ໃນວັນທີ 18 ພະຈິກ 2024 ເວລາ 15:00 ທ່ານ ທະນູສອນ ພົນອາມາດ ພ້ອມຄະນະໄດ້ເຂົ້າຮ່ວມກອງປະຊຸມ ນະຄອນມິດຕະພາບສາກົນ ສປ ຈີນ, ເຊິ່ງຮ່ວມຈັດໂດຍ ສະມາຄົມມິດຕະພາບສາກົນປະຊາຊົນຈີນ,

ສະມາຄົມນະຄອນມິດຕະພາບສາກົນ ສປຈີນ ແລະ ອຳນາດການປົກຄອງແຂວງຢຸນຫນານ,ໂດຍມີຄະນະຜູ້ແທນເຂົ້າຮ່ວມຈາກພາກລັດ ແລະ ທຸລະກິດ ຈາກ 41ປະເທດ ຫລາຍກ່ວາ 700 ທ່ານ.

ຄະນະຜູ້ແທນຝ່າຍລາວເຂົ້າຮ່ວມນຳໂດຍ ທ່ານ ອານຸພາບ ຕຸນາລົມ ເລຂາຄະນະພັກ ປະທານສະພາປະຊາຊົນ ນະຄອນຫຼວງວຽງຈັນ,ທ່ານ ວຽງສະຫວັດ ສີພັນດອນ ເລຂາພັກແຂວງ ເຈົ້າແຂວງ ຫຼວງນ້ຳທາ, ທ່ານ ບຸນຈັນ ສີວົງພັນ ເລຂາພັກແຂວງ ເຈົ້າແຂວງຊຽງຂວາງ ພ້ອມຄະນະນໍາຈາກພາກສ່ວນທີ່ກ່ຽວຂ້ອງ. ພ້ອມດຽວກັນນັ້ນກໍມີເຈົ້າແຂວງ, ຮອງເຈົ້າແຂວງບັນດາປະເທດຕ່າງໆເຊັ່ນ:ຫວຽດນາມ ເກົາຫຼີ, ຍີ່ປຸ່ນ,ໄທ, ອາຟຣິກາ, ກຳປູເຈຍ, ລັດເຊຍ, ໂລມາເນຍ, ໄອເວລີໂຄດ ແລະ ປະເທດອື່ນໆ.

ກອງປະຊຸມໃນຄັ້ງນີ້ຍັງໄດ້ມີການມອບລາງວັນໃຫ້ແກ່ແຂວງ ແລະ ນະຄອນທີ່ໂດດເດັ່ນ ເຊິ່ງ ສປປລາວ ກໍ່ໄດ້ຮັບຫລາຍລາງວັນ, ພ້ອມນີ້ຍັງໄດ້ມີກອງປະຊຸມຍ່ອຍຕ່າງຕ່າງທີ່ປິ່ນອ້ອມເຊັ່ນ: ກອງປະຊຸມການກໍ່ສ້າງປະຊາຄົມຕົວເມືອງ ເຊື່ອມໂຍງ ເຊື່ອມຈອດ ຮ່ວມສະຕາກຳດຽວກັນ, ການເປີດຂະບວນລົດໄຟຈີນ ລາວ ໄທ ຈາກນະຄອນອັນຫນິງ ຜ່ານ ນະຄອນຫລວງວຽງຈັນ ຫາ ລະນອງ ແລະ ອື່ນໆ, ເຊິ່ງມີຈຸດປະສົງຫລັກແມ່ນເພື່ອເປັນການແລກປ່ຽນບົດຮຽນຊອກຫາກາລະໂອກາດຮ່ວມມືລະຫວ່າງແຂວງ,ນະຄອນນຳກັນໃຫ້ນັບມື້ນັບຂະຫຍາຍຕົວຢ່າງມີປະສິດທິຜົນ. ຕ່າງຝ່າຍຕ່າງໄດ້ຮັບຜົນປະໂຫຍດ. ໂດຍສະເພາະການສ້າງປະຊາຄົມ ຕົວເມືອງເຊື່ອມໂຍງ ເຊື່ອມຈອດ ຮ່ວມສະຕາກຳດຽວກັນ,ຊ່ວຍເຫຼືອເຊີ່ງກັນ ແລະ ກັນ, ຮ່ວມກັນພັດທະນາ ແລະ ມິດຕະພາບຫມັ້ນຄົງ.

ໃນກອງປະຊຸມປິ່ນອ້ອມເພື່ອເຮັດໃຫ້ການເຊື່ອມໂຍງເຊື່ອມຈອດມີປະສິດທີຜົນສູງສຸດ ແລະ ມີຜົນປະໂຫຍດຮ່ວມກັນໂດຍສະເພາະແມ່ນການຮ່ວມມືອາຊຽນ-ຈີນ , ທ່ານ ທະນູສອນ ພົນອາມາດ ຮອງປະທານ ສຄອຊ ໄດ້ສະເໜີບາງຂໍ້ຄິດເຫັນເຊັ່ນ:

– ການສະເໜີໃຫ້ລັດຖະບານຈີນ ສະໜັບສະໜູນງົບປະມານການສ້າງກົນໄກເຊື່ອມໂຍງເຊື່ອມຈອດຕາມນະໂຍບາຍ Belt and Road ເຊີ່ງລວມເຖິງສະຫນັບສະຫນູນກົນໄກການຮ່ວມມືລະບຽງເສດຖະກິດ ລາວ-ຈີນ.

– ການພັດທະນາຊັບພະຍາກອນມະນຸດເພື່ອສະໜອງການຮ່ວມມືອຸດສາຫະກຳຕາມເສັ້ນທາງລົດໄຟ ແລະ ເຂດທ່າບົກ.

– ການຮ່ວມກັນສ້າງໂຄງການຮ່ວມກັນຕາມເສັ້ນທາງລົດໄຟ ລາວ-ຈີນ ແລະ ອື່ນໆ.

ກອງປະຊຸມໄດ້ປິດລົງໃນວັນທີ 19 ພະຈິກ 2024