລະກິດ ເພື່ອປັບປຸງສະພາບແວດລ້ອມ ທີ່ເອື້ອອຳນວຍ ໃຫ້ແກ່ການດຳເນີນທຸລະກິດ ແນໃສ່ສົ່ງເສີມ ການເຕີບໃຫຍ່ ຂະຫຍາຍຕົວຂອງພາກທຸລະກິດ ແລະການປະກອບສ່ວນ ຂອງພາກທຸລະກິດເຂົ້າໃນການບັນລຸ ເປົ້າໝາຍການພັດທະນາ ຂອງປະເທດເຮົາ. ສະນັ້ນ ການຝຶກອົບຮົມໃນຄັ້ງນີ້ ກໍ່ເປັນການຝຶກອົບຮົມໜຶ່ງທີ່ສໍາຄັນ ເພື່ອ ສ້າງຄວາມເຂົ້າໃຈໃຫ້ແກ່ພາກທຸລະກິດ ກ່ຽວກັບດ້ານອາກອນ ກ່ອນຈະກ້າວໄປເຖິງກອງປະຊຸມທຸລະກິດລາວ ຄັ້ງທີ 11 ທີ່ຄາດວ່າຈະຈັດຂຶ້ນໃນເດືອນມີນາ 2018 ນີ້.