ກອງປະຊຸມສະຫຼຸບວຽກງານປະຈຳປີ 2024 ແລະ ທິດທາງແຜນການປະຈຳປີ 2025 ຂອງ ສະພາການຄ້າ ແລະ ອຸດສາຫະກຳແຂວງວຽງຈັນ ໄຂຂື້ນຢ່າງເປັນທາງການ

ໃນວັນທີ 11 ທັນວາ 2024 ທີ່ສະໂມສອນຫ້ອງວ່າການແຂວງວຽງຈັນ, ໂດຍການເປັນປະທານຂອງ ທ່ານ ຄຳພັນ ສິດທິດຳພາ ເລຂາພັກແຂວງ ເຈົ້າແຂວງ ແຂວງວຽງຈັນ, ແລະ ຍັງມີຜູ້ເຂົ້າຮ່ວມຈາກພະແນກການທີ່ກ່ຽວຂ້ອງເຊັ່ນ: ພະແນກການຄ້າ, ພະແນກແຜນການ ແລະ ການລົງທຶນ, ຫ້ອງການການຄ້າເມືອງ,ຕາງໜ້າເມືອງ, ສະມາຄົມ ທຸລະກິດ ແລະ ສຄອ ເມືອງ 11ເມືອງ, ສະພາການຄ້າ ແລະ ອຸດສາຫະກຳແຫ່ງຊາດລາວ ນຳໂດຍທ່ານ ວັນທອງ ສິດທິກຸນ ຮອງປະທານ.

ກອງປະຊຸມມີຈຸດປະສົງເພື່ອລາຍງານການຈັດຕັ້ງປະຕິບັດວຽກງານໂດຍສັງເຂບຂອງ ສະພາການຄ້າ ແລະ ອຸດສາຫະກຳແຂວງວຽງຈັນໃນ 1ປີ ທີ່ຜ່ານມາ (ຕີລາຄາ ຂໍ້ສະດວກ ແລະ ຂໍ້ຫຍຸ້ງຍາກ) ຂໍ້ສະເໜີທິດທາງແຜນການປະຈຳປີ 2025.

– ສະພາການຄ້າ ແລະ ອຸດສາຫະກຳ ແຂວງວຽງຈັນສາມາດຕີລາຄາຜົນງານທີ່ພົ້ນເດັ່ນດ້ານວຽກງານຕາມບູລະມະສິດ 6 ເສົາຄ້ຳຍຸດທະສາດ ຕາມພາລະບົດບາດຂອງ ສຄອຊ

– ສາມາດອອກໃບຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດເພື່ອສົ່ງສິນຄ້າອອກໄປຕ່າງປະເທດໄດ້ທັງໝົດ 1,562 ຟອມ, ນໍ້າໜັກສິນຄ້າສົ່ງອອກມີທັງໝົດ 319,018 ໂຕນ(ສາມແສນສິບເກົ້າພັນສິບແປດໂຕນ), ເປັນມູນຄ່າສົ່ງອອກທັງໝົດ 93.52 ລ້ານໂດລາ(ເກົ້າສິບສາມຈຸດຫ້າສິບສອງລ້ານໂດລາ),ໃນນີ້ໄດ້ສົ່ງອອກໄປຍັງ ສປ ຈີນ 307,754 ໂຕນ, ສົ່ງອອກໄປ ສສ ຫວຽດນາມ 11,011 ໂຕນ ແລະ ສົ່ງອອກໄປ ປະເທດໄທ 253 ໂຕນ.

ກອງປະຊຸມດັ່ງກ່າວຍັງໄດ້ລາຍງານບັນຫາຫຍຸ້ງຍາກໃນການປະຕິບັດວຽກງານໃນປີທີ່ຜ່ານມາ ແລະ ໄດ້ສະເໜີບາງບັນຫາຕໍ່ພາກລັດເພື່ອຫາແນວທາງແກ້ໄຂໃນການດຳເນີນທຸລະກິດພາຍໃນແຂວງວຽງຈັນເຊັ່ນ:

