ໂຄງການໃໝ່ນີ້ມີເປົ້າໝາຍເພື່ອຫຼຸດຜ່ອນຄວາມສ່ຽງຂອງແຮງງານຢູ່ພູພຽງບໍລະເວນໂດຍຜ່ານການຝຶກອົບຮົມ ແລະສ້າງຄວາມເຂັ້ມແຂງໃຫ້ກັບອົງການຈັດຕັ້ງຂັ້ນຮາກຖານ

ແຮງງານໃນຂະແໜງກາເຟແລະຊາຂອງສປປລາວຈະໄດ້ຮັບຜົນປະໂຫຍດຈາກການເຂົ້າເຖິງການປົກປ້ອງທາງສັງຄົມທີ່ດີຂຶ້ນ ແລະ ຄວາມປອດໄພ ແລະ ສຸຂະພາບແຮງງານຈະໄດ້ຮັບການປັບປຸງຂື້ນພາຍຫຼັງການເປີດໂຕຂອງໂຄງການໃໝ່ຂອງອົງການແຮງງານສາກົນທີ່ໄດ້ຮັບທຶນຈາກສະຫະພາບເອີຣົບ (EU).

ໂຄງການ“ຫຼຸດຜ່ອນຄວາມສ່ຽງໃນສປປລາວ: ສ້າງຄວາມກ້າວໜ້າໃຫ້ແກ່ລະບົບປົກປ້ອງສັງຄົມ ແລະ ສິດທິດ້ານແຮງງານສຳລັບຊາວກະສິກອນໃນຂະແໜງກາເຟແລະຊາຂອງສປປລາວ(SOLAR)” ໄດ້ເປີດເປັນທາງການໃນມື້ວັນທີ 28 ເມສາ 2022 ທີ່ນະຄອນຫຼວງວຽງຈັນ. ໂດຍການເຂົ້າຮ່ວມຈາກຕາງໜ້າກະຊວງແຮງງານແລະສະຫວັດດີການສັງຄົມ, ສະພາການຄ້າແລະອຸດສາຫະກຳແຫ່ງຊາດລາວ, ສູນກາງສະຫະພັນກຳ ມະບານລາວ, ອົງການແຮງງານສາກົນ ແລະ ສະຫະພາບເອີຣົບ.

ໂຄງການດັ່ງກ່າວຈະສຸມໃສ່ສາມເມືອງຂອງພູພຽງບໍລະເວນ, ເຊິ່ງເປັນທີ່ຮູ້ຈັກດີວ່າເຂດດັ່ງກ່າວນີ້ສາມາດຜະລິດອ ແລະ ສົ່ງອອກກາເຟ ແລະຊາ ທີ່ມີຄຸນນະພາບສູງ. ເຖິງຢ່າງໃດກໍ່ຕາມ, ແຮງງານສ່ວນຫຼາຍແມ່ນອາໄສການຈ້າງງານແບບນອກລະບົບແລະຕາມລະດູການ ໂດຍປົກກະຕິແລ້ວເຂົາເຈົ້າຂາດສັນຍາການຈ້າງງານທີ່ຖືກຕ້ອງ, ການຄຸ້ມຄອງດ້ານປະກັນສັງຄົມ ແລະ ປະສົບກັບບັນຫາການລະເມີດສິດທິແຮງງານ, ຄວາມຮຸນແຮງ ແລະ ການລ່ວງລະເມີດທາງເພດ. ສ່ວນຫຼາຍແລ້ວແຮງງານຈະປະສົບກັບອຸປະຕິເຫດ ແລະ ພະຍາດຕ່າງໆຍ້ອນການຍົກເຄື່ອງໜັກ, ການນຳໃຊ້ເຄື່ອງຈັກທີ່ບໍ່ປອດໄພ, ງູແລະແມງໄມ້ກັດ, ແລະການສຳຜັດກັບຢາປາບສັດຕູພືດ.

