ສະມາຄົມທຸລະກິດກະສິກຳລາວ ຈັດກອງປະຊຸມສະຫຼຸບວຽກງານ 2023 ແລະ ກຳນົດທິດທາງແຜນງານ 2024, ໃນວັນທີ 15 ກຸມພາ 2024 ທີ່ສະພາການຄ້າ ແລະ ອຸດສາຫະກຳແຫ່ງຊາດລາວ

ໂດຍການເປັນປະທານຂອງ ທ່ານ ບຸນເລີດ ຫຼວງປະເສີດ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ຜູ້ຊີ້ນຳວຽກງານທຸລະກິດກະສິກຳ ໃຫ້ກຽດເປັນປະທານຮ່ວມ ກັບ ທ່ານ ບຸນທ່ຽງ ລັດຕະນະວົງ ປະທານສະມາຄົມທຸລະກິດກະສິກຳລາວ ໂດຍມີຄະນະບໍລິຫານງານສະມາຄົມ, ທີ່ປຶກສາສະມາຄົມເຂົ້າຮ່ວມຢ່າງພ້ອມພຽງ.
ໃນກອງປະຊຸມໄດ້ຮັບຟັງລາຍງານການຈັດຕັ້ງປະຕິບັດວຽກງານໃນປີ 2023 ຈາກທ່ານ ບຸນທ່ຽງ ລັດຕະນະວົງ ປະທານສະມາຄົມທຸລະກິດກະສິກຳລາວ, ພາຍຫຼັງມີການປັບປຸງການຈັດຕັ້ງຕາມຂໍ້ຕົກລົງຂອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ສະບັບເລກທີ 0342/ສຄອຊ.ປທ ລົງວັນທີ 10 ມີນາ 2023 ຄະນະບໍລິຫານງານໄດ້ມີການ ເລັ່ງສ້າງຄວາມເຂັ້ມແຂງໃຫ້ແກ່ສະມາຄົມ, ປະກອບບຸກຄະລາກອນ ແລະ ສິ່ງອຳນວຍຄວາມສະດວກໃນການດຳເນີນວຽກງານຂອງສະມາຄົມ, ໃນໄລຍະຜ່ານມາໄດ້ມີການເຄືື່ອນໄຫວປະສານສົມທົບກັບພາກສ່ວນຕ່າງໆໃນການເຂົ້າມາມີສ່ວນຮ່ວມໃນກົນໃກການສົ່ງເສີມທຸລະກິດກະສິກຳ ຂອງສະມາຄົມທຸລະກິດກະສິກຳລາວ ເຊັ່ນ: ຕະຫຼາດ (ຜູ້ຊື້), ກຸ່ມຜູ້ຜະລິດ, ສະຫະກອນ, ກຸ່ມຜູ້ສະໜອງປັດໄຈ (ຝຸ່ນ-ປຸຍ, ຫົວອາຫານ, ແນວພັນພືດ, ແນວພັນສັດ, ອຸປະກອນ, ກົນຈັກ, ລະບົບນ້ຳ), ສະຖາບັນການເງິນ (ທະນາຄານ, ສະຖາບັນການເງິນຈຸລະພາກ) ເຮັດວຽກຮ່ວມກັນໃນການສົ່ງເສີມການຜະລິດກະສິກຳເປັນສິນຄ້າ.
ສຳລັບທິດທາງແຜນການໃນປີ 2024 ທາງສະມາຄົມຍັງຈະສືບຕໍ່ສ້າງຄວາມເຂັ້ມແຂງໃຫ້ແກ່ສະມາຊິກ ແລະ ສະມາຄົມ ສືບຕໍ່ຜັນຂະຫຍາຍການສົ່ງເສີມການຜະລິດກະສິກຳເປັນສິນຄ້າຕາມກົນໃກຂອງ ສະພາການຄ້າ ແລະ ອຸດສາຫະກຳແຫ່ງຊາດລາວ ພ້ອມກັບມີສ່ວນຮ່ວມໃນການຈັດຕັ້ງປະຕິບັດວາລະແຫ່ງຊາດຂອງພາກລັດຖະບານ, ສະມາຄົມຈະລົງເລິກການສ້າງໂຄງປະກອບລາຄາຂອງສິນຄ້າກະສິກຳໃຫ້ເປັນຖານຂໍ້ມູນທີ່ສອດຄ່ອງກັບສະພາບຕົວຈິງຂອງການຜະລິດ ແລະ ການຈຳໜ່າຍ, ສ້າງຖານຂໍ້ມູນທຸລະກິດກະສິກຳໃຫ້ສາມາດເຂົ້າເຖິງງ່າຍ, ຊ່ວຍບັນດາສະມາຊິກໃນການຄົ້ນຄວ້າ-ສັງ ລວມບັນຫາຄວາມສະດວກໃນການດຳເນີນທຸລະກິດຜ່ານເວທີທຸລະກິດລາວ (Lao Business Forum).