– ການຈັດຕັ້ງປະຕິບັດວຽກງານບາງດ້ານທີ່ຕິດພັນກັບຂະແໜງການພາກລັດ ເປັນຕົ້ນການຊຸກຍູ້ໃຫ້ຫົວໜ່ວຍທຸລະກິດ ເພື່ອເຂົ້າມາເປັນສະມາຊິກ ແລະ ມີສ່ວນຮ່ວມໃນຂະບວນການເຄື່ອນໄຫວວຽກງານສະພາການຄ້າຢູ່ຂັ້ນແຂວງ ແລະ ເມືອງ ແມ່ນຍັງບໍ່ທັນໄດ້ຮັບການເອົາໃຈໃສ່ຈາກບາງຂະແໜງການ.

– ພາກທຸລະກິດເອງ ກໍຍັງບໍ່ມີຄວາມກະຕືລືລົ້ນໃນການປະກອບສ່ວນເຂົ້າໃນວຽກງານ ສະພາການຄ້າອຸດສາຫະກໍາຢູ່ແຂວງ ແລະເມືອງ ເຖິງມີການປຸກລະດົມໃຫ້ເຂົ້າມາໃນການຈັດຕັ້ງ ກໍບໍ່ມີການ ເຄື່ອນໄຫວເທົ່າທີ່ຄວນ ເປັນຕົ້ນ ຄະນະບໍລິຫານງານຂັ້ນເມືອງບາງເມືອງຍັງບໍ່ມີຄວາມເສຍສະລະເພື່ອສ່ວນລວມ.

– ສະເໜີໃຫ້ພາກລັດ ກໍຄືພະແນກການທີ່ກ່ຽວຂ້ອງ ໄດ້ຊ່ວຍໃຫ້ຄວາມສະດວກ ແລະ ຊຸກຍູ້ໃຫ້ຫົວໜ່ວຍທຸລະກິດ ທີ່ໄດ້ຮັບອະນຸຍາດດຳເນີນທຸລະກິດໃນການຜະລິດ ແລະ ສົ່ງອອກຜົນຜະລິດກະສິກໍາ ແລະ ອຸດສາຫະກໍາ ຢູ່ແຂວງວຽງຈັນ, ໃນເວລາສົ່ງອອກ ໃຫ້ມາອອກໃບຢັ້ງຢືນແຫຼ່ງກໍາເນີດສິນຄ້າທີ່ໄດ້ຮັບສິດທິພິເສດຢູ່ແຂວງວຽງຈັນ, ເພື່ອໃຫ້ແຂວງວຽງຈັນ ມີລາຍຮັບຈາກການເກັບອາກອນ, ຄ່າທໍານຽມ ແລະ ຄ່າບໍລິການຕ່າງໆ ເຂົ້າງົບປະມານ ຂອງແຂວງໃຫ້ເພີ່ມຂຶ້ນ.

– ສະເໜີການນໍາພັກ-ລັດ ໃຫ້ສະພາການຄ້າ ແລະ ອຸດສາຫະກໍາແຂວງ ແລະ ເມືອງ ມີສ່ວນຮ່ວມໃນການຈັດຕັ້ງຕໍ່ກັບໂຄງການທີ່ມີການລົງທຶນທັງພາຍໃນ ແລະ ຕ່າງປະເທດຢູ່ແຂວງວຽງຈັນ.

– ຂໍໃຫ້ຂະແໜງການກ່ຽວຂ້ອງຂອງລັດ ໄດ້ຊ່ວຍຊຸກຍູ້ໃຫ້ຫົວໜ່ວຍທຸລະກິດ ປະກອບ ສ່ວນເຂົ້າໃນວຽກງານສະພາການຄ້າ ກໍ່ຄືເຂົ້າມາເປັນສະມາຊິກສະພາການຄ້າ ແລະ ອຸດສາຫະກໍາແຂວງ ແລະ ເມືອງ ໃຫ້ມີຈໍານວນເພີ່ມຂຶ້ນ.

