ຈຸດປະສົງຂອງກອງປະຊຸມ ແມ່ນເພື່ອສຶກສາເກັບກໍາຂໍ້ມູນຂ່າວສານຕ່າງໆກ່ຽວກັບການຮ່ວມມືທາງດ້ານການຄ້າ – ການລົງທຶນ, ນໍາເຂົ້າ – ສົ່ງອອກ, ການສຶກສາ ແລະ ອື່ນໆ ເພື່ອໃຫ້ພາກທຸລະກິດຂອງທັງສອງຝ່າຍໄດ້ຮັບຜົນປະໂຫຍດສູງສຸດ.

ທ່ານ ອຸເດດ ສຸວັນນະວົງ ກ່າວວ່າ: ກອງປະຊຸມຄັ້ງນີ້ ເພື່ອແລກປ່ຽນເຊື່ອມໂຍງທຸລະກິດຢູ່ລາວ ແລະ ຈີນ ເພື່ອຟື້ນຟູເສດຖະກິດທຸກຂະແໜງການ ກະສິກໍາ ອຸດສາຫະກໍາຕ່າງໆໄດ້ຮັບການພັດທະນາໄວຂຶ້ນ, ພ້ອມກັນນັ້ນ ສປປ ລາວ ກໍຈະເປັນເຈົ້າພາບປະທານກອງປະຊຸມອາຊຽນ ໃນປີ 2024, ດັ່ງນັ້ນຖືເປັນໂອກາດດີທີ່ທາງສະພາທຸລະກິດການຄ້າຈີນ – ອາຊຽນ ໄດ້ມາປຶກສາຫາລືການເຮັດວຽກຮ່ວມກັນ. ໃນຕໍ່ໜ້າພວກເຮົາຍັງຈະມີກິດຈະກໍາຮ່ວມກັນໃນການສ້າງເວທີທຸລະກິດ ລາວ – ຈີນ ຈໍານວນໜຶ່ງ ແລະ ກິດຈະກຳອື່ນໆປິ່ນອ້ອມ.”

ທ່ານ ຊູ ນິງນິງ ກ່າວວ່າ: ການພັດທະນາເສດຖະກິດ ລະຫວ່າງ ສອງປະເທດລາວ – ຈີນ ມີທ່າແຮງຫຼາຍດ້ານທັງສອງປະເທດມີການພັດທະນາໂດຍອາໄສສັນຍາ, ອະນຸສັນຍາພາກພື້ນ ແລະ ສັນຍາອື່ນໆ ໂດຍພັດທະນາລົງເລິກດ້ານເສດຖະກິດ ນະວັດຕະກໍາຈະເປັນການຂະຫຍາຍສາຍພົວພັນການຮ່ວມມືຍຸດທະສາດຮອບດ້ານ ທັງເປັນນະໂຍບາຍໃນການປະຕິບັດໂຕຈິງ ກ່ຽວກັບການສ້າງຄູ່ຮ່ວມຊາຕາກໍາລະຫວ່າງ ລາວ – ຈີນ ລົງເລິກການຮ່ວມມືແບບຮູບປະທໍາໃຫ້ປາກົດຜົນເປັນຈິງ ລວມທັງພັດທະນາຂົງເຂດເສດຖະກິດກໍ່ສ້າງເສັ້ນທາງລົດໄຟ ລາວ – ຈີນ ໃຫ້ເປັນເສັ້ນທາງ ທາງດ້ານເສດຖະກິດ. ນອກຈາກນີ້ຄວນສ້າງສະພາບແວດລ້ອມການດໍາເນີນທຸລະກິດ, ຖືເອົາການຮ່ວມມືດ້ານອຸດສາຫະກໍາເປັນສິ່ງສໍາຄັນທີ່ສຸດ ໂດຍຜ່ານການປັບປຸງຂອບສັນຍາການຄ້າເສລີ, ນອກຈາກນີ້ໃຫ້ເພີ່ມທະວີຮ່ວມມືທາງດ້ານຂະແໜງການອຸດສາຫະກໍາໃຫ້ເປັນຕ່ອງໂສ້ ເພື່ອຊຸກຍູ້ ແລະ ພັດທະນາອຸດສາຫະກໍາລະຫວ່າງສອງປະເທດ.

ໃນປະເທດຈີນ ກໍໄດ້ມີສະມາຄົມທຸລະກິດການຄ້າຂະແໜງການຕ່າງໆ 50 ກວ່າສະມາຄົມ ພວກເຮົາຍິນດີປະສານງານກັບສະພາການຄ້າ ແລະ ອຸດສາຫະກໍາແຫ່ງຊາດລາວ ລວມທັງສະມາຄົມຕ່າງໆຂອງລາວ ເພື່ອມີຂໍ້ສະເໜີໃຫ້ກັບລັດຖະບານປັບປຸງນະໂຍບາຍຂໍ້ແນະນໍາທີ່ດີເພື່ອດໍາເນີນທຸລະກິດ.