ທ່ານ ບຸນເລີດ ຫຼວງປະເສີດ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ມີຄວາມເຫັນຕໍ່ກອງປະຊຸມວ່າ ສະມາຄົມທຸລະກິດກະສິກຳລາວ ພາຍຫຼັງທີ່ໄດ້ມີການປັບປຸງການຈັດຕັ້ງຜ່ານມາ ເຖິງເປັນເວລາອັນສັ້ນ ແລະ ຍັງຂາດ ຫຼາຍປັດໄຈ ແຕ່ກໍ່ເຫັນໄດ້ເຖິງການເຮັດວຽກຂອງຄະນະບໍລິຫານງານ ເຊິ່ງສະແດງອອກມີຫຼາຍກິດຈະກຳທີ່ເກີດຂຶ້ນໃນດ້ານຕັ້ງໜ້າຫຼາຍອັນ. ໃນນາມຕາງໜ້າໃຫ້ສະພາການຄ້າ ແລະ ອຸດສາຫະກຳແຫ່ງຊາດລາວ ຈະໃຫ້ການສະໜັບສະໜູນ-ໃຫ້ຄວາມຮ່ວມມືໃນການສ້າງຄວາມເຂັ້ມແຂງໃຫ້ແກ່ສະມາຄົມທຸລະກິດກະສິກຳໃຫ້ມີຄວາມເຂັ້ມແຂງຂຶ້ນຢ່າງບໍ່ຢຸດຢັ້ງ ແລະ ຂະຫຍາຍຕົວຄຽງຄູ່ກັບການຈັດຕັ້ງຂອງສະພາການຄ້າ ແລະ ອຸດສາຫະກຳແຫ່ງຊາດລາວ ທີ່ມີຢູ່ແຕ່ລະແຂວງ ແລະ ກຳລັງຂະຫຍາຍລົງສູ່ຂັ້ນເມືອງໃນຂອບເຂດທົ່ວປະເທດ.
ທ່ານ ບຸນເລີດ ຫຼວງປະເສີດ ຍັງໄດ້ມີທິດຊີ້ນຳເພີ່ມເຕີມໃຫ້ສະມາຄົມໃຫ້ມີການສ້າງຍຸດທະສາດວຽກງານຂອງສະມາຄົມ ທີ່ຕິດພັນກັບແຜນພັດທະນາເສດຖະກິດສັງຄົມຂອງຊາດທີ່ພາກລັດໄດ້ກຳນົດອອກມາ ແລະ ແຜນຍຸດທະສາດຂອງກະຊວງຂະແໜງການທີ່ກ່ຽວຂ້ອງ ໂດຍມີການກຳນົດແຜນງານໃນແຕ່ລະໄລຍະ ເຊັ່ນ: ໄລຍະສັ້ນ, ໄລຍະກາງ ແລະ ໄລຍະຍາວ ແລະ ໃຫ້ສາມາດວັດແທກໄດ້ຜົນງານທີ່ຈັດຕັ້ງໄດ້ໃນແຕ່ລະໄລຍະຢ່າງເປັນຮູບປະທຳ, ພ້ອມກັນນັ້ນກໍ່ຂໍໃຫ້ສະມາຄົມເອົາໃຈໃສ່ການມີສ່ວນຮ່ວມໃນການຈັດຕັ້ງວາລະແຫ່ງຊາດຢ່າງຕັ້ງໜ້າ.