ໃຫ້ກຽດເປັນປະທານຮ່ວມກັບ ທ່ານ ຈັນທອນ ໄຊຍະກອນ, ຮອງຫົວໜ້າກົມທາງລົດໄພ, ກະຊວງໂຍທາທິການ ແລະ ຂົນສົ່ງ, ແລະ ທ່ານ ທອງເດີນ ຄໍາມະນີ, ຮອງຜູ້ອໍານວຍການ ບໍລິສັດ ລົດໄຟ ລາວຈີນ, ພາຍໃຕ້ກົນໄກກອງປະຊຸມປຶກສາຫາລື ລະຫວ່າງພາກລັດ ແລະ ພາກທຸລະກິດ ຂອງກອງປະຊຸມທຸລະກິດລາວ (Lao Business Forum), ເພື່ອ ເຜີຍແຜ່ຂໍ້ມູນດ້ານການໃຫ້ບໍລິການຂົນສົ່ງຂອງບໍລິສັດລົດໄຟ ລາວ-ຈີນ ໂດຍສະເພາະ ແມ່ນ ຂໍ້ມູນດ້ານຂັ້ນຕອນ, ເງື່ອນໄຂ ແລະ ຄ່າທໍານຽມທີ່ຕິດພັນກັບການຂົນສົ່ງສິນຄ້າຂ້າມແດນ ແລະ ຜ່ານແດນ, ແລະ ການຂົນສົ່ງຜູ້ໂດຍສານເປັນກຸ່ມ. ກອງປະຊຸມດັ່ງກ່າວ ແມ່ນໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (Lao Competitiveness and Trade Project – LCT).

ທ່ານວັນທອງ ສິດທິກຸນ, ຮອງປະທານ ສະພາການຄ້າ ແລະ ອຸດສາຫະກໍາແຫ່ງຊາດລາວ, ໄດ້ກ່າວມີຄໍາເຫັນ ໃນກອງປະຊຸມກ່ຽວກັບການເນັ້ນໜັກໃຫ້ເຫັນເຖິງ ຄວາມສໍາຄັນຂອງການຂົນສົ່ງຜ່ານທາງລົດໄຟ ລາວ-ຈີນ ເຊິ່ງເປັນຊ່ອງທາງໜຶ່ງ ໃນການຊ່ວຍຫຼຸດຜ່ອນຕົ້ນທຶນຄ່າຂົນສົ່ງ ແລະ ອໍານວຍຄວາມສະດວກຕໍ່ການສົ່ງອອກສິນຄ້າຂອງ ສປປ ລາວ. ການພັດທະນາລະບົບຂົນສົ່ງສິນຄ້າທາງລົດໄຟ ຄຽງຄູ່ກັບການຈັດຕັ້ງປະຕິບັດແຜນວຽກດ້ານການອໍານວຍຄວາມສະດວກທາງດ້ານການຄ້າ ແລະ ການປັບປຸງສະພາບແວດລ້ອມການດໍາເນີນທຸລະກິດ ຈະຊ່ວຍເຊື່ອມຈອດ ຜູ້ຜະລິດ ແລະ ຜູ້ຊົມໃຊ້ ໃນຂົງເຂດ ຈີນ-ອາຊຽນ ແລະ ຊ່ວຍໃຫ້ຜູ້ຜະລິດ ໃນ ສປປ ລາວ ສາມາດເຂົ້າເຖິງ ຕ່ອງໂສ້ການສະໜອງສິນຄ້າຂອງສາກົນ, ຕະຫຼາດສົ່ງອອກທີ່ຫຼາກຫຼາຍ ແລະ ໂອກາດໃນການຜະລິດສິນຄ້າທີ່ຫຼາກຫຼາຍຂຶ້ນ.

ຈຸດປະສົງຫຼັກ ຂອງກອງປະຊຸມໃນຄັ້ງນີ້ ແມ່ນ ເພື່ອຮັບຟັງຂໍ້ມູນດ້ານການໃຫ້ບໍລິການ ກ່ຽວກັບການຂົນສົ່ງສິນຄ້າ ແລະ ການຂົນສົ່ງຜູ້ໂດຍສານ ຜ່ານທາງລົດໄຟ ລາວ-ຈີນ, ພ້ອມທັງປຶກສາຫາລືແບບວິຊາການ ຕໍ່ກັບປັດໃຈຂໍ້ຫຍຸ້ງຍາກ ທີ່ຜູ້ປະກອບການພົບພໍ້ ໃນການຂົນສົ່ງສິນຄ້າ ແລະ ຜູ້ໂດຍສານ ຜ່ານທາງລົດໄຟລາວ-ຈີນ, ເຊິ່ງເປັນ ໜຶ່ງໃນບັນຫາບູລິມະສິດທີ່ຖືກຍົກຂຶ້ນຜ່ານຂະບວນການປຶກສາຫາລື ຂອງກອງປະຊຸມທຸລະກິດລາວ.

ກອງປະຊຸມດັ່ງກວ່າ ໄດ້ເຂົ້າຮ່ວມໂດຍຜູ້ຕາງໜ້າ ຈາກຂະແໜງການຕ່າງໆຂອງພາກລັດ, ບັນດາຜູ້ປະກອບການລາວ ແລະ ຕ່າງປະເທດ, ແລະ ຜູ້ຕາງໜ້າຈາກອົງກອນຕ່າງໆ ເຂົ້າຮ່ວມ ໃນຫ້ອງປະຊຸມ ແລະ ຜ່ານທາງລະບົບ ອອນລາຍ, ທັງໝົດ ຫຼາຍກວ່າ 200 ທ່ານ.