ສະພາການຄ້າ ແລະ ອຸດສາຫະກໍາແຫ່ງຊາດລາວ (ສຄອຊ) ໂດຍຮ່ວມກັບ ສະພາການຄ້າ ແລະ ອຸດສາຫະກຳ ແຂວງວຽງຈັນ (ສຄອ.ວຈ) ໄດ້ຈັດກອງປະຊຸມປຶກສາຫາລື ໜ່ວຍງານພາກທຸລະກິດທ່ອງທ່ຽວ ຂອງແຂວງວຽງຈັນ ພາຍໄຕ້ກົນໄກກອງປະຊຸມທຸລະກິດລາວ (LBF), ໂດຍການເປັນປະທານຂອງ ທ່ານ ຂັນທອງ ດວງປະເສີດ ປະທານສະພາການຄ້າ ແລະ ອຸດສາຫະກຳ ແຂວງວຽງຈັນ, ນອກຈາກນີ້ ຍັງມີຜູ້ເຂົ້າຮ່ວມຕາງໜ້າຈາກສະມາຄົມ-ກຸ່ມທຸລະກິດ ແລະ ຫົວໜ່ວຍທຸລະກິດ ທີ່ຕິດພັນກັບຂະແໜງການທ່ອງທ່ຽວ ຈຳນວນ 20 ກ່ວາທ່ານ.

ຈຸດປະສົງຂອງກອງປະຊຸມຄັ້ງນີ້ແມ່ນເພື່ອ ເປັນການປຶກສາຫາລື, ແລກປ່ຽນຂໍ້ຄິດເຫັນ, ປະສົບການສິ່ງທ້າທ້າຍຕົວຈິງທີ່ຂະແໜງການພາຍໃນແຂວງພົບພໍ້ ເປັນຕົ້ນແມ່ນ ຄວາມບໍ່ສະຖຽນລະພາບຂອງໄຟຟ້າ-ໜ່ວຍບໍລິການຊັກຊ້າ, ການຂາດແຄນບຸກຂະລາກອນທີ່ມີຄຸນນະພາບ, ບັນຫາເລື່ອງຂີ້ເຫຍື້ອພາຍໃນຕົວເມືອງ, ບັນຫາພື້ນຖ່ານໂຄງລ່າງບໍ່ສະດວກ-ບໍ່ເປັນລະບຽບ, ຄ່າບໍລິການຂົນສົ່ງນັກທ່ອງທ່ຽວຍັງບໍ່ເປັນເອກະພາບ-ບໍ່ເປັນລະບຽບ, ບັນຫານ້ຳປາປາບໍ່ພຽງພໍຕໍ່ຄວາມຕ້ອງການ, ບັນຫາໃກ້ນຳທ່ຽວບໍ່ຖືກກົດລະບຽບ ຫຼື ໃກ້ນຳທ່ຽວເຖື່ອນ, ປ່າໄມ້ຖືກທຳລາຍຕາມຈອມພູທິວທັດທຳມະຊາດ ແລະ ອື່ນໆ

ກອງປະຊຸມດັ່ງກ່າວໄດ້ດຳເນີນໄປຢ່າງຝົດຟື້ນ, ມີລັກສະນະປຶກສາຫາລືທີ່ສ້າງສັນ ຍັງໄດ້ຍົກເອົາບັນຫາທີ່ເປັນບຸລິມະສິດຂື້ນພາຍໃນກຸ່ມດັ່ງກ່າວ, ບາດກ່າວຕໍ່ໄປ ກອງເລຂາຈະໄດ້ສັງລວມລາຍລະອຽດບັນຫາ ແລະ ຂໍ້ສະເໜີບຸລິມະສິດ ເພື່ອຄັດຈ້ອນເອົາບັນຫາສະເໜີໃຫ້ແກ່ພະແນກການທີ່ກ່ຽວຂ້ອງເພື່ອພິຈາລະນາ ແລະ ແນວທາງໃນການແກ້ໄຂບັນຫາ.

ກອງປະຊຸມຄັ້ງນີ້ໄດ້ຮັບການສະໜັບສະໜູນໂດຍ ອົງການ ແພລນສາກົນ ປະຈຳ ສປປ ລາວ ໂດຍຜ່ານໂຄງການ SUSTOUR LAOS.