ກອງປະຊຸມໃຫຍ່ ຄັ້ງທີ VI ຂອງສະພາການຄ້າ ແລະ ອຸດສາຫະກໍາ ແຂວງ ບໍລິຄຳໄຊ ໄດ້ໄຂຂື້ນ ໃນວັນທີ 08 ສິງຫາ 2024 ທີ່ ສະໂມສອນ ຫ້ອງວ່າການແຂວງບໍລິຄຳໄຊ

ເຊິ່ງໃຫ້ກຽດເປັນປະທານຮ່ວມໂດຍ ທ່ານ ປອ ສອນທະນູ ທຳມະວົງ, ກຳມະການສູນກາງພັກ ເລຂາພັກແຂວງ ເຈົ້າແຂວງ ແຂວງ ບໍລິຄຳໄຊ, ທ່ານ ປອ ຄຳແສນ ສີສະວົງ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ທ່ານ ໄຊຍະເພັດ ຈັນທິສອນ  ປະທານ ສະພາການຄ້າ ແລະ ອຸດສາຫະກຳ ແຂວງບໍລິຄຳໄຊ ​ພ້ອມດຽວກັນນັ້ນ ກໍ່ມີບັນດາຜູ້ເຂົ້າຮ່ວມ ບັນດາການນຳເມືອງ, ຕາງໜ້າຈາກ ສຄອ ນະຄອນຫຼວງ, ສຄອ ແຂວງວຽງຈັນ, ສຄອ ແຂວງ ຄຳມ່ວນ, ສຄອ ແຂວງຊຽງຂວາງ, ພະແນກການອ້ອມຂ້າງ ຄະນະບໍລິຫານງານ, ຄະນະທີ່ປຶກສາ, ສະມາຄົມອ້ອມຂ້າງ, ສະມາຊິກສົມບູນ ຂອງ ສຄອ ແຂວງ ບໍລິຄຳໄຊ ແລະ ຕາງໜ້າຈາກຫົວໜ່ວຍທຸລະກິດພາຍໃນແຂວງ ບໍລິຄຳໄຊ.

ກອງປະຊຸມໃຫຍ່ໃນຄັ້ງນີ້ແມ່ນກອງປະຊຸມທີ່ມີຄວາມໝາຍຄວາມສໍາຄັນຢ່າງໃຫ່ຍຫຼວງຕໍ່ ການຈັດຕັ້ງ, ການເຄື່ອນໄຫວ ແລະ ການພັດທະນາ ສະພາການຄ້າ ແລະ ອຸດສາຫະກໍາ ແຂວງບໍລິຄຳໄຊ. ໃຫ້ມີການເຕີບໃຫ່ຍຂະຫຍາຍຕົວ ເຊິ່ງສາມາດບັນລຸຜົນສຳເລັດຕາມຈຸດປະສົງ ແລະ ລະດັບຄາດໝາຍ, ມີຄວາມເປັນເອກະພາບ, ມີຄວາມໂປ່ງໃສ, ຍຸດຕິທຳ ແລະ ມີເນື້ອໃນຄົບຖ້ວນ, ເປັນກໍາລັງແຮງທີ່ສໍາຄັນ ແລະ ເປັນແກ່ນສານນໍາພາພາກທຸລະກິດ ສ້າງບາດກ້າວບຸກທະລຸໃນການພັດທະນາເສດຖະກິດໃຫ້ດີຂື້ນ. ຊອກຫາແນວທາງສືບຕໍ່ ພັດທະນາເສດຖະກິດ-ສັງຄົມ ຂອງແຂວງ ໃຫ້ຂະຫຍາຍຕົວຕາມທິດທາງ ແລະ ເປົ້າຫມາຍທີ່ວາງໄວ້.

ທ່ານ ໄຊຍະເພັດ ຈັນທິສອນ  ປະທານ ສະພາການຄ້າ ແລະ ອຸດສາຫະກຳ ແຂວງບໍລິຄຳໄຊ ກໍໄດ້ລາຍງານສະພາບລວມການຈັດຕັ້ງປະຕິບັດວຽກງານຂອງ ສຄອ ແຂວງເຊກອງ ໃນໄລຍະຜ່ານມາ ແລະ ທິດທາງແຜນການ 3 ປີຕໍ່ໜ້າ (2024-2027). ກອງປະຊຸມໃຫ່ຍຄັ້ງທີ VI ຂອງສະພາການຄ້າ ແລະ ອຸດສາຫະກຳ ແຂວງ ບໍລິຄຳໄຊ ໄດ້ຕົກລົງເຫັນດີເປັນເອກະພາບດັ່ງນີ້:

ຜ່ານການປ່ອນບັດເລືອກຕັ້ງໄດ້ ຄະນະປະຈໍາ ແລະ ຄະນະບໍລິຫານງານ ຈຳນວນ 9 ທ່ານ, ຍິງ: 2 ທ່ານ ເຊິ່ງມີລາຍລະອຽດດັ່ງລຸ່ມນີ້:

1. ທ່ານ ໄຊຍະເພັດ ຈັນທິສອນ ເປັນປະທານ
2. ທ່ານ ໄພວັນ ສີພັນດອນ ເປັນຮອງປະທານ
3. ທ່ານ ສົມສັກ ໄຊຍະວົງ ເປັນຮອງປະທານ
4. ທ່ານ ທະນູສອນ ຫຼວງລາດບັນດິດ ເປັນ ຄະນະບໍລິຫານງານ
5. ທ່ານ ນ ນຸດ ຄຸນພະໄຊ ເປັນ ຄະນະບໍລິຫານງານ
6. ທ່ານ ນ ວຽງນະສອນ ອຸນາລົມ ເປັນ ຄະນະບໍລິຫານງານ
7. ທ່ານ ຄອນສະຫວັນ ສອນຄຳໄຊ ເປັນ ຄະນະບໍລິຫານງານ
8. ທ່ານ ສິນທະນາ ພິມມະສອນ ເປັນ ຄະນະບໍລິຫານງານ
9. ທ່ານ ພູຈິດ ວັດທະນາ ເປັນ ຄະນະບໍລິຫານງານ

ໃນກອງປະຊຸມດັ່ງກ່າວຍັງໄດ້ມີການມອບລາງວັນໃຫ້ນັກທຸລະກິດທີ່ເປັນສະມາຊິກຂອງ ສະພາການຄ້າ ແລະ ອຸດສາຫະກໍາ ແຂວງ ບໍລິຄຳໄຊ ທີ່ມີຜົນງານພົ້ນເດັ່ນຂອງແຂວງ ເພື່ອຍ້ອງຍໍຊົມເຊີຍ ແລະ ເປັນຂວັນ ກຳລັງໃຈໃຫ້ແກ່ຜູ້ທີ່ມີຜົນງານໄດ້ສືບຕໍ່ສ້າງຜົນງານຂອງຕົນໃຫ້ດີຂຶ້ນກວ່າເກົ່າ,ຈຳນວນ 45 ລາງວັນ

ທ່ານ ປອ ຄຳແສນ ສີສະວົງ ຮອງປະທານ ສຄອຊ ກ່າວມີຄຳເຫັນໃນກອງປະຊຸມໃຫ້ເອົາໃຈໃສ່ບຸກໜ້າບືນຕົວ ແລະ ສຸມສະຕິປັນຍາ ເຂົ້າໃນການຈັດຕັ້ງປະຕິບັດໜ້າທີ່ວຽກງານຂອງຕົນ ທີ່ຖືກມອບໜາຍ ໃນການສືບຕໍ່ຈັດຕັ້ງປະຕິບັດແຜນຍຸດທະສາດຂອງ ສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ວາງອອກໃນການພັດທະນາພາກທຸລະກິດໃນ ສປປ ລາວ ສຳລັບປີ 2021 – 2025 ທີ່ປະກອບດ້ວຍ 6 ເສົາຄ້ຳທີ່ມີເປົ້າໝາຍປັບປຸງແວດລ້ອມທຸລະກິດໃຫ້ດີຂື້ນ, ພັດທະນາ SME, ພັດທະນາຜະລິດຕະພັນລາວ ຍີ່ຫໍ້ລາວ, ເສີມສ້າງຄວາມເຂັ້ມແຂງຂອງແຮງງານ ແລະ ຜູ້ປະກອບການ-ຜູ້ໃຊ້ແຮງງານ, ພັດທະນາການຄ້າ ການລົງທຶນ ແລະ ເສີມສ້າງຄວາມເຂັ້ມແຂງຂອງການຈັດຕັ້ງຂອງພາກທຸລະກິດ, ສະພາການຄ້າແຂວງ, ສະພາການຄ້າເມືອງ, ສະມາຄົມ ແລະ ກຸ່ມທຸລະກິດ.

