ໃນຕອນບ່າຍວັນທີ 14 ກັນຍາ 2018, ຢູ່ທີ່ ສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ມີພິທີເປີດການຈັດຕັ້ງປະຕິບັດ “ແຜນງານສ້າງຄວາມເຂັ້ມແຂງໃຫ້ວິສາຫະກິດຂະໜາດນ້ອຍ ແລະ ກາງ” ຂຶ້ນຢ່າງເປັນທາງການ

ໂດຍພາຍ​ໃຕ້ການເປັນປະທານຂອງ ທ່ານ ສົມ​ຈິດ ອິນ​ທະ​ມິດ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ວິກ ວານ ວູເຮັນ ຜູ້ອຳນວຍການຝ່າຍ ວິສາຫະກິດພາກພື້ນອາຊີ-ປາຊິຟິກ ຈາກອົງການແຮງງານສາກົນ, ທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ພ້ອມດ້ວຍແຂກຖືກເຊີນຈາກພາກລັດ, ພາກທຸລະກິດ, ບັນດາຄູ່ຮ່ວມພັດທະນາ ແລະ ອົງການຈັດຕັ້ງສາກົນພາຍໃນນະຄອນຫຼວງວຽງຈັນ ໃຫ້ກຽດເຂົ້າຮ່ວມ.

“ແຜນງານສ້າງຄວາມເຂັ້ມແຂງໃຫ້ວິສາຫະກິດຂະໜາດນ້ອຍ ແລະ ກາງ” ແມ່ນໜຶ່ງໃນສາມແຜນງານ (1. ແຜນງານສ້າງຄວາມເຂັ້ມແຂງໃຫ້ກົມສົ່ງເສີມວິສາຫະກິດຂະໜາດນ້ອຍ ແລະ ກາງ ແລະ ພາກສ່ວນກ່ຽວຂ້ອງ; 2) ທະນາຄານທຸລະກິດ/ສະຖາບັນການເງິນທີ່ເຂົ້າຮ່ວມໂຄງການ ແລະ ພາກສ່ວນກ່ຽວຂ້ອງ; ແລະ 3. ວິສາຫະກິດຂະໜາດນ້ອຍ ແລະ ກາງ) ທີ່ກໍານົດໄວ້ໃນໜ້າວຽກທີ 2: ການຊ່ວຍເຫຼືອທາງດ້ານວິຊາການ ຊຶ່ງຢູ່ພາຍໃຕ້ໂຄງການເຂົ້າເຖິງແຫຼ່ງທຶນຂອງວິສາຫະກິດຂະ   ໜາດນ້ອຍ ແລະ ກາງ (SMEs Access to Finance Project)” ທີ່ໄດ້ຮັບການສະະໜັບສະໜູນຈາກທະນາຄານໂລກ ໂດຍກົມສົ່ງເສີມວິສະຫະກິດຂະໜາດນ້ອຍ ແລະ ກາງ, ກະຊວງອຸດສາຫະກໍາ ແລະ ການຄ້າ ຮັບຜິດຊອບໃນການຈັດຕັ້ງປະຕິບັດໂຄງການດັ່ງກ່າວ.

ຈຸດປະສົງຂອງ “ແຜນງານສ້າງຄວາມເຂັ້ມແຂງໃຫ້ວິສາຫະກິດຂະໜາດນ້ອຍ ແລະ ກາງ” ແມ່ນເພື່ອຍົກລະດັບຄວາມສາມາດຂອງຫົວໜ່ວຍ SME ຈຳນວນ 600 ຫົວໜ່ວຍ ຢູ່ໃນ 3 ແຂວງເປົ້າໝາຍຄື: ນະຄອນຫຼວງວຽງຈັນ, ຫຼວງພະບາງ ແລະ ຈໍາປາສັກ ໂດຍ SME ຈະໄດ້ຮັບການຍົກລະດັບໃນດ້ານຕ່າງໆເຊັ່ນ: ການສ້າງແຜນທຸລະກິດທີ່ເປັນໄປໄດ້, ການຖືບັນຊີ ແລະ ການບໍລິຫານການເງິນ, ການບໍລິຫານ-ຈັດການທຸລະກິດ, ການຕະຫຼາດ ແລະ ການຂາຍ ແລະ ອື່ນໆ ເພື່ອສ້າງເງື່ອນໄຂໃຫ້ SME ສາມາດເຂົ້າເຖິງແຫຼ່ງທຶນຂອງບັນດາທະນາຄານທຸລະກິດທີ່ເຂົ້າຮ່ວມໃນໂຄງການເຂົ້າເຖິງແຫຼ່ງທຶນຂອງວິສາຫະກິດຂະໜາດນ້ອຍ ແລະ ກາງ ແລະ ທະນາຄານອື່ນໆ. ສ່ວນຫົວໜ່ວຍ SME ທີ່ເຂົ້າເຖິງແຫຼ່ງທຶນໄດ້ແລ້ວ ແມ່ນໃຫ້ສາມາດນໍໍາໃຊ້ທຶນຢ່າງມີປະສິດທິຜົນ, ເຮັດໃຫ້ທຸລະກິດເຕີບໃຫຍ່ຂະຫຍາຍຕົວ ສາມາດສົ່ງດອກເບ້ຍ ແລະ ຕົ້ນທຶນໃຫ້ທະນາຄານທັນກໍານົດເວລາ, ຫຼຸດຜ່ອນຄວາມສ່ຽງທີ່ຈະກໍ່ໃຫ້ເກີດໜີ້ທີ່ບໍ່ເກີດດອກອອກຜົນ (NPL). ຄຽງຄູ່ກັບການສ້າງຄວາມເຂັ້ມແຂງໃຫ້ແກ່ SME ແຜນງານດັ່ງກ່າວຍັງຈະໄດ້ສ້າງຄວາມເຂັ້ມແຂງໃຫ້ແກ່ບັນ​ດາໜ່ວຍງານທີ່ເຮັດໜ້າທີ່ສົ່ງເສີມ SME, ທີ່ປຶກສາພາຍໃນ ລວມທັງຜູ້ໃຫ້ບໍລິການພັດທະນາທຸລະກິດ (BDS) ຢ່າງໜ້ອຍ 5 ຫົວໜ່ວຍ/ທ່ານ ໂດຍການນໍາໃຊ້ເຄື່ອງມື ແລະ ວິທີການທີ່ແທດເໝາະກັບສະພາບຕົວຈິງເພື່ອຮັບປະກັນຄຸນນະພາບໃນການສະໜອງບໍລິການໃຫ້ແກ່ SME ພາຍຫຼັງສິ້ນສຸດໂຄງການ.

