ທ່ານ ດາວວອນ ພະຈັນທະວົງ ຮອງປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ ໃຫ້ກຽດເປັນປະທານຮ່ວມກັບ ທ່ານ ບຸນມີ ແສງພະຈັນ ຜູ້ອຳນວຍການໃຫຍ່ ທະນາຄານ ມາຮູຮານເຈແປນລາວ ຈຳກັດ

ໃນພິທີ ເຊັນບົດບັນທຶກຄວາມເຂົ້າໃຈກ່ຽວກັບການຮ່ວມມືສ້າງຄວາມເຂັ້ມແຂງໃຫ້ທຸລະກິດຂະໜາດນ້ອຍ ແລະ ກາງ ເພື່ອເຂົ້າເຖິງແຫຼ່ງທືນ,  ລະຫວ່າງ ສູນບໍລິການ ວິສາຫະກິດຂະໜາດນ້ອຍ ແລະ ກາງ, ສະພາການຄ້າ ແລະ ອຸດສາຫະກຳແຫ່ງຊາດລາວ ຮ່ວມກັບ ທະນາຄານ ມາຮູຮານເຈແປນລາວ ຈຳກັດ ເພື່ອເປັນແນວທາງ ໃນການແລກປ່ຽນ ແລະ ເຜີຍແພ່ຂໍ້ມູນຂ່າວສານ ເພື່ອອຳນວຍຄວາມສະດວກ ແລະ ສົ່ງເສີມຜູ້ປະກອບກິດຈະການ ຈຸນລະວິສາຫະກິດຂະໜາດນ້ອຍ ແລະ ກາງ ພ້ອມທັງ ສະມາຊິກ ຂອງສະພາການຄ້າ ແລະ ອຸດສາຫະກຳແຫ່ງຊາດລາວ ໃຫ້ມີຄວາມເຂັ້ມແຂງ ແລະ ສາມາດເຂົ້າຫາແຫຼ່ງທຶນ ແລະ ຜະລິດຕະພັນຂອງທະນາຄານໄດ້.

ການສົ່ງເສີມວິສາຫະກິດຂະໜາດນ້ອຍ ແລະ ກາງແມ່ນເປົ້າໝາຍຍຸດທະສາດ ໃນການພັດທະນາເສດຖະກິດຂອງຊາດ ແລະ ເປັນ ໜ້າວຽກບູລິມະສິດ ຂອງ ສະພາການຄ້າ ແລະ ອຸດສາຫະກຳແຫ່ງຊາດລາວ ກໍຄື ສູນບໍລິການ ວິສາຫະກິດຂະໜາດນ້ອຍ ແລະ ກາງ  ທີ່ຈະຕ້ອງໄດ້ຮ່ວມມື ກັບບັນດາຄູ່ຮ່ວມພັດທະນາ, ສະຖາບັນການສຶກສາ, ຄູ່ຮ່ວມງານຕ່າງໆ ທັງພາກລັດ, ພາກທຸລະກິດ, ສະຖາບັນທະນາຄານ ແລະ ບັນດາອົງການຈັດຕັ້ງສາກົນ.