ກອງປະຊຸມສະໄໝສາມັນຄັ້ງທີ່ VIII ຂອງສະພາທີ່ປຶກສາອາຊີວະສຶກສາ ແລະ ພັດທະນາສີມືແຮງງານ ແຫ່ງຊາດຄັ້ງວັນທີ 19 ກັນຍາ 2018, ທີ່ ໂຮງແຮມ ລ້ານຊ້າງ ນະຄອນຫຼວງວຽງຈັນ.

ໂດຍພາຍໃຕ້ການເປັນປະທານຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາ ແລະ ກິລາ, ທ່ານ ອຸເດດ ສຸວັນນະວົງ ປະທານ ສະພາການຄ້າ ແລະ ອຸດສາຫະກໍາ ແຫ່ງຊາດລາວ ແລະ ທ່ານ ຮສ.ປອ. ກອງສີ ແສງມະນີ ຮອງລັດຖະມົນຕີກະຊວງສຶກສາ ແລະ ກິລາ.  ກອງປະຊຸມສະໄໝສາມັນ ຂອງ ສອພຊ ຂື້ນລວມແລ້ວຄັ້ງນີ້ເປັນຄັ້ງທີ VIII ແລະ ປີນີ້ເປັນປິທີ 16 ນັບແຕ່ສະພາເຮົາໄດ້ສ້າງຕັ້ງຂື້ນໃນປີ 2002 ເປັນຕົ້ນມາ ແລະ ເປັນປີທີ 8 ທີ່ສະພາພວກເຮົາໄດ້ປ່ຽນຊື່ ຈາກສະພາທີ່ປຶກສາອາຊີວະສຶກສາແຫ່ງຊາດ ມາເປັນສະພາທີ່ປຶກສາອາຊີວະສຶກສາ ແລະ ພັດທະນາສີມືແຮງງານ ແຫ່ງຊາດ.

ສອຊ ເປັນອົງການຈັດຕັ້ງຮ່ວມຂອງລັດ ແລະ ເອກະຊົນ ໂດຍມີ 3 ພາກສ່ວນຫຼັກຢູ່ໃນຄະນະປະທານຄື ກະຊວງສຶກສາ ແລະ ກິລາ, ກະຊວງແຮງງານ ແລະ ສະຫວັດດີການສັງຄົມ ແລະ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ເປັນການຈັ້ງຕັ້ງທີ່ບໍ່ປະຈຳການ ມີພາລະບົດບາດ ແລະ ໜ້າທີ່ໃນການຄົ້ນຄວ້າ ແລະ ໃຫ້ຄໍາປຶກສາກ່ຽວກັບນະໂຍບາຍ ແລະ ຍຸດທະສາດສຳລັບການພັດທະນາວຽກງານອາຊີວະສຶກສາ ແລະ ພັດທະນາສີມືແຮງງານ, ເປັນອົງການປະສານງານລະຫວ່າງພາກລັດ ແລະ ພາກເອກະຊົນ ແລະ ເປັນເວທີໃນການປຶກສາຫາລືກ່ຽວກັບ ການສ້າງ ແລະ ພັດທະນາກຳລັງແຮງງານ. ກອງປະຊຸມໃນຄັ້ງນີ້ມີສະມາຊິກຜູ້ເຂັ້າຮ່ວມຈາກຫຼາຍພາກສ່ວນ ມີຫົວໜ້າກົມ, ຮອງກົມ, ປະທານສະມາຄົມ, ຫົວໜ້າໜ່ວຍງານກຸ່ມອາຊີບ, ນັກວິຊາການຈາກຂະແໜງການຕ່າງໆ ແລະ ແຂກທີ່ມີກຽດທັງພາຍໃນ ແລະ ຕ່າງປະເທດ.