ໃນໂອກາດນີ້, ທ່ານ ສົມ​ຈິດ ອິນ​ທະ​ມິດ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ປະທານໃນພິທີ ໄດ້ມີຄໍາເຫັນຕໍ່ກັບແຜນງານສ້າງຄວາມເຂັ້ມແຂງດັ່ງກ່າວວ່າ:  ການສົ່ງເສີມການເຂົ້າເຖິງແຫຼ່ງທຶນ ແມ່ນວຽກງານບູລິມະສິດຂອງລັດຖະບານ ແລະ ໄດ້ຖືກບັນຈຸຢູ່ໃນແຜນພັດທະນາ ວິສາຫະກິດຂະໜາດນ້ອຍ ແລະ ກາງ ເລີ່ມແຕ່ຍຸດທະສາດພັດທະນາວິສາຫະກິດຂະໜາດນ້ອຍ ແລະ ກາງ 2006-2010, ແຜນພັດທະນາວິສາຫະກິດຂະໜາດນ້ອຍ ແລະ ກາງ ປີ 2011-2015 ແລະ ໃນປະຈຸບັນ ການສົ່ງເສີມການເຂົ້າເຖິງແຫຼ່ງທຶນຍັງຖືເປັນ 1 ໃນ 7 ນະໂຍບາຍ ຂອງແຜນພັດທະນາວິສາຫະກິດຂະໜາດນ້ອຍ ແລະ ກາງ ປີ 2016-2020 ເພື່ອປັບປຸງ ແລະ ອໍານວຍໃຫ້ແກ່ການເຂົ້າຫາແຫຼ່ງທຶນຂອງວິສາຫະກິດຂະໜາດນ້ອຍ ແລະ ກາງ ໄດ້ງ່າຍຂຶ້ນ.

ພ້ອມກັນນີ້, ທ່ານ ສົມ​ຈິດ ອິນ​ທະ​ມິດ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຍັງໄດ້ສະແດງຄວາມເຊື່ອໝັ້ນວ່າ ແຜນງານດັ່ງກ່າວຈະຊ່ວຍປັບປຸງ ແລະ ຍົກລະດັບຄວາມອາດສາມາດຂອງ SME ໃນດ້ານຕ່າງໆໂດຍສະເພາະແມ່ນການສ້າງເງື່ອນໄຂໃຫ້ແກ່ການເຂົ້າເຖິງແຫຼ່ງທຶນ. ນອກຈາກນັ້ນ, ທ່ານຍັງໄດ້ແນະນໍາໃຫ້ຄະນະຮັບຜິດຊອບໂຄງການຕ້ອງເອົາໃຈ ໃສ່ໃນການຄັດເລືອກເອົາຫົວໜ່ວຍ SME ທີ່ມີຄວາມສົນໃຈ ແລະ ຢູ່ໃນເປົ້າໝາຍຂອງແຜນງານຢ່າງແທ້ຈິງ ແລະ ທ່ານຍັງໄດ້ເນັ້ນຢໍ້າວ່າ: ເຖິງແມ່ນວ່າການຈັດຕັ້ງປະຕິບັດແຜນງານດັ່ງກ່າວຈະຢູ່ໃນ 3 ແຂວງເປົ້າໝາຍກໍ່ຕາມ ແຕ່ທາງໂຄງການຍັງຈະໄດ້ຄົ້ນຄ້ວາ ແລະ ຈັດສັນໃຫ້ແກ່ບັນດາຫົວໜ່ວຍ SME  ໃນແຂວງຕ່າງໆຕາມຄວາມເໝາະສົມຕື່ມອີກ.

