ວັນທີ 24 ກໍລະກົດ 2020 ທີ່ ສະພາການຄ້າ ແລະ ອຸດສາຫະກໍາ ແຫ່ງຊາດລາວ, ນະຄອນຫຼວງວຽງຈັນ, ສປປ ລາວ ໄດ້ຈັດການຝຶກອົບຮົມກ່ຽວກັບຫົວຂໍ້: “ການສ້າງ ແລະ ພັດທະນາແບນຍີ້ຫໍ້ສິນຄ້າຂອງລາວ ແລະ ການສ້າງຂີດຄວາມສາມາດໃຫ້ກັບກຸ່ມຜູ້ຜະລິດ ໃນຂະແໜງກະສິກຳ ຕໍ່ກັບວຽກງານການຄ້າທາງເອເລັກໂຕຣນິກ (Training on Branding Development and E-commerce Capacity Building for Potential Producer in Agriculture Sector)”

ໂດຍການເປັນປະທານເປີດຝຶກອົບຮົມ ຂອງ ທ່ານ ທະນົງສິນ ກັນລະຍາ ຮອງປະທານ ສະພາການຄ້າ ແລະ ອຸດສາຫະກໍາ ແຫ່ງຊາດລາວ, ທ່ານ Jerome Dubois-Mercent, ຕ່າງໜ້າ United Nations Development Programme (UNDP), ທ່ານ ໄຊສົມເພັດ ນໍລະສິງຣ໌ ຫົວໜ້າກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ.

ຈຸດປະສົງຂອງການຝຶກອົບຮົມໃນຄັ້ງນີ້ ແມ່ນເພື່ອເຜີຍແຜ່ຂໍ້ມູນຂ່າວສານກ່ຽວກັບການສ້າງ ແລະ ພັດທະນາແບນສິນຄ້າຂອງລາວ ພ້ອມທັງຍົກໃຫ້ເຫັນເຖິງຄວາມສຳຄັນ ແລະ ຄວາມຈຳເປັນໃນການສ້າງ ແບນຍີ້ຫໍ້ສິນຄ້າ ໃຫ້ກັບພາກທຸລະກິດ, ເພື່ອຮຽນຮູ້ ແລະ ແລກປ່ຽນປະສົບການຈາກພາກສ່ວນກ່ຽວຂ້ອງທັງພາກລັດ ແລະ ພາກເອກະຊົນ, ເພື່ອຝຶກອົບຮົມໃຫ້ພາກສ່ວນທີ່ກ່ຽວຂ້ອງ ກ່ຽວກັບຂະແໜງການເຂົ້າ, ຊາ ແລະ ກາເຟ ເພື່ອນຳໃຊ້ ແລະ ຈັດຕັ້ງປະຕິບັດຕົວຈິງໂດຍສະເພາະແມ່ນການນຳເອົາວຽກງານການຄ້າດ້ານເອເລັກໂຕຣນີກເຂົ້າມາຊ່ວຍ, ເພື່ອປຶກສາຫາລື ແລະ ການສ້າງຄວາມພ້ອມໃຫ້ກັບພາກທຸລະກິດໃນການຮັບມືກັບສິ່ງທ້າທາຍ ແລະ ໝູນໃຊ້ກາລະໂອກາດໃຫ້ເກີດປະໂຫຍດສູງສຸດ.

ໃນການຝຶກອົບຮົມ ກໍ່ໄດ້ມີການນຳສະເໜີທີ່ສຳຄັນ ແລະ ເປັນປະໂຫຍດຈາກ ພາກລັດ ແລະ ບັນດາບໍລິສັດ ເຊັ່ນ: ການສ້າງ ແລະ ພັດທະນາແບນສິນຄ້າທ້ອງຖິ່ນຂອງລາວໃຫ້ກາຍເປັນແບນສິນຄ້າສາກົນ, ປະສົບການສ້າງ ແລະ ພັດທະນາຍີ່ຫໍ້ສິນຄ້າຂອງບໍລິສັດ ດາວເຮືອງ, ຄວາມສໍາຄັນໃນການສ້າງ ແລະ ພັດທະນາຍີ່ຫໍ້ສິນຄ້າ, ຄວາມສໍາຄັນໃນວຽກງານການຄ້າດ້ານເອເລັກໂຕຣນິກ, ແນະນຳເວັບໄຊ ພຣາວມີ (www.plaosme.com) ແລະ ວິທີການນຳໃຊ້ເວທີການຄ້າທາງອີເລັກໂຕຣນິກ, ແລະ ການນຳສະເໜີກ່ຽວກັບການດຶງດູດລູກຄ້າ Online to Offline.