ໃນວັນທີ 05 ມີຖຸນາ 2023 ທີ່ ຫ້ອງການສະພາການຄ້າ ແລະ ອຸດສາຫະກໍາ ແຫ່ງຊາດລາວ, ນະຄອນຫຼວງວຽງຈັນ. ສະພາການຄ້າ ແລະ ອຸດສາຫະກໍາ ແຫ່ງຊາດລາວ (ສຄອຊ)

ຮ່ວມກັບ ກົມສົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າ, ອົງການແພລນສາກົນ ປະຈໍາ ສປປ ລາວ (Plan International Laos) ແລະ ສູນສະຫະພາບເອີຣົບ ດ້ານການທ່ອງທ່ຽວນິເວດ ແລະ ກະສິກໍາ (ECEAT – European Centre for Ecological and Agricultural Tourism)  ໄດ້ຈັດການຝຶກອົບຮົມຫົວຂໍ້: “ການເຂົ້າເຖິງແຫ່ງທຶນ ສໍາລັບ ຈຸນລະວິສາຫະກິດ ວິສາຫະກິດຂະຫນາດນ້ອຍ ແລະ ກາງ ໃນຕ່ອງໂສ້ອຸດສາຫະກໍາການທ່ອງທ່ຽວລາວ” ໂດຍການເປັນປະທານຂອງ ທ່ານ ໄຊສົມເພັດ ນໍລະສິງ (Mr. Xaysomphet Norasingh),ຫົວຫນ້າກົມສົ່ງເສີມການຄ້າ (Director General of Trade Promotion Department), ກະຊວງ ອຸດສາຫະກໍາ ແລະ ການຄ້າ, (Ministry of. Industry and Commerce), ທ່ານ ນາງ ທິບພາພອນ ເພັດມະນີ (Ms Thiphaphone PHETMANY), ຄະນະບໍລິຫານງານ ສຄອຊ (Board of director of LNCCI) ແລະ ມີຕາງໜ້າຈາກພາກທຸລະກິດ, ຜູ້ປະກອບການຂະແໜງການທີ່ກ່ຽວຂ້ອງເຂົ້າຮ່ວມທັງໝົດຫຼາຍກວ່າ 30 ທ່ານ.

ຈຸດປະສົງເພື່ອເປັນການຊຸກຍູ້ ແລະ ສົ່ງເສີມຂະແຫນງການທີ່ປິ່ນອ້ອມການທ່ອງທ່ຽວເຊັ່ນ: ສະຖານທີ່ພັກໂຮງແຮມ, ຮ້ານອາຫານ, ບໍລິສັດທ່ອງທ່ຽວ, ເຄື່ອງຫັດຖະກໍາ ແລະ ອື່ນໆທີ່ກ່ຽວຂ້ອງ ໃຫ້ສາມາດເຂົ້າເຖິງຂໍ້ມູນຂ່າວສານກ່ຽວກັບ ແຫລ່ງທຶນ ແລະ ສາມາດຍື່ນບົດສະເໜີກູ້ຢືມເງິນຈາກທາງທະນາຄານ ຫຼື ສະຖາບັນການເງິນໄດ້, ແລະ ຈະໄດ້ເຂົ້າໃຈຈະແຈ້ງຂຶ້ນກ່ຽວກັບຂໍ້ມູນນະໂຍບາຍ, ເງື່ອນໄຂ ແລະ ຂັ້ນຕອນຕ່າງໆກ່ຽວກັບການກູ້ຢືມເງິນ ຈາກບັນດາທະນາຄານ ແລະ ສະຖາບັນການເງິນ. ນອກຈາກນັ້ນ ການຝຶກອົບຮົມໃນຄັ້ງນີ້ ໂດຍສະເພາະທ່ານໃດທີ່ມີທຸລະກິດເປັນຂອງຕົນເອງ ແຕ່ຍັງບໍ່ທັນໄດ້ຂື້ນທະບຽນຢ່າງເປັນທາງການ ຈະໄດ້ຮຽນຮູ້ການຈົດທະບຽນວິສາຫະກິດ, ຮູ້ຂັ້ນຕອນ ແລະ ເຕັກນິກຂຽນແບບຟອມກູ້ຢືມເງິນຂອງທະນາຄານ, ເຂົ້າໃຈພື້ນຖານການເຮັດບັນຊີຈົດກ່າຍລາຍຮັບ-ລາຍຈ່າຍປະຈໍາວັນຂອງທຸລະກິດທ່ານ ແລະ ຮຽນຮູ້ລະບົບການເງິນແບບດິຈິຕອນ ພ້ອມຮ່ວມຮັບຟັງ ແລະ ສົນທະນາແລກປ່ຽນກັບຕົວແທນຈາກທະນາຄານ ແລະ ສະຖາບັນການເງິນຕໍ່ກັບຂໍ້ມູນທີ່ຈຳເປັນ ແລະ ກ່ຽວຂ້ອງໃນຂັ້ນຕອນການກູ້ຢືມເງິນອີກດ້ວຍ.