ໃນກອງປະຊຸມຍັງໄດ້ຮັບກຽດຈາກ ທ່ານ ປອ ສອນທະນູ ທຳມະວົງ, ກຳມະການສູນກາງພັກ ເລຂາພັກແຂວງ ເຈົ້າແຂວງ ແຂວງ ບໍລິຄຳໄຊ ໃຫ້ຄຳເຫັນ ແລະ ໂອ້ລົມໃຫ້ທິດເຍືອງທາງແກ່ ສຄອ ແຂວງບໍລິຄຳໄຊ ກໍ່ຄື ຄະນະບໍລິຫານງານ ຊຸດທີ VI ໃນຫລາຍຫຼາຍດ້ານ, ເຊິ່ງມີຄວາມໝາຍຄວາມສຳຄັນຢ່າງຍິ່ງ ໂດຍສະເພາະໄດ້ຊີ້ນໍາໃຫ້ຄະນະບໍລິຫານງານ ສຄອ ແຂວງບໍລິຄຳໄຊ ຕ້ອງມີຄວາມສາມັກຄີ, ມີຈິດໃຈຮັກຊາດ, ເຊື່ອໝັ້ນການນໍາພາຂອງພັກ ແລະ ລັດຖະບານ, ຕັ້ງໜ້າປະຕິບັດວຽກງານຕາມພາລະບົດບາດແນ່ໃສ່ສ້າງຄວາມເຂັ້ມແຂງໃຫ້ພາກທຸລະກິດ, ເອົາໃຈໃສ່ຜັນຂະຫຍາຍຕາມຄຳເຫັນຂອງ ທ່ານ ປອ ຄຳແສນ ສີສະວົງ ຮອງປະທານ ສຄອຊ ເພື່ອພັດທະນາ ສຄອ ແຂວງບໍລິຄຳໄຊ ໃຫ້ມີປະສິດທີຜົນ, ມີແບບແຜນວິທີເຮັດວຽກ, ລວມສູນປະຊາທິປະໄຕ, ມີລະບຽບ, ມີຄວາມໂປ່ງໃສ ແລະ ກວດສອບໄດ້.  ນອກຈາກນີ້, ທ່ານ ປອ ສອນທະນູ ທຳມະວົງ, ຍັງໄດ້ໃຫ້ຄຳເຫັນ ຕື່ມໃນກອງປະຊຸມ ເພື່ອພ້ອມກັນນຳໄປຈັດຕັ້ງປະຕິບັດໃຫ້ມີປະສິດທິຜົນໃນອະນາຄົດ ດັ່ງນີ້:

– ເຕົ້າໂຮມທຸລະກິດໃຫ້ມີຄວາມສາມັກຄີ ສະໜັບສະໜູນຊ່ວຍເຫຼື່ອ ເຊິ່ງກັນ ແລະ ກັນ.

– ສົ່ງເສີມການຜະລິດ ແລະ ຊົມໃຊ້ ພາຍໃນ ທົດແທນການນໍາເຂົ້າສິນຄ້າ. ຊອກຫາທ່າແຮງການຜະລິດກະສິກໍາເປັນສິນຄ້າ, ການສົ່ງເສີມການທ່ອງທ່ຽວພາຍໃນແຂວງ ແລະ ການພັດທະນາສິນຄ້າໜຶ່ງເມືອງໜຶ່ງຜະລິດຕະພັນ.

– ຖືເອົາການພັດທະນາເສດຖະກິດແບບຢືນຍົງທີ່ຕິດພັນກັບເສດຖະກິດສີຂຽວ ແລະ ນຳໃຊ້ເຕັກໂນໂລຊີເຂົ້າໃນການພັດທະນາເສດຖະກິດໃຫ້ກ້າວໜ້າທຽບເທົ່າສາກົນ

– ຂໍບັນດາພະແນກການ ໃຫ້ການສະໜັບສະໜູນ ການຈັດຕັ້ງປະຕິບັດດໍາລັດ 237/ນຍ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ສຄອຊ ແລະ ສະໜັບສະໜູນໃຫ້ ບັນດາທຸລະກິດຂອງແຂວງ ເຂົ້າມາຢູ່ໃນການຈັດຕັ້ງຂອງ ສຄອ ແຂວງບໍລິຄຳໄຊ, ສະມາຄົມ ແລະ ກຸ່ມທຸລະກິດ ເພື່ອໃຫ້ສາມາດຊ່ວຍເຫຼືອ ເຊິ່ງກັນ ແລະ ກັນ.

– ໃຫ້ບັນດາພະແນກການ ຊ່ວຍສະໜັບສະໜູນ ເອື້ອຍອຳນວຍສະພາບແວດລ້ອມ ຕາມລະບຽບກົດໝາຍ, ສ້າງຄວາມເຂັ້ມແຂງໃຫ້ ສຄອ ແຂວງບໍລິຄຳໄຊ.

ກອງປະຊຸມໄດ້ປິດລົງໃນເວລາ 12:30 ຂອງວັນດຽວກັນ