ໃນວັນທີ 29 ກັນຍາ 2023 ຜ່ານມານີ້້, ສູນບໍລິການອາຊີວະສຶກສາແບບຄວບຄູ່ (DCT SC), ສະພາການຄ້າ ແລະ ອຸດສາຫະກຳແຫ່ງຊາດລາວ ຮ່ວມກັບ

ສະພາການຄ້າ ແລະ ອຸດສາຫະກຳ ແຂວງ ຫຼວງພະບາງ ໄດ້ສຳເລັດການ ຊຸດຝຶກອົບຮົມ ຄູຝຶກຂອງ ສະຖານປະກອບການ (In-Company Trainer Training) ເຊີ່ງຊຸດຝຶກອົບຮົມຄັ້ງ ດຳເນີນ ເປັນເວລາ 03 ວັນເຕັມ, ເລີ່ມແຕ່ວັນ ອັງຄານ ທີ 27 ຫາ 29 ກັນຍາ 2023 ທີ່ ຫ້ອງປະຊຸມ ສະພາການຄ້າ ແລະ ອຸດສາຫະກຳ ແຂວງ ຫຼວງພະບາງ.

ຈຸດປະສົງຂອງການຝຶກອົບຮົມຄັ້ງນີ້້: ເພື່ອເພີ່ມຄວາມຮູ້ ແລະ ທັກສະ ໃຫ້ພະນັກງານທີ່ຢູ່ປະຈໍາ, ການຝຶກອົບຮົມເວລາຮັບຮັບພະນັກງານໃໝ່, ການຝຶກອົບຮົມໃນໜ້າວຽກຕົວຈິງ ແລະ ການຝຶກນັກສຶກສາຝຶກງານ.

ເພື່ອສ້າງຂີດຄວາມສາມາດ ໃນດ້ານບົດບາດ ແລະ ໜ້າທີ່ການເປັນຄູຝຶກໃນສະຖານປະກອບການ, ການບໍລິຫານຈັດການ ການຮຽນ-ການສອນຜູ້ໃຫ່ຍ, ການວິເຄາະໜ້າວຽກ ແລະ ຄວາມຕ້ອງການ ການຮຽນຮູ້, ການວາງແຜນ ແລະ ກະກຽມການຝຶກອົບຮົມ, ທັກສະໃນການດໍາເນີນການຝຶກອົບຮົມ, ການປະເມີນຜົນ ແລະ ພັດທະນາການຝຶກອົບຮົມ ຢ່າງມີປະສິດທິຜົນ. ລວມທັງບົດບາດກ່ຽວຂ້ອງກັບການຈັດການຮຽນ-ການສອນ ແລະ ຝຶກອາຊີບ ເພື່ອໃຫ້ບັນລຸຈຸດປະສົງເປົ້າໝາຍຂອງຫລັກສູດຮູບແບບ ອາຊີວະສຶກສາແບບຄວບຄູ່.

ຫລັກສູດຝຶກອົບຮົມນີ້ ແມ່ນດັດປັບຈາກມາດຕະຖານອາຊຽນສໍາລັບຄູຝຶກໃນສະຖານປະກອບການ ເຊິ່ງອອກແບບສະເພາະ ເພື່ອເສີມສ້າງຄວາມຮູ້ ຄວາມສາມາດ ກ່ຽວກັບບົດບາດ ແລະ ໜ້າທີ່ ໃນການເປັນຜູ້ຝຶກສອນວຽກໃນສະຖານປະກອບການ ຢ່າງມີປະສິດທິຜົນ.

ຈໍານວນຜູ້ເຂົ້າຮັບການຝຶກອົບລວມທັງໝົດ 17 ທ່ານ, ໂດຍຕາງໜ້າ ຈາກ 12 ສະຖານປະກອບການພາຍໃນ ແຂວງ ທີ່ໄດ້ຮ່ວມຈັດຕັ້ງປະຕິບັດ ອສຄ, ຜູ້ເຂົ້າຮ່ວມແມ່ນຮັບຜິດຊອບໃນຕໍາແໜ່ງ ຜູ້ຈັດການທົ່ວໄປ, ຜູ້ຈັດການຝ່າຍບຸກຄົນ, ຫົວໜ້າງານ, ວິທະຍາກອນ (ຄູຝຶກ), ນາຍຊ່າງເຕັກນິກ ແລະ ຜູ້ຕ້ອງການຮຽນຮູ້ທັກສະການຖ່າຍທອດຄວາມຮູ້ ເພື່ອຝຶກອົບຮົມບຸກຄະລາກອນໃນສະຖານປະກອບການ.

ສຳລັບການຈັດຝຶກອົບຮົມ ຊຸດຕໍ່ໄປແມ່ນມີແຜນຈັດຝຶກອົບຮົມຊຸດຕໍ່ໄປ ແມ່ນຈະຈັດ ຢູ່ນະຄອນຫຼວງ, ແຂວງ ວຽງຈັນ ແລະ ແຂວງ ຈຳປາສັກ.