ກອງປະຊຸມ ປຶກສາຫາລື ພາກລັດ-ພາກທຸລະກິດ (LPPD) ໃນຂະແໜງການການທ່ອງທ່ຽວ ຂອງແຂວງຫຼວງພະບາງ, ຈັດຂື້ນໃນຕອນເຊົ້າ ວັນອັງຄານ, ວັນທີ 04 ເມສາ 2023, ທີ່ ໂຮງແຮມ ສຸພັດຕຣາ ຫຼວງພະບາງ, ແຂວງຫຼວງພະບາງ ທີ່ຜ່ານມາ.ກອງປະຊຸມດັ່ງກ່າວໄດ້ຮັບກຽດເປັນປະທານຂອງ ທ່ານ ປອ. ນ. ວາລີ ເວດສະພົງ, ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ຄະນະຜູ້ຮັບຜິດຊອບວຽກງານ ກອງປະຊຸມນັກທຸລະກິດລາວ, ສຄອຊ ຮ່ວມກັບ ທ່ານ ນ. ສິລິພອນ ສຸພັນທອງ, ຄະນະປະຈຳພັກແຂວງ, ຮອງເຈົ້າແຂວງ ແຂວງຫຼວງພະບາງ, ມີບັນດາຜູ້ເຂົ້າຮ່ວມຈາກ ສະພາປະຊາຊົນແຂວງຫຼວງພະບາງ, ຫົວນ້າກົມກົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າ, ສະພາການຄ້າ ແລະ ອຸດສາຫະກຳແຂວງຫຼວງພະບາງ, ພ້ອມທັງຕາງໜ້າຈາກຂະແໜງການທີ່ກ່ຽວຂ້ອງໃນຂະແໜງການທ່ອງທ່ຽວພາກລັດ-ພາກທຸລະກິດ.

ກອງປະຊຸມໃນຄັ້ງນີ້ ກໍ່ເພື່ອລາຍງານບັນຫາທີ່ໄດ້ຮັບການແກ້ໄຂ, ຄວາມຄືບໜ້າຂອງການແກ້ໄຂບັນຫາທີ່ຍັງຄົງຄ້າງພາຍໃນແຂວງ ເພື່ອຂໍທິດຊີ້ນຳຈາກທ່ານຮອງເຈົ້າແຂວງ ໃນການຫາທາງອອກ ແລະ ຂໍ້ສະຫຼຸບໃນການຈັດຕັ້ງປະຕິບັດຢ່າງມີປະສິດທິຜົນຮ່ວມກັນ, ທີ່ນອນຢູ່ໃນຕ່ອງໂສ້ອຸດສາຫະກໍາການທ່ອງທ່ຽວທີ່ຈະນໍາສະເໜີຕໍ່ພາກລັດທີ່ກ່ຽວຂ້ອງ ນຳໄປພິຈາລະນາ ແລະ ແກ້ໄຂຢູ່ຂັ້ນແຂວງ ແລະ ຂັ້ນສູນກາງ ພ້ອມທັງສ້າງຄວາມພ້ອມໃຫ້ພາກທຸລະກິດຂະແໜງການທ່ອງທ່ຽວອີກດ້ວຍ