ບັນດາກິດຈະກຳຕ່າງໆຈະຊ່ວຍໃຫ້ແຮງງານ-ໂດຍສະເພາະແມ່ນແຮງງານນອກລະບົບແລະແມ່ຍິງສາມາດເຂົ້າເຖິງປະກັນສັງຄົມແຫ່ງຊາດ, ຄວາມປອດໄພແລະສຸຂະພາບແຮງງານຈະໄດ້ຮັບການປັບປຸງ. ການປູກຈິດສໍານຶກຈະໄດ້ຮັບການຍົກສູງຂຶ້ນລະຫວ່າງຜູ້ອອກແຮງງານແລະຜູ້ຕາງຫນ້າຂອງເຂົາເຈົ້າແລະຄວາມສາມາດຂອງອົງການຈັດຕັ້ງສັງຄົມແລະພາກສ່ວນອື່ນໆໃນຂັ້ນຮາກຖານຈະໄດ້ຮັບການຍົກລະດັບຂຶ້ນ. ໂຄງການດັ່ງກ່າວນິ້ຍັງແນໃສ່ການເສີມຂະຫຍາຍກົນໄກຮ່ວມມືໃຫ້ແກ່ຜູ້ອອກແຮງງານໃນການແບ່ງປັນບັນຫາ, ຄວາມກັງວົນຂອງເຂົາເຈົ້າ ແລະ ໃຫ້ເຂົາເຈົ້າຮັບຮູ້ສິດທິດ້ານແຮງງານຂອງເຂົາເຈົ້ານຳອີກ.

ໃນພິທີເປີດ, ທ່ານ ປະເດີມພອນ ສົນທະນີ, ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມໃຫ້ຮູ້ວ່າ: ໂຄງການດັ່ງກ່າວຈະຊ່ວຍໃຫ້ພວກເຮົາຮັບປະກັນວ່າຜົນປະໂຫຍດຂອງການຂະຫຍາຍຕົວໃນຂະແຫນງກາເຟ ແລະ ຊາ ທີ່ຈະສົ່ງຜົນໃຫ້ແກ່ການປັບປຸງເງື່ອນໄຂການເຮັດວຽກ ແລະ ປັບປຸງຊີວິດການເປັນຢູ່ຂອງປະຊາຊົນໃນເຂດພູພຽງບໍລະເວນ. ການປົກປ້ອງທາງສັງຄົມແມ່ນຜູ້ອອກແຮງງານທຸກຄົນຈະມີສະພາບການເຮັດວຽກທີ່ປອດໄພ ແລະ ມີ ຄຸນຄ່າ. ພວກເຮົາຈະເຮັດວຽກຮ່ວມກັບຄູ່ຮ່ວມງານສາມຝ່າຍແລະອົງການຈັດຕັ້ງຂັ້ນຮາກຖານເພື່ອປັບປຸງການບໍລິການຂອງພວກເຮົາແລະຮັບປະກັນວ່າແຮງງານຈະສາມາດເຂົ້າເຖິງປັດໃຈຕ່າງໆເຫຼົ່ານີ້ຢ່າງທົ່ວເຖິງ.”

ທ່ານແກຼມບັກເລ, ຜູ້ອໍານວຍການຫ້ອງການອົງການແຮງງານສາກົນຮັບຜິດຊອບປະເທດໄທ, ກຳປູເຈຍແລະ ສປປ ລາວ ກ່າວວ່າ: ລັກສະນະສະເພາະຂອງໂຄງການນີ້ແມ່ນພວກເຮົາຈະເຮັດວຽກຮ່ວມກັບຄູ່ຮ່ວມງານຕັ້ງແຕ່ກະຊວງຈົນເຖິງອົງການຈັດຕັ້ງຂັ້ນພື້ນຖານເພື່ອເຂົ້າເຖິງຊາວກະສິກອນໃນສວນກາເຟແລະຊາ. ພວກເຮົາສາມາດເຊື່ອມໂຍງນະໂຍບາຍກັບກິດຈະກຳຕ່າງໆຢູ່ຂັ້ນຮາກຖານ ແລະ ໂດຍການການຝຶກອົບຮົມໃຫ້ກຸ່ມແຮງງານ, ຫຼຸດຜ່ອນຄວາມສ່ຽງຂອງເຂົາເຈົ້າ”

