ໃນຕອນແລງຂອງ ວັນທີ 21 ຕຸລາ 2020 ທີ່ ໂຮງແຮມ ອິນທິລາ ວັງວຽງ, ແຂວງວຽງຈັນ ສູນບໍລິການວິສາຫະກິດຂະໜາດນ້ອຍ ແລະ ກາງ ສະພາການຄ້າ ແລະ ອຸດສາຫະກຳ ແຫ່ງຊາດລາວ

ຮ່ວມກັບ ອົງກອນ Econox Lao ໄດ້ຈັດງານພົບປະໂອ້ລົມປຶກສາຫາລື ກ່ຽວກັບ ການຫຼຸດຜ່ອນການນຳໃຊ້ປຣາສຕິກໃນລາວ ໃນຫົວຂໍ້: ການແກ້ໄຂ ແລະ ມີສ່ວນຮ່ວມຂອງທຸລະກິດທ່ອງທ່ຽວ,​ ໂຮງແຮມ ແລະ ຮ້ານອາຫານ. ເປັນກຽດເຂົ້າຮ່ວມໂດຍ: ທ່ານ ປະກາສິດ ຈັນທະປັນຍາ ປະທານສະມາຄົມໂຮງແຮມ ແລະ ຮ້ານອາຫານລາວ, ທ່ານ ທັນໃຈ ວົງວຽງແກ້ວ ຮອງປະທານສະພາການຄ້າ ແລະ ອຸດສາຫະກຳ ແຂວງວຽງຈັນ, ທ່ານ ບຸນມີ ພົມມະວົງສາ ກຳມະການພັກເມືອງ ຫົວໜ້າຫ້ອງວ່າການປົກຄອງ ເມືອງວັງວຽງ, ທ່ານ ບຸນທັນ ພະວິໄຊ ຫົວໜ້າ ຫ້ອງການ ອຸດສາຫະກຳ ແລະ ການຄ້າ ເມືອງວັງວຽງ, ທ່ານ ອິນທີ ເດືອນສະຫວັນ ປະທານ ບໍລິສັດ ອິນທິຣາ ກຣຸບ.

ຈຸດປະສົງກໍ່ເພື່ອສ້າງຄວາມເຂົ້າໃຈໃຫ້ແກ່ບັນດາຫົວໜ່ວຍທຸລະກິດໃນການຫຼຸດຜ່ອນການນຳໃຊ້ປຣາສຕິກໃຫ້ຫຼຸດລົງໃນການສ້າງໃຫ້ເປັນພື້ນທີ່ທ່ອງທ່ຽວສີຂຽວ ມີສະພາບແວດລ້ອມທີ່ປອດໂປ່ງ ສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດນັບມື້ນັບຫລາຍຂຶ້ນ.​ ນອກນີ້ຍັງເປັນການຜັນຂະຫຍາຍແນວທາງນະໂຍບາຍຂອງພັກ-ລັດ ບໍ່ວ່າຈະເປັນສູນກາງຫຼືໃນຂັ້ນທ້ອງຖິ່ນ ໄດ້ໃຫ້ຄວາມສຳຄັນຕໍ່ບັນຫາດັ່ງກ່າວ ແລະ ອົງກອນຈັດຕັ້ງສາກົນຕ່າງໆໃນການປຸກລະດົມຂົນຂວາຍຮ່ວມຈິດຮ່ວມໃຈຊ່ວຍກັນຫຼຸດຜ່ອນການນຳໃຊ້ປຣາສຕິກໃນລາວ ຊຶ່ງມັນຈະສົ່ງຜົນກະທົບຕໍ່ສະພາບແວດລ້ອມດິນຟ້າອາກາດ,​ ເຮັດໃຫ້ເກີດເປັນອັນຕະລາຍຕໍ່ສັດ ທາງບົກ ແລະ ທາງນ້ຳໂດຍກົງ. ບັນຍາກາດໄດ້ດຳເນີນໄປຢ່າງຟົດຟື້ນໃນການພົບປະໂອ້ລົມປຶກສາຫາລືທັງພາກລັດ ແລະ ບັນດາຫົວໜ່ວຍທຸລະກິດເມືອງວັງວຽງໃນການແລກປ່ຽນຂໍ້ມູນວິທີການແກ້ໄຂ້ບັນຫາຕ່າງໆທີສົ່ງຜົນກະທົບຕໍ່ສະພາບແວດລ້ວມ.