ປະທານ ສຄອຊ ພ້ອມດ້ວຍຄະນະ ເດີນທາງຕິດຕາມ ພະນະທ່ານສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ເດີນທາງຢ້ຽມຢາມ ຣາຊະອານາຈັກກຳປູເຈຍ ຢ່າງເປັນທາງການ

ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ) ນຳໂດຍ ທ່ານ ອຸເດດ ສຸວັນນະວົງ, ປະທານ ສຄອຊ ພ້ອມດ້ວຍຄະນະ ແລະ ນັກທຸລະກິດ ຈຳນວນ 28 ທ່ານ ເດີນທາງຕິດຕາມ ພະນະທ່ານສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ

ເດີນທາງຢ້ຽມຢາມ ຣາຊະອານາຈັກກຳປູເຈຍ ຢ່າງເປັນທາງການ ໃນລະຫວ່າງວັນທີ 4-5 ທັນວາ 2024.

ໃນໂອກາດດັ່ງກ່າວ ສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ຮ່ວມກັບ ສະພາການຄ້າກຳປູເຈຍ ຈັດກອງປະຊຸມພົບປະທຸລະກິດ ກຳປູເຈຍ-ລາວ (Cambodia-Laos Business Forum) ຂຶ້ນໃນວັນທີ 5 ທັນວາ 2024 ທີ່ ໂຮງແຮມ Sofitel Phnom Penh ໃຫ້ກຽດເຂົ້າຮ່ວມກອງປະຊຸມດັ່ງກ່າວໂດຍ ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ພ້ອມຄະນະ, ທ່ານ ອຸເດດ ສຸວັນນະວົງ, ປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ ພ້ອມດ້ວຍຄະນະບໍລິຫານງານ ສຄອຊ ແລະ ບັນດານັກທຸລະກິດຈາກຂະແໜງການຄ້າ, ນຳເຂົ້າ-ສົ່ງອອກ, ພະລັງານ-ບໍ່ແຮ່ ແລະ ທ່ອງທ່ຽວ,

ຝ່າຍກຳປູເຈຍນຳໂດຍ ພະນະທ່ານ Cham Nimul, ລັດຖະມົນຕີກະຊວງການຄ້າ ແຫ່ງ ຣາຊະອານາຈັກກຳປູເຈຍ ພ້ອມດ້ວຍຄະນະ ແລະ ທ່ານ Oknha Sok Piseth, ຮອງປະທານ ສະພາການຄ້າກຳປູເຈຍ ພ້ອມດ້ວຍຄະນະ.

ຈຸດປະສົົງຂອງການຈັດງານໃນຄັ້ງນີ້ແມ່ນເພື່ອພົບປະ, ແລກປ່ຽນຂໍ້ມູນທາງດ້ານການຄ້າ ແລະ ຄວາມເປັນໄປໄດ້ໃນການຮ່ວມມືກັນລະຫວ່າງນັກທຸລະກິດທັງສອງຝ່າຍທາງດ້ານທຸລະກິດໃນຂະແໜງການຕ່າງໆເຊັ່ນ: ການຄ້າ, ພະລັງງານ, ທ່ອງທ່ຽວ ແລະ ນຳເຂົ້າ-ສົ່ງອອກ ລະຫວ່າງ 2 ປະເທດ ລາວ-ກຳປູເຈຍ.