ໂຄງການທີ່ໄດ້ຮັບທຶນຈາກສະຫະພາບເອີຣົບນີ້ຈະເຮັດວຽກຮ່ວມກັບລັດຖະບານ (ອົງການປະກັນສັງຄົມລາວແຫ່ງຊາດ ແລະ ກະຊວງແຮງງານ ແລະສະຫວັດດີການສັງຄົມ, ແຂວງ ແລະ ເມືອງ), ຕາງໜ້າຜູ້ອອກແຮງງານ (ສະຫະພັນກຳມະ ບານລາວ, ສະຫະພັນແມ່ຍິງລາວ, ແຮງງານນອກລະບົບ ຫຼືຊາວກະສິກອນ), ແລະ ຕາງໜ້າຜູ້ໃຊ້ແຮງງານ(ສະພາການຄ້າ ແລະ ອຸດສາຫະກຳແຫ່ງຊາດລາວ, ສະມາຄົມກາເຟລາວ, ແລະ ສະມາຄົມຊາທີ່ສ້າງຕັ້ງໃໝ່).

ໂຄງການນີ້ຈັດຕັ້ງປະຕິບັດຮ່ວມກັນໂດຍອົງການແຮງງານສາກົນ ແລະ Oxfam ຮ່ວມກັບອໍານາດການປົກຄອງທ້ອງຖິ່ນແລະອົງການຈັດຕັ້ງຂັ້ນຮາກຖານ. ອົງການຈັດຕັ້ງເຫຼົ່ານີ້ຈະໄດ້ຮັບການສະຫນັບສະຫນູນໂດຍຜ່ານການຝຶກອົບຮົມ, ການປຶກສາຫາລືແລະການຊ່ວຍເຫຼືອດ້ານວິຊາການໃນຂົງເຂດຕ່າງໆເຊັ່ນສິດທິຂອງແຮງງານແມ່ຍິງ, ການປົກປ້ອງທາງສັງຄົມ, ຄວາມປອດໄພ ແລະ ສຸຂະພາບແຮງງານແລະສິດທິແຮງງານ ເພື່ອພັດທະນາຄວາມສາມາດຂອງເຂົາເຈົ້າ ແລະ ໃຫ້ການຊ່ວຍເຫຼືອຜູ້ອອກແຮງງານໃນຂົງເຂດວຽກຂອງຕົນ ແລະ ໄດ້ຮັບການສະຫນັບສະຫນູນຈາກສະຫະພາບເອີຣົບ ແລະ ສອດຄ່ອງກັບຈຸດປະສົງຂອງສະຫະພາບເອີຣົບໃນການສະຫນັບສະຫນູນຫົວໜ່ວຍທຸລະກິດແລະການເຮັດວຽກທີ່ມີຄຸນຄ່າໃນຕ່ອງໂສ້ການຜະລິດ. ທ່ານນາງອີນາມາຈິວລີໂອນິເຕິ, ເອກອັກຄະລັດຖະທູດສະຫະພາບເອີຣົບປະຈຳສປປລາວໄດ້ສະແດງຄວາມຊົມເຊີຍຕໍ່ “ການຮ່ວມມືທີ່ມີໝາກຜົນລະຫວ່າງສະຫະພາບເອີຣົບ, ອົງການແຮງງານສາກົນແລະກະຊວງແຮງງານ ແລະ ສະຫວັດດີການສັງຄົມ”, ແລະເນັ້ນໃສ່ “ການເພີ່ມມູນຄ່າຂອງໂຄງການໃໝ່ນີ້ຈະເປັນການເສີມສ້າງການຮ່ວມມືໃນຂົງເຂດກະສິກຳ, ປ່າໄມ້ ແລະ ໂພຊະນາການ, ພ້ອມທັງການສະໜັບສະໜູນຂອງສະຫະພາບເອີຣົບຕໍ່ການຄ້າທີ່ຍຸດຕິທຳກັບເອີຣົບ.”

(ຂ່າວສານ ຮສສ)