– ສະເໜີທ່ານເຈົ້າເມືອງ 11 ເມືອງ ຊ່ວຍຊີ້ນໍາ, ຊຸກຍູ້ ສະພາການຄ້າ ແລະ ອຸດສາຫະກໍາເມືອງ ໃຫ້ມີການເຄື່ອນໄຫວຕາມພາລະບົດບາດ ເປັນຕົວແທນເຕົ້າໂຮມພາກທຸລະກິດພາຍໃນເມືອງ ເປັນຕົ້ນ ໃຫ້ລະດົມນັກທຸລະກິດເຂົ້າເປັນສະມາຊິກ ແລະ ສ້າງຕັ້ງກຸ່ມ ໃຫ້ສາມາດຄຸ້ມຄອງແລະ ດໍາເນີນທຸລະກິດ ສອດຄ່ອງກັບລະບຽບການ ລວມທັງການອຳນວຍຄວາມສະດວກໃຫ້ສະພາການຄ້າຂັ້ນເມືອງ ມີສ່ວນຮ່ວມໃນການສ້າງລາຍຮັບເພື່ອບໍລິຫານວຽກງານ ເປັນຕົ້ນ ການຈັດຕະຫຼາດນັດວາງສະແດງສິນຄ້າ ແລະ ວັນບຸນປະເພນີຕ່າງໆຂອງເມືອງ.

ທ່ານວັນທອງ ສິດທິກຸນ ຮອງປະທານ ສຄອຊ ກ່າວມີຄຳເຫັນໃນກອງປະຊຸມຕື່ມວ່າ

-ມອບໃຫ້ຄະນະ ສຄອ ແຂວງ ເອົາໃຈໃສ່ສືບຕໍ່ເນັ່ນໜັກປະຕິບັດແຜນວຽກຕາມ 6 ເສົາຄ້ຳຍຸດທະສາດ ສຄອຊ

-ເອົາໃຈໃສ່ເຕົ້າໂຮມສ້າງຕັ້ງກຸ່ມ ແລະ ສະມາຄົມບັນດາທຸລະກິດພາຍໃນແຂວງໃຫ້ມີຄວາມສາມັກຄີຊ່ວຍເຫຼືອເຊີ່ງກັນແລະກັນ

-ຫັນມານຳໃຊ້ທ່າແຮງທີ່ມີຢູ່ພາຍໃນແຂວງໃນການດຳເນີນທຸລະກິດ ເຊັ່ນ: ການກະສິກຳ ແລະ ການທ່ອງທ່ຽວ

-ນຳໃຊ້ສະຖານີລົດໄຟລາວ-ຈີນທີ່ມີຢູ່ພາຍໃນແຂວງ 3 ສະຖານີ ກໍຄືສະຖານີ ໂພນໂຮງ ສະຖານີວັງວຽງ ແລະ ສະຖານີກາສີ ໃຫ້ເກີດຜົນປະໂຫຍດຫລາຍທີ່ສຸດເປັນຕົ້ນແມ່ນການສົ່ງອອກໄປຍັງພາຍໃນແລະຕ່າງປະເທດ

ໃນກອງປະຊຸມຍັງໄດ້ຮັບກຽດຈາກ ທ່ານ ຄຳພັນ ສິດທິດຳພາ,ເຈົ້າແຂວງ ແຂວງວຽງຈັນ ໃຫ້ຄຳເຫັນ ແລະ ໂອ້ລົມໃຫ້ທິດເຍືອງທາງແກ່ ສຄອ ແຂວງວຽງຈັນ ກໍ່ຄື:

– ພະຍາຍາມສ້າງບ້ານ ແຕ່ລະບ້ານໃຫ້ມີ 3ກຸ່ມຄື: ກຸ່ມກະສິກຳ ປູກພືດ, ກຸ່ມລ້ຽງສັດ ແລະ ກຸ່ມການບໍລິການ.

– ສ້າງເມືອງ 1 ເມືອງໃຫ້ມີ 1 ເຂດບໍລິການ 1ເຂດການຜະລິດ, ສ້າງຊ່ຽວຊານ,ສ້າງວິຊາການ ແລະ ເພື່ອສ້າງວຽກເຮັດງານທຳໃຫ້ປະຊາຊົນໃນເຂດທ້ອງຖິ່ນ

ກອງປະຊຸມໄດ້ປິດລົງເວລາ 12:00 ໂມງ