ພິທີເປີດງານວາງສະແດງ ຜະລິດຕະພັນລາວ 2019

ໃນວັນທີ 22 ກໍລະກົດ 2019 ທີ່ ສູນການຄ້າລາວ-ໄອເຕັກ (ຕຶກເກົ່າ) ໄດ້ມີ ພິທີເປີດງານວາງສະແດງ ຜະລິດຕະພັນລາວ 2019 ຢ່າງເປັນທາງການ ໂດຍໃຫ້ກຽດເປັນປະທານເປີດງານຂອງ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ.

ງານງານວາງສະແດງ ຜະລິດຕະພັນລາວ 2019 (Made in Laos 2019) ໃນຄັ້ງນີ້ກໍ່ຄືດັ່ງທຸກຄັ້ງຂອງການຈັດງານ, ເຊິ່ງໄດ້ສືບຕໍ່ລະດົມຂົນຂວາຍຜູ້ປະກອບການ, ຜູ້ຜະລິດສິນຄ້າໃນທຸກຂະແໜງໃນທົ່ວປະເທດ ເພື່ອນຳເອົາຜະລິດຕະພັນທີ່ເປັນເອກະລັກຂອງ ແຕ່ລະແຂວງມາວາງສະແດງ, ໂຄສະນາ ແລະ ຈຳໜ່າຍເພື່ອແນໃສ່ຍົກລະດັບການຜະລິດ – ການຈໍາໜ່າຍ ພາຍໃນໃຫ້ນັບມື້ນັບຂະຫຍາຍຕົວ, ມີຄຸນນະພາບ,ໄດ້ມາດຕະຖານ ແລະກ້າວຂື້ນສູ່ລະດັບ ສາກົນ ແລະ ເປັນການສ້າງຄວາມພາກພູມໃຈຕໍ່ສິນຄ້າ-ຜະລິດຕະພັນທີ່ຜະລິດໃນລາວ ແລະ ກໍ່ແມ່ນກິດຈະກຳໜື່ງຂອງພາກທຸລະກິດ ເພື່ອສະໜັບສະໜູນ ປີທ່ອງທ່ຽວລາວ – ຈີນ ໃນການດືງດູດນັກທ່ອງທ່ຽວ ແລະ ນັກລົງທຶນ ເຂົ້າມາລາວໃຫ້ນັບມື້ນັບຫຼາຍຂື້ນ. ເຊິ່ງງານໄດ້ເລີ່ມໃຫ້ວາງສະແດງ ແລະຈຳ ໜ່າຍສິນຄ້າແຕ່ວັນທີ 20/07/2019 ເປັນຕົ້ນມາ ແລະ ດຳເນີດການເປັນເວລາ 9ວັນ ເລີ່ມແຕ່ວັນທີ 20-28 ກໍລະກົດ 2019 ທີ່ ສູນການຄ້າລາວ-ໄອເຕັກ(ຕຶກເກົ່າ).

ທ່ານ ນາງ ຈັນທະຈອນ ວົງໄຊ, ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ລາຍງານສະພາບການຂອງງານ ແລະ ໄດ້ກ່າວວ່າ: “ຂ້າພະເຈົ້າຕີລາຄາສູງ ແລະ ເຊື່ອໝັ້ນວ່າງານໃນຄັ້ງນີ້ຈະເປັນນິມິດໝາຍອັນສຳຄັນອີກ ບາດກ້າວໜື່ງໃນການປະກອບສ່ວນສົ່ງເສີມການຂະຫຍາຍຕົວຂອງເສດຖະກິດຂອງ ສປປ ລາວ ໂດຍສະເພາະແມ່ນການຮ່ວມມື ທາງດ້ານການຄ້າ ແລະ ການລົງທຶນ ລະຫວ່າງທຸລະກິດດ້ວຍກັນ ແລະ ເປັນການສົ່ງເສີມຜະລິດຕະພັນລາວໃຫ້ມີການພັດທະນາຂື້ນເລື້ອຍໆ ທາງດ້ານຄຸນນະພາບ ໃຫ້ທຽບເທົ່າສາກົນເທື່ອລະກ້າວ ແລະ ສາມາດຕໍ່ຍອດຜະລິດຕະພັນໃຫ້ສາມາດສົ່ງອອກຕະຫລາດສາກົນໃຫ້ນັບມື້ນັບຫຼາຍຂຶ້ນ, ປະກອບສ່ວນສ້າງສາພັດທະນາປະເທດຊາດ ໃຫ້ນັບມື້ນັບຈະເລີນຮຸ່ງເຮືອງ”.

