ຄະນະ ສຄອຊ ແລະ ພາກທຸລະກິດລາວ ເດີນທາງໄປຢ້ຽມຢາມ ແລະ ເຄື່ອນໄຫວວຽກງານພົບປະທຸລະກິດສອງຝ່າຍ ລາວ-ຝຮັ່ງ
ທ່ານ ອຸເດດ ສຸວັນນະວົງ ປະທານ ສຄອຊ ພ້ອມດ້ວຍ ຄະນະ ສຄອຊ ແລະ ພາກທຸລະກິດລາວ ເດີນທາງໄປຢ້ຽມຢມ ແລະ ເຄື່ອນໄຫວວຽກງານພົບປະທຸລະກິດສອງຝ່າຍ ລາວ-ຝຮັ່ງ, ໃນລະຫວ່າງວັນທີ 21-29 ຕຸລາ 2023 ທີ່ ເມືອງປາຣີ, ສະຕັສບວກ ແລະ ລີຍົງ ປະເທດຝຣັ່ງ ເຊິ່ງເປັນກຽດນຳພາໂດຍ ທ່ານ ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ.
ພ້ອມກັນນັ້ນ, ໃນການເຄື່ອນໄຫວເຮັດວຽກໃນຄັ້ງນີ້ຄະນະປະທານ ສຄອຊ ພ້ອມດ້ວຍພາກທຸລະກິດລາວຍັງໄດ້ຈັດກອງປະຊຸມພົບປະທຸລະກິດ 2 ຝ່າຍ ລາວ-MEDEF, ປະຊຸມພົບປະ ກັບ ສະຫະພັນກຸ່ມວິສະຫະກິດ ຂະຫນາດນ້ອຍ ແລະ ກາງຂອງ ເຂດ Auvergne Rhône-Alpe, ຢ້ຽມຢາມສຳນັກງານໃຫຍ່ ທະນາຄານ BRED, ບັນດາເຂດເສດຖະກິດສຳຄັນຂອງເມືອງ Strasbourg ແລະ Lyon ເຊັ່ນ: ສະພາອຸດສາຫະກໍາການຄ້າ ຂອງເຂດ Alsace (Grand Est), ສູນທ່າບົກຂອງເມືອງ Strasbourg, ບໍລິສັດຂົນສົ່ງ Faure et Machet, ບໍລິສັດ L’ORT&L Observatoir Regional Transports & Logistique du Grand Est, ຫ້ອງການ ສະພາ ຂອງ EU ຢູ່ເມືອງ Strasbourg, ຢ້ຽມຢາມ ບໍລິສັດ ບໍລິຫານ ແລະ ຂົນສົ່ງພາຍໃນຕົວເມືອງ Lyon.
ຈຸດປະສົງແມ່ນເພື່ອ ເປີດໂອກາດໃຫ້ນັກທຸລະກິດລາວໄດ້ພົບປະປຶກສາຫາລື, ແລກປ່ຽນຂໍ້ມູນທາງດ້ານການຄ້າ-ການລົງທຶນໃນຂະແໜງການຂົນສົ່ງ, ກະສິກຳ, ພະລັງງານ-ບໍ່ແຮ່, ຄຳ, ເຫຼັກ, ອຸດສາຫະກຳອາຫານ ແລະ ເຄື່ອງດື່ມ ແລະ ອື່ນໆ ຮ່ວມກັບນັກທຸລະກິດຕ່າງປະເທດເພື່ອກ້າວໄປເຖິງການດຳເນີນທຸລະກິດຮ່ວມກັນໃນອານາຄົດ ແລະ ເປັນເວທີສົ່ງເສີມເປີດກວ້າງຜະລິດຕະພັນລາວໃຫ້ສາກົນໄດ້ຮັບຮູ້.