ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ແລະ ສູນບໍລິການ ອະຊີວະສຶກສາແບບຄວບຄູ່ (ອສຄ) ໄດ້ເປີດຊຸດຝຶກອົົບຮົມ “ຄູຝຶກຂອງສະຖານປະກອບການ (In-Company Trainer Training)”

ໃນວັນທີ 13-15 ກຸມພາ 2024 ທີ່ ຫ້ອງການສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ), ພາຍໃຕ້ການສະໜູບສະໜູນຂອງໂຄງການ ພັດທະນາອາຊີວະສຶກສາ ໃນ ສປປ ລາວ (GIZ-VELA Project), ໃຫ້ກຽດກ່າວເປີດຊຸດຝຶກອົບຮົມຄັ້ງນີ້້ ໂດຍ ທ່ານພູໄຊ ເທບພະວົງ, ເລຂາທິການ ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ມີຜູ້ເຂົ້າຮ່ວມຕາງໜ້າຈາກສະມາຍົມອຸດສຫະກຳຍານພາຫະນະລາວ, ສະມາຄົມຜະລິດ ແລະ ປຸງແຕ່ງກະສິກຳລາວ, ບໍລິສັດ ຮຸ່ງອາລຸນ ໂລຈີສຕິກ ຈຳກັດຜູ້ດຽວ, ໂຮງງານນຳ້ດື່ມວາຣີ, ບໍລິສັດ ໂຕໂຍຕ້າລາວ ບໍລິການຈຳກັດ, ເມືອງລາວຟາມ, ປາຫວານຟາມ, ບໍລິສັດ ຄຳມະນີ ເຈເນີຣອນ ເຊີວິດ ສ່ວນບຸກຄົນ ແລະ ພະນັກງານ ສຄອຊ, ລວມຜູ້ເຂົ້າຮ່ວມທັງໝົດ 18 ທ່ານ.

ການຝຶກອົບຮົມໃນສະຖານປະກອບການ ຫລື ບໍລິສັດແມ່ນເຄື່ອງມືທີ່ສໍາຄັນໃນການພັດທະນາທັກສະການປະຕິບັດງານຂອງພະນັກງານ ແລະ ກ່ຽວຂ້ອງກັບການຝຶກອົບຮົມທັງໜົດທີ່ດໍາເນີນການໃນສະຖານປະກອບການ ເຊັ່ນ: ການຝຶກອົບຮົມເພື່ອເພີ່ມຄວາມຮູ້ ແລະ ທັກສະ ໃຫ້ພະນັກງານທີ່ຢູ່ປະຈໍາ, ການຝຶກອົບຮົມເວລາຮັບຮັບພະນັກງານໃໝ່, ການຝຶກອົບຮົມໃນໜ້າວຽກຕົວຈິງ ແລະ ການຝຶກນັກສຶກສາຝຶກງານ. ເຊິ່ງສາມາດຮວມເຂົ້າກັບຮູບແບບ ການຮຽນ-ການສອນອາຊີວະສຶກສາແບບຄວບຄູ່ ທີ່ສາມາດເບິ່ງເຫັນຜົນປະໂຫຍດ ແລະ ລວມເອົາການຝຶກອົບຮົມພາຍໃນບໍລິສັດເປັນສ່ວນນຶ່ງຂອງ ຍຸດທະສາດການພັດທະນາຊັບພະຍາກອນມະນຸດ ທີ່ນໍາໄປສູ່ຄວາມສໍາເລັດຂອງສະຖານປະກອບການ.

ຄຸນນະພາບ ແລະ ຜົນໄດ້ຮັບຂອງການຝຶກອົບຮົມໃນ ສະຖານປະກອບການ ຂຶ້ນກັບຄວາມສາມາດຂອງຜູ້ທີ່ຮັບຜິດຊອບໃນການຖ່າຍທອດຄວາມຮູ້ ແລະ ທັກສະ ເຊັ່ນ: ຄູຝຶກ, ຫົວໜ້າງານ, ນາຍຊ່າງເທັກນິກທີ່ມີສີມື, ພະນັກງານ ແລະ ບຸກຄະລາກອນຜູ້ອື່ນໆທີ່ມີສ່ວນກ່ຽວຂ້ອງໃນການຝຶກອົບຮົມການສອນ ຫລື ການໃຫ້ຄໍາປຶກສາ, ຄູຝຶກໃນສະຖານປະກອບການ ແມ່ນອ້າງອີງເຖິງກຸ່ມຄົນທັງໝົດທີ່ກ່າວມາຂ້າງເທິງ.

ຈຸດປະສົງຂອງການເປີດຝຶກອົບຮົມນີ້ເພື່ອສ້າງຂີດຄວາມສາມາດ ໃນດ້ານບົດບາດ ແລະ ໜ້າທີ່ການເປັນຄູຝຶກໃນສະຖານປະກອບການ, ການບໍລິຫານຈັດການ ການຮຽນ-ການສອນຜູ້ໃຫ່ຍ, ການວິເຄາະໜ້າວຽກ ແລະ ຄວາມຕ້ອງການ ການຮຽນຮູ້, ການວາງແຜນ ແລະ ກະກຽມການຝຶກອົບຮົມ, ທັກສະໃນການດໍາເນີນການຝຶກອົບຮົມ, ການປະເມີນຜົນ ແລະ ພັດທະນາການຝຶກອົບຮົມ ຢ່າງມີປະສິດທິຜົນ. ລວມທັງບົດບາດກ່ຽວຂ້ອງກັບການຈັດການຮຽນ-ການສອນ ແລະ ຝຶກອາຊີບ ເພື່ອໃຫ້ບັນລຸຈຸດປະສົງເປົ້າໝາຍຂອງຫລັກສູດຮູບແບບ ອາຊີວະສຶກສາແບບຄວບຄູ່.