ສະພາການຄ້າ ແລະ ອຸດສາຫະກຳ ແຫ່ງຊາດລາວ ຮ່ວມກັບ ສະຖານເອກອັກຄະລັດຖະທູດ ອິນເດຍ ປະຈຳ ສປປ ລາວ ແລະ ສະພາການຄ້າ ອິນເດຍ (ICC) ໄດ້ຈັດ ກອງປະຊຸມ Lao-India Business Forum “Promoting India-Lao PDR Business and Investments Deepening India-ASEAN Cooperation” ໂດຍເປັນກຽດເຂົ້າຮ່ວມໂດຍ ທ່ານ ທະນົງສິນ ກັນລະຍາ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກຳ ແລະ ການຄ້າ, H.E Mr. Prashant Agrawal, ເອກອັກຄະລະຖະທູດແຫ່ງປະເທດອິນເດຍ ປະຈໍາ ສປປ ລາວ, Dr. Rajeev Singh ເລຂາທິການສະພາການຄ້າ ອິນເດຍ ພ້ອມທັງພາກລັດ ທີ່ກ່ຽວຂ້ອງ ທັງພາກລັດ ແລະ ພາກທຸລະກິດ ຈາກອິນເດຍ ແລະ ລາວ ເຂົ້າຮ່ວມທັງໝົດ 160 ທ່ານ.

ຈຸດປະສົງຂອງການຈັດກອງປະຊຸມໃນຄັ້ງນີ້ແມ່ນເພື່ອສົ່ງເສີມການຮ່ວມມືພົບປະແລກປ່ຽນຂໍ້ມູນຂ່າວສານທາງດ້ານ ການຄ້າ-ການລົງທຶນ, ການຂົນສົ່ງ, ກະສິກຳ, ບໍ່ແຮ່, ຊົນລະປະທານ, ພະລັງງານສີຂຽວ, ພະລັງງານແສງອາທິດ, ພະລັງງານລົມ-ນໍ້າ, ຜະລິດຕະພັນໜັງ ແລະ ແຜ່ນແພ່, ໂຮງແຮມ, ການທ່ອງທ່ຽວ, ຂະແໜງການດ້ານສຸຂະພາບ ແລະ ເຊື່ອມໂຍງການຮ່ວມມືຢ່າງເລິກເຊິ່ງລະຫວ່າງອິນເດຍ ແລະ ອາຊຽນ, ນອກຈາກນັ້ນ, ຍັງເປັນການເປີດໂອກາດອັນດີໃຫ້ແກ່ບັນດາຫົວໜ່ວຍທຸລະກິດລະຫວ່າງ ລາວ ແລະ ອິນເດຍ ໄດ້ສ້າງເຄືອຄ່າຍໃນການຫາຄູ່ຮ່ວມລົງທຶນພັດທະນາ, ດຳເນີນທຸລະກິດຢູ່ ສປປ ລາວ ໃຫ້ນັບມື້ນັບຫຼາຍຂື້ນ.