ທ່ານ ອຸເດດ ສຸວັນນະວົງ, ປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ ພ້ອມດ້ວຍ ທຸລະກິດລາວ ເຂົ້າຮ່ວມກອງປະຊຸມການລົງທຶນສາກົນ ຄັ້ງທີ 8 (8th World Investment Forum 2023)

ແລະ ພົບປະນັກທຸລະກິດລາວ, ໃນລະຫວ່າງວັນທີ 16-20 ຕຸລາ 2023, ທີ່ ເມືອງຫຼວງອາບູດາບີ, ສະຫະລັດອາລັບເອມິເຣດ (UAE).

ເຊິ່ງໃນງານດັ່ງກ່າວນີ້ ທ່ານ ອຸເດດ ສຸວັນນະວົງ ປະທານ ສຄອຊ ແມ່ນໄດ້ຖືກເຊີນເຂົ້າເປັນຜູ້ບັນຍາຍໃນວາລະພິເສດຄືຫົວຂໍ້ ສະພາທີ່ປຶກສາການລົງທຶນ “the Investment Advisory Council” ໂດຍຈັດຂຶ້ນພາຍໃຕ້ຫົວຂໍ້ລວມຂອງການລົງທຶນໃນການພັດທະນາແບບຍືນຍົງ, ເວທີປາໄສດັ່ງກ່າວຈະໄດ້ປຶກສາຫາລື, ແລກປ່ຽນຄວາມຄິດເຫັນລະຫວ່າງ ພາກລັດ-ທຸລະກິດ, ອົງການຈັດຕັງສາກົນ ແລະ ພາກສ່ວນທີ່ກ່ຽວຂ້ອງຕ່າງໆ ໃນການຈະແກ້ໄຂບັນດາສິ່ງທ້າທາຍທີ່ສຳຄັນ ແລະ ການພັດທະນາການລົງທຶນທີ່ເກີດຈາກວິກິດການທົ່ວໂລກໃນປັດຈຸບັນ. ເຊິ່ງມີຄວາມຕ້ອງການລົງທຶນໃນການຄ້ຳປະກັນສະບຽງອາຫານ, ການຫັນປ່ຽນພະລັງງານ, ດ້ານສຸຂະພາບ, ການປັບປຸງຂອງຕ່ອງໂສ້ເພື່ອຂະຫຍາຍຕົວທາງດ້ານການສະໜອງ ແລະ ຜະລິດຕະພັນ ໂດຍສະເພາະແມ່ນປະເທດທີ່ທຸກຍາກ ພ້ອມການສຸມໃສ່ຊຸກຍູ້ການລົງທຶນ ແລະ ສະໜອງດ້ານການເງິນຂະເເໜງການດິນຟ້າອາກາດ.