ໃນໂອກາດນີ້,  ທ່ານໄດ້ສະແດງຄວາມຊົມເຊີຍຕໍ່ກັບອົງການແຮງງານສາກົນ ທີ່ໄດ້ພັດທະນາປື້ມຄູ່ມືສໍາລັບຝຶກອົບຮົມໄດ້ສໍາເລັດໃນເບື້ອງຕົ້ນ ແລະ ເຊື້່ອໝັ້ນວ່າຄູ່ມືດັ່ງກ່າວຈະສາມາດຕອບສະໜອງກັບເງື່ອນໄຂຕົວຈິງໃນປະຈຸບັນ. ພ້ອມດຽວກັນນັ້ນ, ທ່ານໄດ້ສະແດງຄວາມຂອບໃຈມາຍັງທະນະຄານໂລກ ທີ່ໃຫ້ການສະໜັບສະໜູນໃນວຽກງານດັ່ງກ່າວດ້ວຍດີຕະ ຫຼອດມາ ແລະ ຫວັງເປັນຢ່າງຍິ່ງວ່າຈະສືບຕໍ່ໃຫ້ການສະໜັບສະໜູນໃນອະນາຄົດຕໍ່ໄປ.

ນອກຈາກນີ້, ທ່ານ ຊາວລີ ຮູຣິ (Sauli Hurri) ຫົວໜ້າທີມງານ, ອົງການແຮງງານສາກົນ ກໍໄດ້ນໍາສະເໜີຕໍ່ກັບແຜນການຈັດຕັ້ງປະຕິບັດແຜນງານສ້າງຄວາມເຂັ້ມແຂງໃຫ້ວິສາຫະກິດຂະໜາດນ້ອຍ ແລະ ກາງ ໂດຍສະເພາະແມ່ນວິທີໃນການປັບປຸງຂີດຄວາມສາມາດຂອງຜູ້ໃຫ້ບໍລິການພັດທະນາທຸລະກິດ ແລະ SME.

ສໍາລັບການຈັດຕັ້ງປະຕິບັດແຜນງານສ້າງຄວາມເຂັ້ມແຂງໃຫ້ວິສາຫະກິດຂະໜາດນ້ອຍ ແລະ ກາງ ໃນຄັ້ງນີ້ຈະໄດ້ດໍາເນີນຢູ່ໃນ 3 ແຂວງເປົ້າໝາຍຄື: ນະຄອນຫຼວງວຽງຈັນ, ແຂວງຫຼວງພະບາງ ແລະ ແຂວງຈຳປາສັກ ໂດຍໄດ້ເລີ່ມຈັດຕັ້ງປະຕິບັດມາແຕ່ເດືອນ ມິຖຸນາ 2018 ແລະ ຈະສິ້ນສຸດໃນເດືອນ ມິຖຸນາ ປີ 2019. ອົງການແຮງງານສາກົນ (ILO) ຈະເປັນຜູ້ຮັບຜິດຊອບໃນການຈັດຕັ້ງປະຕິບັດ ໂດຍການປະສານສົມທົບຢ່າງໃກ້ຊິດກັບ ກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າ ແລະ ສູນບໍລິການວິສາຫະກິດຂະໜາດນ້ອຍ ແລະ ກາງ ຂອງສະພາການຄ້າ ແລະ ອຸດສາຫະກຳແຫ່ງຊາດລາວ. ແຜນງານດັ່ງກ່າວໄດ້​ກຳ​ນົດ​ເປົ້າ​ໝາຍເພື່ອບັນລຸໃຫ້ໄດ້ດັ່ງ​ນີ້:

ເປົ້າ​ໝາຍ​​ທີ່ 1:  ​ຜູ້​ບໍ​ລິ​ການດ້ານ​ການ​ພັດ​ທະ​ນາ​ລະ​ກິດ (BDS) ຢ່າງ​ໜ້ອຍ 5 ຫົວໜ່ວຍ ໄດ້​ຮັບ​ການສ້າງ​ຄວາມ​ເຂັ້ມ​ແຂງ/ຍົກລະດັບ​ ເພື່ອສືບຕໍ່ສ້າງຄວາມເຂັ້ມແຂງໃຫ້ແກ່ SME.

ເປົ້າ​ໝາຍ​​ທີ່ 2:  ຫົວໜ່ວຍ SME ຢ່າງໜ້ອຍ 600 ຫົວໜ່ວຍ ໄດ້​ຮັບ​ການ​ສ້າງຄວາມເຂັ້ມແຂງທາງດ້ານທັກສະການຄຸ້ມຄອງບໍລິຫານທຸລະກິດ, ການບໍຫານດ້ານການເງິນ, ລວມເຖິງການບັນຊີ, ການຕະຫຼາດ ແລະ ການຂາຍ ແລະ ສາ​ມາດ​ນຳ​ໃຊ້​ຄວາມ​ຮູ້ ແລະ ທັກສະໃຫມ່ໆນັ້ນໃນການເຮັດທຸລະກິດ/ຂະຫຍາຍທຸລະກິດ​ຂອງ​ຕົນຕໍ່ໄປ.