ການມອບ-ຮັບການເປັນປະທານສະພາທີ່ປຶກສາທຸລະກິດອາຊຽນແມ່ນໄດ້ຈັດຂື້ນໃນມື້ສຸດທ້າຍຂອງກອງປະຊຸມສຸດຍອດທຸລະກິດ ແລະ ລົງທຶນອາຊຽນ 2024, ເຊິ່ງໃຫ້ກຽດເຂົ້າຮ່ວມເປັນສັກຂີພິຍານໃນການມອບໃນຄັ້ງນີ້ໂດຍ ທ່ານ ປອ ມະໂນທອງ ວົງໄຊ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຂອງ ສປປລາວ.

ສະພາການຄ້າ ແລະ ອຸດສາຫະກຳ ແຫ່ງຊາດລາວ, ໃນນາມການເປັນປະທານສະພາທີ່ປຶກສາທຸລະກິດອາຊຽນ 2024 ໄດ້ຈັດກອງປະຊຸມສຸດຍອດທຸລະກິດ ແລະ ລົງທຶນອາຊຽນ 2024 ຂື້ນເປັນເວລາ 4 ວັນ, ເຊິ່ງນັບເເຕ່ວັນທີ 8-11 ຕຸລາ 2024, ທີ່ ໂຮງແຮມເເລນມາກ,

ໃນໄລຍະການດຳເນີນກອງປະຊຸມດັ່ງກ່າວໄດ້ເຊື້ອເຊີນນຳເອົາຜູ້ນຳຂອງໂລກ, ອົງການຈັດຕັ້ງສາກົນຕ່າງໆ ແລະ ຜູ້ບໍລິຫານລະດັບສູງຈາກຫົວໜ່ວຍທຸລະກິດທັງພາຍໃນ ແລະ ຕ່າງປະເທດມາຮ່ວມພາຍໃນງານ ເພື່ອຮ່ວມປຶກສາຫາລື ແລະ ແລກປ່ຽນທາງດ້ານຂໍູ້ມນຂ່າວສານ ເສດຖະກິດ-ການຄ້າ, ການລົງທຶນ, ເຊິ່ງກອງປະຊຸມດັ່ງກ່າວແມ່ນກອງປະຊຸມປະຈໍາປີອັນດັບໜຶ່ງຂອງອາຊີຕາເວັນອອກສ່ຽງໃຕ້ ທີ່ ເປັນເວທີທີ່ເຕົ້າໂຮມປະມຸກລັດ, ນາຍົກລັດຖະມົນຕີ, ປະເທດຄູ່ເຈລະຈາອາຊຽນ, ອົງກອນ INGO ພ້ອມທັງພາກທຸລະກິດໃນພາກພື້ນ ແລະ ທົ່ວໂລກ.

ຫົວຂໍ້ການສົນທະນາທີ່ຫນ້າສົນໃຈ ແລະ ການປຶກສາຫາຕ່າງໆໃນໄລຍະ 4 ວັນຂອງການຈັດກອງປະຊຸມປະກອບດ້ວຍຫົວຫລາຍຫົວຂໍ້ຫນ້າສົນໃຈດັ່ງນີ້:

• ຈຸດຢືນຂອງອາຊຽນຕໍ່ກັບເສດຖະກິດພາກພື້ນ ແລະ ພູມສາດການເມືອງ ເສດຖະກິດໂລກ

• ຈາກອາຊຽນເຖິງອາຊຽນ: ເພີ່ມທະວີການຄ້າ ແລະ ການລົງທຶນພາຍໃນພາກພື້ນ

• ການເຊື່ອມຕໍ່ອາຊຽນ – ເພີ່ມທະວີຄວາມເຂັ້ມແຂງການເຊື່ອມໂຍງເຊື່ອມຈອດ ແລະ ການສະໜອງຕ່ອງໂສ້ໃນຂົງເຂດຊາຍແດນ

• ການຫັນເປັນດິຈິຕອລຂອງອາຊຽນ

• ການຫັນເປັນພະລັງງານອາຊຽນ

• ຄວາມໝັ້ນຄົງດ້ານສະບຽງອາຫານອາຊຽນ

• ຍົກລະດັບການຮ່ວມມືອາຊຽນ-ຈີນ ພາຍໃຕ້ກອບສັນຍາການຮ່ວມມື FTA ແລະ RCEP

• ຕະຫຼາດທີ່ເປັນທ່າແຮງຂອງອາຊຽນ ແລະ ການເຊື່ອມໂຍງເສດຖະກິດຮ່ວມກັບ ພາກພື້ນຢູເອເຊຍ:

• ຕະຫຼາດທີ່ເປັນທ່າແຮງຂອງອາຊຽນ ແລະ ການເຊື່ອມໂຍງເສດຖະກິດອາຊຽນ-ອິນເດຍ ແລະ ພາກພື້ນອາຊີໃຕ້

• ການຈັດຕັ້ງປະຕິບັດທັດສະນະຂອງອາຊຽນຕໍ່ກັບອິນໂດປາຊີຟິກໃນຂະແຫນງການຕ່າງໆ

ໃນໄລຍະຂອງການກອງປະຊຸມຍັງໄດ້ມີຜູ້ນຳທີ່ສຳຄັນເຂົ້າຮ່ວມດັ່ງນີ້:

– ນາຍົກລັດຖະມົນຕີແຫ່ງສປປລາວ

– ປະທານປະເທດຟີລິບປິນ

– ນາຍົກລັດຖະມົນຕີ ສສ. ຫວຽດນາມ

– ປະທານສະພາແຫ່ງສະຫະພາບເອີຣົບ

– ນາຍົກລັດຖະມົນຕີ ນີວຊີເເລນ

– ນາຍົກລັດຖະມົນຕີ ການາດາ

– ຮອງປະທານປະເທດອິນໂດເນເຊຍ