ໃນປີນີ້ ສາມາດລະດົມໄດ້ທັງໝົດ 171 ຫ້ອງ ຈາກ 117 ບໍລິສັດ ເຂົ້າຮ່ວມ ເຊິ່ງມາຈາກ 17ແຂວງ ( ມີພຽງແຕ່ແຂວງ ເຊກອງ ທີ່ບໍ່ໄດ້ເຂົ້າຮ່ວມ). ງານວາງສະແດງໃນປີນີ້ ເຫັນວ່າມີຜູ້ປະກອບການມີຄວາມສົນໃຈ ແລະ ເຂົ້າຮ່ວມງານຫລາຍຂື້ນຖ້າທຽບໃສ່ປີຜ່ານມາເຖິງວ່າຈຳນວນຫ້ອງວາງສະແດງຈະຫຼຸດລົງ, ຈາກ 180 ຫ້ອງ ມາເປັນ 172 ຫ້ອງ ແຕ່ ຈຳນວນບໍລິສັດ, ຜູ້ປະກອບການແມ່ນ ມີຈຳນວນເພິ່ມຂື້ນຈາກ 115 ບໍລິສັດ ມາເປັນ 117 ບໍລິສັດ. ພ້ອມດຽວກັນນີ້ຂະແໜງຜະລິດພັນທີ່ເຂົ້າຮ່ວມກໍ່ມີຄວາມຫຼາກຫຼາຍກ່ວາຄັ້ງຜ່ານມາເຊັ່ນ: ຜົນງານຮູບເງົາລາວ, ຜະລິດຕະພັນທໍ່ນໍ້າລາວ, ເກີບ, ການບໍລິການການຂົນສົ່ງ, ອາຫານ ແລະ ເຄື່ອງດື່ມຕ່າງໆ. ເຖິງວ່າຕົວເລກຈະເພິ່ມຂື້ນຈຳນວນບໍ່ຫຼາຍ, ແຕ່ກໍ່ຖືວ່າໃນປີນີ້ແມ່ນພັດທະນາກ່ວາປີກາຍໃນລະດັບໜື່ງ. ທັງນີ້ກໍ່ຍ້ອນໄດ້ຮັບການຊີ້ນໍາຢ່າງໃກ້ສິດຈາກລັດຖະບານ, ໂດຍສະເພາະ ກະຊວງອຸດສາຫະກຳ ແລະ ການຄ້າ, ພ້ອມດຽວກັນນັ້ນ ກໍ່ຍ້ອນການເປັນເຈົ້າການຮ່ວມກັນ ຂອງ ສຄອ ແຂວງ, ສາມາຄົມ, ກຸ່ມ ທຸະກິດ, ຫົວໜ່ວຍທຸລະກິດ ແລະ ພາກສ່ວນຕ່າງໆ ເຮັດໃຫ້ສາມາດ ລະດົມທຸລະກິດເຂົ້າຮ່ວມ ໄດ້ ຕາມເປົ້າໝາຍ, ຜະລິດຕະພັນຕົ້ນຕໍທີ່ນໍາມາວາງສະແດງລວມມີ:

ຜະລິດຕະພັນທີ່ເດັ່ນຈາກ17 ແຂວງ ລວມມີ: ຊາຜົ້ງສາລີ, ຜ້າຝ້າຍບໍ່ແກ້ວ, ຫັດຖະກໍາ ອຸດົມໄຊ, ສິ້ນຊໍາເໜືອ, ຫັດຖະກຳຫຼວງພະບາງ, ເຂົ້າໄກ່ນ້ອຍຊຽງຂວາງ, ຫວາຍແຂວງວຽງຈັນ, ໝໍ້ແປງ ບໍລິຄຳໄຊ, ເສັ້ນລ້ອນໄຊສົມບູນ, ກາເຟປາກຊ່ອງ, ໄມ້ແກະສະຫຼັກອັດຕະປື ແລະ ສິນຄ້າເອກະລັກອື່ນໆ ຂອງແຕ່ລະແຂວງເຊິ່ງໄດ້ຄັດຈ້ອນມາວາງສະແດງໃນງານຄັ້ງນີ້. ສິນຄ້າຕົ້ນຕໍລວມມີ:
ຜະລິດຕະພັນຫັດຖະກຳ
ເຄື່ອງປະດັບ
ເຂົ້າ, ຊາ, ກາເຟ
ຜະລິດຕະພັນອາຫານ, ເຄື່ອງດື່ມ
ຜະລິດຕະພັນໄມ້ແປຮູບ, ເຟີນີເຈີ້ໄມ້, ເຄື່ອງຕົບແຕ່ງທີ່ຜະລິດຈາກໄມ້
ຜະລິດຕະພັນຮູບເງົາຂອງລາວ
ການບໍລິການການຄ້າ, ການທະນາຄານ, ຂົນສົ່ງ, ອະສັງຫາ
ໃນໂອກາດປີທ່ອງທ່ຽວລາວຈີນ ຍັງໄດ້ເຊື້ອເຊີນທຸລະກິດຈີນເຂົ້າຮ່ວມວາງສະແດງເຊັ່ນເຫຼົ້າເໝົາຖາຍ, ແລະ ຍັງມີຫົວໜ່ວຍທຸລະກິດຈາກປະເທດໄທຈໍານວນໜື່ງເຂົ້າຮ່ວມ.

ຄຽງຄູ່ກັບການຈັດງານວາງສະແດງໃນຄັ້ງນີ້, ຍັງຈະໄດ້ເຊື້ອເຊີນຄະນະສິນລະປະມາສະແດງ ແລະ ຈະມີງານຟີຣມິນິຄອນເສີດ ເຊິ່ງໄດ້ເຊື້ອເຊີນນັກຮ້ອງລາວຈາກຄ້າຍເພັງຕ່າງໆທີ່ມີຊື່ສຽງ ແລະ ຍັງມິກິດຈະກຳສຳມະນາໃນຫົວຂໍ້ຕ່າງໆເຊັ່ນ:

ສຳມະນາເລື້ອງສຸກຂະພາບ ແລະ ຄວາມປອດໄພໃນສະຖານທີ່ເຮັດວຽກ ໃນວັນທີ 24 ກໍລະກົດ 2019, ທີ່ເວທີກາງ ສູນວາງສະແດງສິນຄ້າແຫ່ງນີ້
ກອງປະຊຸມສຳມະນາ ການກະກຽມຄວາມພ້ອມເຂົ້າຮ່ວມງານວາງສະແດງສິນຄ້າຢູ່ຕ່າງປະເທດ ສຳລັບວິຫະກິດຂະໜາດນ້ອຍ ແລະ ກາງ ຂອງລາວ ຈັດຂື້ນໃນວັນທີ 25 ກໍລະກົດ 2019, ທີ່ສູນການຄ້າລາວ-ໄອເຕັກແຫ່ງນີ້
ກອງປະຊຸມ ພົບປະທຸລະກິດ ( ສະມາຊິກ ສຄອຊ ) ໃນວັນທີ 26 ກໍລະກົດ 2019 ທີ່ ສູນການຄ້າລາວ-ໄອເຕັກ
ການນຳສະເໜີ ກ່ຽວກັບຜະລິດຕະພັນ, ການບໍລິການທີ່ທັນສະໄໝ ແລະ ເງື່ອນໄຂການເຂົ້າຫາແຫ່ລງທືນຂອງ ທະນາຄານ ພັດທະນາລາວ ເຊິ່ງຈັດຂື້ນໃນວັນທີ 27 ກໍລະກົດ 2019 ທີ່ສູນການຄ້າລາວ-ໄອເຕັກ ແລະ ອື່ນໆ

ໃນການຈັດກອງປະຊຸມສຳມະນາ ແມ່ນໄດ້ເຊື້ອເຊີນຜູ້ບັນຍາຍທີ່ມີປະສົບການ, ແລະ ໄດ້ເຊື້ອເຊີນຜູ້ເຂົ້າຮ່ວມຈາກພາກລັດ, ຜູ້ປະກອບການ ເພື່ອມາຮັບຟັງແລະແລກປ່ຽນບົດຮຽນເຊິ່ງກັນແລະກັນ.