ວັນທີ 20 ກຸມພາ 2018 ທີ່ໂຮງແຮມ Crowne Plaza Vientiane,  ກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ ຮ່ວມກັບ ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອ​ຊ) ແລະ ໄດ້ຈັດກອງປະຊຸມປຶກສາຫາລືລະຫວ່າງ ຂະ​ແໜງ​ການ​ທີ່​ກ່ຽວ​ຂ້ອງ ​ຂອງພາກລັດ ແລະ ພາກທຸລະກິດ ຂຶ້ນ

ໂດຍ ການເປັນປະທານຮ່ວມຂອງທ່ານ ​ສິລິສໍາພັນ ວໍຣະຈິດ, ​ ຫົວໜ້າກົມແຜນການ ແລະ ການຮ່ວມມື, ກະ​ຊວງ​ອຸດ​ສາ​ຫະ​ກຳ ແລະ​ການ​ຄ້າ,   ແລະ ທ່ານນາງ ວາລີ ເວດຊະພົງ, ຮອງປະທານສະພາການຄ້າ ແລະ ອຸດສາຫະກໍາ ແຫ່ງຊາດລາວ.

ຈຸດປະສົງຂອງກອງປະຊຸມ ແມ່ນເພື່ອເປີດໂອກາດໃຫ້ຕົວແທນໜ່ວຍງານປຶກສາຫາລືພາກທຸລະກິດ ແລະ ບັນດາສະມາຊິກ ໄດ້ຮ່ວມປຶກສາຫາລືກັບໜ່ວຍງານທີ່ກ່ຽວຂ້ອງຂອງລັດຖະບານ ເພື່ອຄົ້ນຄວ້າ ແລະ ແກ້ໄຂ ບັນຫາ ຫຼື ຂໍ້ຂ້ອງໃຈທີ່ພາກທຸລະກິດຍົກຂຶ້ນ ເພື່ອລາຍງານຕໍ່ກອງປະຊຸມທຸລະກິດລາວຄັ້ງທີ11 ທີ່ຄາດ​ວ່າ​ຈະ​ຖືກ​ຈັດ​ຂຶ້ນ ໃນ​ເດືອນ ເມສາ 2018.

ນອກຈາກນີ້ ຜູ້ເຂົ້າຮ່ວມກອງປະຊຸມກໍ່ຄື ຕາງໜ້າພາກທຸລະກິດຂະແໜງການຕ່າງໆ  ກໍ່ໄດ້ຮ່ວມກັນສະເໜີບັນຫາທີ່ພົບພໍ້ໃນການດຳເນີນທຸລະກິດ ເປັນຕົ້ນແມ່ນ ບັນຫາ ການຂໍຈົດທະບຽນວິສາຫະກິດ ແລະ ຂໍໃບອະນຸຍາດດໍາເນີນທຸລະກິດ,          ການດໍາເນີນທຸລະກິດທີ່ບໍ່ໄດ້ຈົດທະບຽນຖືກຕ້ອງຕາມລະບຽບກົດໝາຍ ແລະບໍ່ມີໃບອະນຸຍາດດໍາເນີນທຸລະກິດ,  ນະໂຍບາຍ ສົ່ງເສີມ Startups (E-Commerce) ຈາກລັດຖະບານ, ການຂໍ ວີຊາ ສໍາລັບ ພະນັກງານ ສະພາການຄ້າຕ່າງປະເທດ ປະຈໍາລາວ,  ການສົ່ງເສີມການທ່ອງທ່ຽວ,  ແລະ ບັນຫາ ຄ່າທໍານຽມຂຶ້ນທະບຽນ ອ.ຍ  ແລະ ຄ່າທໍານຽມຈົດເຄື່ອງໝາຍການຄ້າ ແລະ ແພງ ແລະ ບໍ່ເປັນລະບົບ, ເຊິ່ງຂະແໜງການທີ່ກ່ຽວຂ້ອງຂອງລັດຖະບານກໍໄດ້ປະກອບຄຳຄິດຄຳເຫັນຢ່າງກົງໄປກົງມາ ແລະ ຮັບເອົາບັນຫາທີ່ພາກທຸລະກິດສະເໜີໄປຄົ້ນຄວ້າຕື່ມເພື່ອຊອກຫາວິທີແກ້ໄຂຮ່ວມກັນຢ່າງມີປະສິດຕິຜົນ ແລະເພື່ອເຮັດໃຫ້ສະພາບແວດລ້ອມການດໍາເນີນທຸລະກິດ ມີຄວາມຍຸດຕິທໍາ, ໂປ່ງໃສ, ເປັນເອກະພາບກັນ , ມີຂັ້ນຕອນທີ່ສະດວກ ແລະຊັດເຈນຂຶ້ນ, ແລະມີຄ່າໃຊ້ຈ່າຍທີ່ໜ້ອຍລົງ.